ព័ត៌មានអន្ដរជាតិ

មហាក្សត្រអង់គ្លេស យាងទៅអាមេរិក ពង្រឹងណាតូដែលប្រេះស្រាំ និងរួមគ្នាគាំទ្រអ៊ុយក្រែន

បានផុស

១ ខែ មុន

នៅ

ថ្ងៃពុធ ២៩ មេសា ២០២៦

ដោយ

ព្រះមហាក្សត្រ Charles ទី៣ នៃចក្រភពអង់គ្លេស បានថ្លែងព្រះរាជសុន្ទរកថាមួយនៅចំពោះមុខសភាសហរដ្ឋអាមេរិក ដើម្បីសន្យាអំពីការឯកភាពគ្នារបស់អង្គការណាតូ និងអំពាវនាវឱ្យមានការគាំទ្រដល់អ៊ុយក្រែន ដែលកំពុងប្រឹងប្រែងក្រាញននៀលក្នុងសង្គ្រាមឈ្លានពានជាបន្តបន្ទាប់ពីរុស្ស៊ីចូលដល់ឆ្នាំទី៥។

យោងតាមសារព័ត៌មាន Al Jazeera ផ្សាយថ្ងៃទី២៨ ខែមេសា ឆ្នាំ២០២៦ ព្រះរាជសុន្ទរកថាកាលពីថ្ងៃអង្គារ ធ្វើឡើង អំឡុងពេលដំណើរទស្សនកិច្ចរយៈពេល ៤ថ្ងៃ របស់ព្រះមហាក្សត្រអង់គ្លេស ទៅកាន់សហរដ្ឋអាមេរិក ខណៈសង្គ្រាមអាមេរិក-អ៊ីស្រាអែលជាមួយអ៊ីរ៉ង់ និងមានការរិះគន់ពីប្រធានាធិបតីសហរដ្ឋអាមេរិក ដូណាល់ ត្រាំ ចំពោះអង្គការណាតូ និងភាពតានតឹងផ្នែកពាណិជ្ជកម្មរវាងសម្ព័ន្ធមិត្តយូរអង្វែង កំពុងកើនឡើងយ៉ាងខ្លាំង។

ព្រះមហាក្សត្រ Charles ទី៣ នៃចក្រភពអង់គ្លេស ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា ព្រះមហាក្សត្រ Charles បានជៀសវាងការលើកឡើងណាមួយដែលអាចនាំឲ្យមានការប៉ះទង្គិចរវាងប្រទេសទាំងពីរ គឺសហរដ្ឋអាមេរិកនិងចក្រភពអង់គ្លេស អំឡុងពេលថ្លែងសុន្ទរកថារបស់ព្រះអង្គនៅឯសេតវិមាន ជំនួសមកវិញដោយសំឡេងស្រាលៗនៅក្នុងការបើកសុន្ទរកថានោះ។

ព្រះអង្គ បានថ្លែងក្នុងសេតវិមានថា៖ « ខ្ញុំនៅទីនេះក្នុងឱកាសដ៏អស្ចារ្យមួយក្នុងជីវិតរបស់ប្រជាជាតិយើង ដើម្បីបង្ហាញពីការគោរព និងមិត្តភាពដ៏ខ្ពង់ខ្ពស់បំផុតរបស់ប្រជាជនអង់គ្លេស ចំពោះប្រជាជនសហរដ្ឋអាមេរិក»។

ស្តេច Charles មិនបានថ្លែងដោយផ្ទាល់អំពីសង្គ្រាមអាមេរិក-អ៊ីស្រាអែលជាមួយអ៊ីរ៉ង់ ឬការរិះគន់ដោយឥតសំចៃរបស់ ប្រធានាធិបតី ត្រាំ ចំពោះសម្ព័ន្ធមិត្តណាតូ ដែលបដិសេធការចូលរួម និងជាប់ពាក់ព័ន្ធក្នុងកិច្ចខិតខំប្រឹងប្រែងធ្វើសង្គ្រាមរបស់ទីក្រុងវ៉ាស៊ីនតោននោះទេ។

ផ្ទុយទៅវិញ ព្រះអង្គបានសរសើរសហរដ្ឋអាមេរិកចំពោះការគាំទ្រណាតូ និងការអំពាវនាវរបស់សម្ព័ន្ធមិត្តឱ្យចេះស្រឡាញ់គ្នា ដូចមានក្នុងសន្ធិសញ្ញាការពារជាតិរួមតាមមាត្រា៥នៃធម្មនុញ្ញរបស់អង្គការណាតូ បន្ទាប់ពីការវាយប្រហារភេរវកម្មកាលថ្ងៃទី១១ ខែកញ្ញា ឆ្នាំ២០០១ នៅទីក្រុងញូវយ៉ក។

ព្រះអង្គមានបន្ទូលថា៖ « យើងបានឆ្លើយតបនឹងការអំពាវនាវរួមគ្នា ដូចដែលប្រជាជនរបស់យើងបានធ្វើអស់រយៈពេលជាងមួយសតវត្សរ៍មកហើយ ដោយប្រកៀកស្មាគ្នាឆ្លងកាត់សង្គ្រាមលោកទាំងពីរ សង្គ្រាមត្រជាក់ អាហ្វហ្គានីស្ថាន និងគ្រាដែលកំណត់សន្តិសុខរួមរបស់យើង»។

បន្ទាប់មក ព្រះអង្គបានងាកទៅថ្លែងពីការផ្តល់មូលនិធិសម្រាប់អ៊ុយក្រែន ជាបញ្ហាដែលមានការចង្អុលបង្ហាញកាន់តែខ្លាំងឡើងៗ នៅក្នុងសភាអាមេរិកគ្រប់គ្រងដោយគណបក្សសាធារណរដ្ឋ។

ព្រះអង្គមានបន្ទូលបន្ថែមថា៖ «ថ្ងៃនេះ លោកប្រធានសភា បង្ហាញការតាំងចិត្តដ៏រឹងមាំដូចគ្នាគឺតម្រូវការចាំបាច់សម្រាប់ការការពារអ៊ុយក្រែន និងប្រជាជនដ៏ក្លាហានបំផុតរបស់ទីក្រុងកៀវ»៕

ប្រែសម្រួល៖ ណឺ មិនា