សម្ដេច ហ៊ុន ម៉ាណែត៖ រាជរដ្ឋាភិបាលថ្មីមិនបានបង្កើតពន្ធថ្មីណាមួយ ដើម្បីដាក់បន្ទុកពលរដ្ឋនោះទេ

សម្ដេចធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិបាលថ្មី មិនបានបង្កើតពន្ធថ្មីណាមួយ ដើម្បីដាក់បន្ទុកប្រជាពលរដ្ឋនោះទេ។ នេះបើតាមរយៈសារសម្លេងរបស់សម្ដេចធិបតី ហ៊ុន ម៉ាណែត ជូនសមាជិករាជរដ្ឋាភិបាលពាក់ព័ន្ធករណីពន្ធដា នាល្ងាចថ្ងៃទី២៧ ខែកញ្ញានេះ។

ការណ៍ដែលសម្ដេចធិបតីចេញសារសម្លេងបែបនេះ ពីព្រោះមានរំជើបរំជួលក្នុងបណ្ដាញសង្គម ជុំវិញបញ្ហាពន្ធដា ក្រោយ លោក គង់ វិបុល អគ្គនាយកពន្ធដា​ ផ្ដល់បទសម្ភាសអំពីការប្រមូលពន្ធ លើចំណេញមូលធនដែលគ្រោងអនុវត្តនៅដើមឆ្នាំ២០២៤ ហើយផ្សព្វផ្សាយលើបណ្ដាញសង្គម។

សម្ដេចធិបតី បានបន្តបញ្ជាក់ថា ចំពោះបញ្ហាពន្ធចំណេញមូលធននេះ មិនមែនជាពន្ធដែលទើបបង្កើតឡើងនោះទេ។ កន្លងមកអគ្គនាយកដ្ឋានពន្ធដា បានពន្យាការប្រមូលពន្ធចំណេញលើមូលធននេះ រយៈពេល៣ឆ្នាំមកហើយ ។ ជាមួយគ្នានេះ បើតាមលោក  គង់ វិបុល អគ្គនាយកដ្ឋានពន្ធដា នឹងការប្រមូលពន្ធចំណេញលើមូលធននេះ នៅដើមឆ្នាំ២០២៤ ក្នុងករណីដែលមិនមានការប្រែប្រួល។

យ៉ាងណា បើតាមសារសម្លេងរបស់ សម្ដេចធិបតី ហ៊ុន​ ម៉ាណែត រាជរដ្ឋាភិបាលមិនទាន់បានសម្រេចលើគោលការណ៍ចុងក្រោយ ឬកែសម្រួលយ៉ាងណា លើគោលការណ៍ប្រមូលពន្ធចំណេញលើមូលធននៅដើមឆ្នាំ២០២៤នោះទេ៕