ឆ្នាំ២០៣០ អង់គ្លេស នឹងបញ្ជូនមនុស្សយន្តទៅប្រយុទ្ធនៅលើសមរភូមិ (មានវីដេអូ)

មេទ័ពអង់គ្លេសលោក Collins បាននិយាយថា មនុស្សយន្តរបស់កងទ័ពប្រទេសនេះ អាចនឹងប្រយុទ្ធជាមួយសត្រូវនៅលើសមរភូមិក្នុងឆ្នាំ២០៣០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សរសេរនៅក្នុងទស្សនាវដ្តីកងទ័ពអង់គ្លេស មេទ័ពរូបនេះបាននិយាយថា នៅរយៈពេលប្រាំពីរឆ្នាំទៀត ទំនាក់ទំនងដំបូងជាមួយសត្រូវនៅលើសមរភូមិ នឹងត្រូវបានធ្វើឡើងដោយមនុស្សយន្ត។

ការអះអាងបែបនេះ បានធ្វើឲ្យគេនឹកឃើញដល់ខ្សែភាពយន្តហូលីវូដ រឿង Terminator ដែល មនុស្សយន្តអូតូ បានធ្វើសង្គ្រាម សម្លាប់មនុស្សដោយគ្មានមេត្តា។

ទោះបីជាយ៉ាងណាក៏ដោយ ការភ័យខ្លាចបែបនេះ មិនមែនជារឿងប្រឌិតបែបវិទ្យាសាស្ត្រទៀតទេ។ យន្តហោះគ្មានមនុស្សបើកស្វ័យប្រវត្តិ ឬពាក់កណ្តាលស្វ័យប្រវត្តិ ត្រូវបានគេប្រើប្រាស់រួចទៅហើយនៅក្នុងសង្គ្រាម ដើម្បីតាមប្រមាញ់ កំណត់គោលដៅ និងសម្លាប់មនុស្ស។

នៅក្នុងប្រទេសអ៊ុយក្រែន កងទ័ពរុស្ស៊ីត្រូវគេចោទប្រកាន់ថា បានដាក់ពង្រាយយន្តហោះគ្មានមនុស្សបើកវាយប្រហារដែលដំណើរការដោយប្រព័ន្ធ AI ដូចជា Kalashnikov ZALA និង Lancet។ យន្តហោះគ្មានមនុស្សបើកទាំងពីរប្រភេទនេះ មានសមត្ថភាពអាចស្វែងរក និងបំផ្លាញគោលដៅបានយ៉ាងជាក់លាក់។

រឿងដែលគួរឲ្យព្រួយបារម្ភដូចគ្នានេះដែរ របាយការណ៍អង្គការសហប្រជាជាតិឆ្នាំ២០២០បានបញ្ជាក់ថា យន្តហោះដ្រូនវាយប្រហារធុន Kargu-2 ដែលផលិតដោយតួកគី ត្រូវបានប្រើជាលើកដំបូងក្នុងសមរភូមិ នៅប្រទេសលីប៊ីដែលហែកហួរដោយសង្រ្គាម។

យោងតាមក្រុមហ៊ុនផលិត, Kargu 2 អាចដំណើរការទាំងស្វ័យប្រវត្តិ និងដោយដៃ ហើយថាវាប្រើខួរក្បាលយន្ត និងប្រព័ន្ធវិភាគរូបភាពពិតៗ ប្រឆាំងនឹងគោលដៅរបស់វា។

រីឯ កាលពីឆ្នាំ២០២១ ប្រទេសអ៊ីស្រាអែល បានបង្ហោះយន្តហោះគ្មានមនុស្សបើកដែលដឹកនាំដោយប្រព័ន្ធ AI ដើម្បីអនុវត្តការវាយប្រហារលើពួកសកម្មប្រយុទ្ធហាម៉ាស នៅក្នុងអ្វីដែលត្រូវបានគេជឿថា ជាការប្រើប្រាស់បច្ចេកវិទ្យាដំបូងបង្អស់របស់ពិភពលោក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពិព័រណ៍យន្តហោះ និងបច្ចេកវិទ្យា រយៈពេល ២ ថ្ងៃ ទាក់ទាញសិស្សានុសិស្ស-និស្សិត និងសាធារណជន ច្រើនកុះករ