ជំនួបដំបូងក្នុង​តំណែង​​រដ្ឋមន្រ្តី លោក អ៊ាង សុផល្លែត ​ឲ្យ​​មន្រ្តីគ្រប់ជាន់ថ្នាក់មូរដៃអាវចុះអនុវត្ត​ការងារ

ថ្លែងនៅក្នុងជំនួបជាមួយ​ថ្នាក់ដឹកនាំ​គ្រប់ជាន់ថ្នាក់​នៅ​ទីស្តីការក្រសួងបរិស្ថាននៅព្រឹកថ្ងៃទី២៨ ខែសីហា ឆ្នាំ២០២៣ លោក អ៊ាង សុផល្លែត បានណែនាំ​​ឲ្យ​ថ្នាក់ដឹកនាំ​និង​មន្រ្តីគ្រប់ជាន់ថ្នាក់នៃក្រសួងបរិស្ថាន ត្រូវតែមូរដៃអាវចុះអនុវត្តការងារ ដោយមិនមានការមើលបំណាំគ្នាហើយកុំវាយតម្លៃឬវិនិច្ឆ័យដោយអគតិ​។

«អាណត្តិនេះគឺត្រូវផ្តោតលើលទ្ធផល ដែលលទ្ធផលទាំងនោះជាផលប្រយោជន៍របស់ជាតិហើយនេះជាការសន្យារបស់ថ្នាក់ដឹកនាំជាមួយប្រជាពលរដ្ឋកម្ពុជា»។ នេះជាការថ្លែងរបស់លោក អ៊ាង សុផល្លែត រដ្ឋមន្រ្តីក្រសួងបរិស្ថានជាមួយថ្នាក់ដឹកនាំនិងមន្រ្តីក្រោមឱវាទនៃក្រសួងបរិស្ថាន។

លោក អ៊ាង សុផល្លែត ដែល​ទទួល​បាន​តំណែង​ជា​រដ្ឋមន្រ្តី​ក្រសួង​បរិស្ថានក្នុង​អណត្តិទី ៧ របស់​រាជរដ្ឋាភិបាល​ថ្មី​​បាន​បញ្ជាក់​ថា ការបំពេញការងារដោយភាពឆ្នៃប្រឌិត វាងវៃបត់បែនទៅតាមជំនាញ និងមានវិន័យគឺជាដើមចមដែលជួយឱ្យថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់របស់ក្រសួងបរិស្ថានសម្រេចបាននូវគោលដៅរួមសុក្រឹតកម្មបរិស្ថានកិច្ច។

លោក​រដ្ឋមន្រ្តី​បានបន្ត​ថា ថ្នាក់ដឹកនាំ និងមន្រ្តីនៃក្រសួងបរិស្ថាន គឺជាតំណាងឱ្យប្រជាពលរដ្ឋជាង ១៧ លាននាក់ ដែលពួកគាត់បានផ្តល់ឱ្យថ្នាក់ដឹកនាំ និងមន្រ្តីទាំងអស់នៃក្រសួងបរិស្ថាន ក្លាយជាតំណាងនិងជាអ្នកបម្រើឱ្យផលប្រយោជន៍របស់​ពួកគាត់។

លោក​រដ្ឋមន្រ្តីក៏បានផ្តាំផ្ញើចំពោះថ្នាក់ដឹកនាំ និងមន្រ្តីក្រោមឱវាទឱ្យសិក្សាស្វែងយល់បន្ថែមលើយុទ្ធសាស្រ្តស៊ីជម្រៅរបស់រាជរដ្ឋាភិបាលកម្ពុជា ទី១ត្រូវដឹង ទី២ត្រូវចេះ និងអនុវត្តឱ្យបានជាលទ្ធផលល្អប្រសើរក្នុងបុព្វហេតុ​ជួយ​ជាតិមាតុភូមិ​។

គួររម្លឹកដែរថា កាលពីថ្ងៃទី២២ ខែសីហា ឆ្នាំ២០២៣ នៅចំពោះមុខរដ្ឋសភា ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជាបានលើកពី​ «កម្មវិធីនយោបាយ» ដែលធានា ៥ យ៉ាងក្នុងនោះមានការធានាមួយគឺបង្កើនការយកចិត្តទុកដាក់ដល់ចីរភាពនៃការអភិវឌ្ឍសង្គម-សេដ្ឋកិច្ច និងការកសាងភាពធន់ដើម្បីឆ្លើយតបទៅនឹងបញ្ហានៃការប្រែប្រួលអាកាសធាតុ៕