ហ្វីយ៉ាតា រំភើបពន្លឹក ក្រោយទទួលបានការសរសើរនិងលើកទឹកចិត្តពីលោកជំទាវ ហ៊ុន ម៉ាណា

ម្ចាស់មកុដ Miss Universe Cambodia 2025 អ្នកនាង ថៃ នារីសុជាតា ហៅ ហ្វីយ៉ាតា ដែលទើបត្រឡប់ពីការប្រកួត Miss Universe លើកទី៧៤ នៅទឹកដីប្រទេសថៃបានបង្ហាញអារម្មណ៍រំភើបជាខ្លាំង បន្ទាប់ទទួលបានកាសរសើរ និងលើកទឹកចិត្តពីលោកជំទាវ ហ៊ុន ម៉ាណា ។

ហ្វីយ៉ាតា រៀបរាប់ទាំងក្តីរំភើបថា គ្រាន់តែឃើញភ្លាមញ័រដៃជើងវាប្រៀបបានជាពានរង្វាន់ដ៏មានតម្លៃសម្រាប់ខ្លួនផ្ទាល់ ហើយមានតែម្រាមដៃដប់លើកសំពះអរគុណលោកជំទាវ ព្រោះពិតជារំភើបដល់ស្រក់ទឹកភ្នែក។

ឯជុំរឿងរ៉ាវនៃលទ្ធភាពកាត់សេចក្តីក្នុងកម្មវិធីនោះ បវរកញ្ញារូបនេះ ថា ដ្បិតខ្លួនមិនអាចយកតំណែងណាមួយមកវិញពីពួកគេនៅទីនោះ ព្រោះគេយកហេតុផលផ្សេងមកកាត់ក្ដីដោយមិនមែនផ្ដោតលើសមត្ថភាព, ភាពវៃឆ្លាត, គំនិតឆ្នៃប្រឌិត, ការពុះពារ ភាពរឹងមាំក្លាហាននៃមនុស្សស្រីម្នាក់ទៀតទេ…។

ហ្វីយ៉ាតា បន្តថា “ទោះយ៉ាងណាឱ្យតែនាងខ្ញុំបានលើកយកឈុតតំណាងជាតិ (ចាបុីដងវែង និងឈុតកែច្នៃថែមផ្ការំដួល និងក្បាច់ខ្មែរលើឈុតដោយកូនខ្មែរផ្ទាល់) ដើរបង្ហាញលើឆាកអន្តរជាតិក្នុងហ្វូងមនុស្សប្រទេសគេ ក្នុងកាលៈទេសៈដ៏តានតឹងរវាងប្រទេសទាំងពីរ ទោះត្រូវស្ពាយគ្រប់យ៉ាងដើរចូលទៅតែម្នាក់ឯង គ្រងឈុតទាំងមូលដោយខ្លួនឯង ទោះគ្មានអ្នកចង់អើពើនៅក្រោយឆាកតែគ្រាន់តែគិតដល់ “កម្ពុជា” នាងខ្ញុំមានកម្លាំងបន្តទៅមុនទៀតហើយនាងខ្ញុំអស់ចិត្តហើយ”។

ម្ចាស់មកុដ Miss Universe Cambodia 2025 រូបនេះបន្ថែមថា “កាលដែលលោកបានឃើញ វាប្រៀបបានជាតំណែង និងកាដូរដ៏មានតម្លៃជាងតំណែងពីជាតិណាផ្សេងទាំងអស់ក្នុងលោកនេះ”។

សូមបញ្ជាក់ថា អ្នកតាមដានវិស័យបវរកញ្ញា និងមហាជនអ្នកគាំទ្រស្ញើចសរសើរព្រមទាំងមានមោទនភាពជាខ្លាំង ក្រោយឃើញបវរកញ្ញាកម្ពុជាអ្នកនាង ហ្វីយ៉ាតា បានដើរបង្ហាញឈុតតំណាងជាតិលើឆាកប្រកួត Miss Universe លើកទី៧៤ ដោយភាពជឿជាក់បង្ហាញពីភាពទន់ភ្លន់ និងមានអំណាចខ្លាំងពោរពេញដោយថាមពល៕ អត្ថបទ ៖ ចាន់រ៉ា