អតីតជើងខ្លាំង ឡោ សំណាង សរសើរ ប៉ឺត សង្ឃឹម ស័ក្តិសមតំណាងឲ្យគុនខ្មែរ

អតីតកីឡាករប្រដាល់ល្បីឈ្មោះ ឡោ សំណាង បានចាត់ទុកកីឡាករប្រដាល់គុនខ្មែរ ប៉ឺត សង្ឃឹម ស័ក្តិសមតំណាងឲ្យគុនខ្មែរ។

លោក ឡោ សំណាង ដែលកាលនៅជាកីឡាករពូកែវ៉ៃក្បាច់ដែរនោះបានលើកឡើងថា ៖«ប៉ឺត សង្ឃឹម ទើបស័ក្តិសមតំណាងឲ្យគុនខ្មែរទាំងក្បាច់ កម្លាំង ល្បឿន និងភាពវៃឆ្លាត។ ខ្ញុំទទួលស្គាល់នេះទើបចេះវាយពិតប្រាកដមែន អត្តចរិកកាន់តែល្អ។ ខ្ញុំពេញចិត្តគាត់»។

ប៉ឹត សង្ឃឹម ដែល​ជា​កូន​សិស្ស​របស់​លោក​គ្រូ សេន ប៊ុនថេន និង ប៉ឺត ខាំ​ មិនទាន់ស្គាល់ពាក្យបរាជ័យឡើងក្នុងការឡើងសង្វៀនប្រហែលជាបីឆ្នាំចុងក្រោយនេះ និងអាចចាត់ទុកជាកីឡាករទទួលបានជោគជ័យបំផុត។ រូបគេបានឈ្នះមេដាយមាសស៊ីហ្គេម២រដូវកាលជាប់គ្នាជូនជាតិ និងឈ្នះខ្សែក្រវាត់ជាច្រើនគ្រឿង។

សម្រាប់ឆ្នាំ២០២៣ ប៉ឺត សង្ឃឹម បានខ្សែក្រវាត់គុនខ្មែរអន្តរជាតិ IPCC Kun Khmer និងមេដាយមាសស៊ីហ្គេម ឆ្នាំ២០២៣។ ទោះបីជាយ៉ាងណា រូបគេមិនសូវបានប្រកួតញឹកញាប់ទេដោយសារហ្វឹកហាត់នៅជម្រើសជាតិដើម្បីប្រកួតកីឡាស៊ីហ្គេមដែលកម្ពុជាធ្វើជាម្ចាស់។

បន្ទាប់ពីចប់ព្រឹត្តិការណ៍កីឡាស៊ីហ្គេម ប៉ឺត សង្ឃឹម បានសម្រាកពីសង្វៀនប្រហែលជាបីបួនខែដើម្បីព្យាបាលរបួស ហើយទើបតែវិលត្រឡប់មកសង្វៀនវិញកាលពីខែតុលាកន្លងទៅនេះទេ ប៉ុន្តែរូបគេនៅតែមានសមត្ថភាពល្អដូចដើម៕

អត្ថបទ៖ វីរបុត្រ