លោកជំទាវ ហ៊ុន ម៉ាណា អំពាវនាវឲ្យបញ្ឈប់ការបង្កើតហ្វេសប៊ុកក្លែងក្លាយដាក់រូបលោកជំទាវ និងស្វាមីជាបន្ទាន់

លោកជំទាវ ហ៊ុន ម៉ាណា អគ្គនាយិកា វិទ្យុ-ទូរទស្សន៍បាយ័ន នៅព្រឹកថ្ងៃអង្គារនេះ បានគូសបញ្ជាក់ឲ្យដឹងថា ទំព័រហ្វេសប៊ុក(Facebook)របស់លោកជំទាវមានតែមួយប៉ុណ្ណោះ។ ដូច្នេះហើយ លោកជំទាវបានអំពាវនាវឲ្យបញ្ឈប់ជាបន្ទាន់នូវសកម្មភាពបង្កើតទំព័រហ្វេសប៊ុកក្លែងក្លាយដែលមានឈ្មោះ និងរូបភាពលោកជំទាវ និងស្វាមី គឺឯកឧត្តម ឌី វិជ្ជា តទៅទៀត។

ទំព័រហ្វេសប៊ុកក្លែងក្លាយ

តាមរយៈទំព័រហ្វេសប៊ុកផ្លូវការ លោកជំទាវ ហ៊ុន ម៉ាណា បានសរសេរបែបនេះថា៖«ថ្មីៗនេះ មានជនខិលខូចបានបង្កើត Facebook ក្លែងក្លាយ ដោយបន្លំធ្វើជា Facebook នាងខ្ញុំ ដោយប្រើប្រាស់ឈ្មោះ និងរូបថតនាងខ្ញុំ នឹងស្វាមីដូចនឹង Facebook នាងខ្ញុំតែម្ដង គ្រាន់តែខុសចំនួនអ្នក Like , Follower តែប៉ុណ្ណោះ ដូចមានភ្ជាប់ក្នុងរូបនេះស្រាប់»។​

ជាមួយនឹងការលើកឡើងយ៉ាងនេះ លោកជំទាវ ហ៊ុន ម៉ាណា អគ្គនាយិកា វិទ្យុ-ទូរទស្សន៍បាយ័ន បានស្នើសុំប្រជាពលរដ្ឋអ្នកលេងបណ្តាញសង្គមទាំងអស់កុំឱ្យមានការភាន់ច្រឡំ ហើយលោកជំទាវបានសូមអំពាវនាវដល់ម្ចាស់ Facebook ក្លែងក្លាយនេះ សូមបញ្ឈប់សកម្មភាពនេះជាបន្ទាន់៕

ទំព័រហ្វេសប៊ុកពិតប្រាកដ