ថៃ ដាក់គោលដៅបង្កើនការនាំចេញអង្ករឲ្យបាន ៨.៥ លានតោននៅឆ្នាំនេះ​

ប្រទេសថៃបានបង្កើនគោលដៅនាំចេញអង្ករនៅក្នុងឆ្នាំ ២០២៣ នេះ ដល់ជិត ៨.៥ លានតោន ស្របពេលតម្លៃអង្ករដៃគូប្រជែងរបស់ខ្លួនគឺ ប្រទេសវៀតណាមក៏កំពុងតែ​មានតម្លៃខ្ពស់​នៅលើទីផ្សារផងដែរ ។

លោក Chookiat Ophaswongse ប្រធានកិត្តិយសនៃសមាគមអ្នកនាំចេញអង្ករថៃបានប្រាប់សារព័ត៌មាន Reuters កាលពីថ្ងៃពុធថា ស្របពេលដែលអង្ករ​វៀតណាម​មាន​តម្លៃ​ថ្លៃ ដូច្នេះ​ប្រទេស​ដូចជា ​ហ្វីលីពីន និង​ឥណ្ឌូណេស៊ី​ នឹង​បង្កើន​ការ​បញ្ជា​ទិញ​អង្ករ​ថៃជំនួសវិញ ។​

បច្ចុប្បន្នអង្ករ​ថៃលក់​ក្នុងតម្លៃប្រហែល ៥៥០ ទៅ ៥៥៥ ដុល្លារ​ក្នុង​មួយ​តោន ខណៈ​អង្ករ​វៀតណាមវិញ​លក់​ដល់តម្លៃជាង ៦៣០ ដុល្លារក្នុងមួយតោន ។

ការដាក់គោលដៅបង្កើនការនាំចេញនេះ គឺដោយសារតែផលិតផលស្រូវថៃនៅក្នុងឆ្នាំនេះ មានផលប៉ះពាល់តិចតួចពីបាតុភូតអាកាសធាតុ El Nino ខណៈនៅឆ្នាំក្រោយ ថៃរំពឹងនឹងបានផលពីស្រូវចន្លោះ ៣៣ ទៅ ៣៤ លានតោន ដោយកើនឡើង ២ លានតោន បើប្រៀបធៀបនឹងរយៈពេលដូចគ្នាកាលពីឆ្នាំមុន ។

គួរបញ្ជាក់ថា ថៃជាប្រទេសនាំចេញអង្ករធំទី ២ របស់ពិភពលោក បន្ទាប់ពីប្រទេសឥណ្ឌា ខណៈនៅឆ្នាំនេះ រដ្ឋាភិបាលដាក់គោលដៅនាំចេញអង្ករយ៉ាងតិចចំនួន ៨ លានតោន ខណៈគិតត្រឹមខែមករាដល់ខែកញ្ញា ថៃបានលក់អង្ករចំនួន ៦.០៨ លានតោនមកហើយ ដោយកើនឡើង ១២ ភាគរយ បើធៀបនឹងឆ្នាំមុន ៕

ប្រែសម្រួល៖ នាង រតនៈ

ប្រភព៖​ Bangkok Post

ចុចអាន៖ មកដឹងតម្លៃស្ករ ស ក្នុងមួយគីឡូក្រាមនៅ ថៃ