ការដោះដូរពាណិជ្ជកម្មកម្ពុជា-វៀតណាម សម្រេចបានជាង ៥,៨ពាន់លានដុល្លារ កើនឡើង ៦,៦ភាគរយ

វៀតណាមជាប់លំដាប់លេខរៀងទី៣ ក្នុងការដោះដូរទំនិញជាមួយកម្ពុជា បន្ទាប់ពីចិន និងអាមេរិក។ គិតត្រឹមខែវិច្ឆិកា ឆ្នាំ ២០២៣ ទំហំពាណិជ្ជកម្មរវាងកម្ពុជា-វៀតណាម សម្រេចបានជាង ៥,៨ពាន់លានដុល្លារ កើនឡើង ៦,៦ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនជាង ៥,៥ពាន់លានដុល្លារអាមេរិក។ នេះបើតាមរបាយ​ការណ៍របស់អគ្គនាយកដ្ឋានគយ និងរដ្ឋាករកម្ពុជា។

បើតាមប្រភពដដែលបញ្ជាក់ថា ការនាំចេញរបស់កម្ពុជា ទៅវៀតណាម ពីខែមករា ដល់ខែវិច្ឆិកា ឆ្នាំ ២០២៣ មានទំហំជាង ២,៦១ពាន់លានដុល្លារ និងនាំចូលមកវិញមានចំនួនទឹកប្រាក់ជាង ៣,២ពាន់លានដុល្លារ។ ក្នុងនោះ ទំនិញដែលកម្ពុជានាំចេញសំខាន់ៗភាគច្រើនជាផលិតផលកសិកម្ម មានដូចជា ស្រូវ ដំឡូងមី ស្វាយចន្ទី និងកៅស៊ូ​ជាដើម ខណៈការនាំចូលវិញមានដែកថែប ប្រេងឥន្ធនៈ និងផលិតផលវាយនភណ្ឌ។

ទន្ទឹមនឹងកំណើនពាណិជ្ជកម្មរវាងប្រទេសទាំងពីរ កាលពីថ្ងៃទី ១១ ខែ ធ្នូ សម្តេចនាយករដ្ឋមន្រ្តី ហ៊ុន ម៉ាណែត បានធ្វើដំណើរទស្សនកិច្ចទៅប្រទេសវៀតណាម ដើម្បីពង្រឹងទំនាក់ទំនងឱ្យកាន់តែរីកចម្រើនរឹងមាំ ស្របតាមស្មារតី​នៃភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង។

តាមរយៈជំនួបទ្វេភាគី នៅថ្ងៃទី១១ ធ្នូ លោកនាយករដ្ឋមន្ត្រីវៀតណាម បានសម្តែងការជឿជាក់ថា ក្រោមការដឹកនាំរបស់ សម្តេចធិបតី ហ៊ុន ម៉ាណែត នាវាកម្ពុជានឹងកាន់តែអភិវឌ្ឍន៍ខ្លាំងក្លាទៅមុខបន្ថែមទៀត សំដៅឆ្ពោះទៅសម្រេច​ចក្ខុវិស័យប្រែក្លាយកម្ពុជា ជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រាក់ចំណូល​កម្រិតខ្ពស់​នៅឆ្នាំ២០៥០ ជាក់ជាមិនខាន។

ភាគីទាំងពីរ ក៏បានពិភាក្សាលើការដាក់ចេញនូវទិសដៅក្នុងការបន្តពង្រឹង និងពង្រីកកិច្ចសហប្រតិបត្តិការលើគ្រប់​វិស័យឱ្យ​ទទួលបានលទ្ធផលជាផ្លែផ្កាបន្ថែមទៀត ដើម្បីផលប្រយោជន៍ទៅវិញទៅមកសម្រាប់ជាតិ និងប្រជាជន​ប្រទេសទាំងពីរ ជាពិសេសវិស័យនយោបាយ ពាណិជ្ជកម្ម វិនិយោគ ទេសចរណ៍ សុខាភិបាល អប់រំ ការងារខណ្ឌសីមា និងការបោះបង្គោលព្រំដែន ជាដើម។

នាដំណើរទស្សនកិច្ចនេះដែរ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា តំណាងអ្នកឧកញ៉ា គិត ម៉េង បានចុះហត្ថលេខាលើអនុស្សរណៈយោគយល់គ្នារវាងសភាពាណិជ្ជកម្មកម្ពុជា ជាមួយសភាពាណិជ្ជកម្ម និងឧស្សាហកម្ម​វៀតណាម ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោក ផាម មិញជិញ នាយក​រដ្ឋមន្ត្រី​នៃប្រទេសវៀតណាម គោលបំណងដើម្បីជួយជំរុញ និងពង្រីកទំនាក់ទំនងពាណិជ្ជកម្ម និងសេដ្ឋកិច្ចរវាង​សហគមន៍ធុរកិច្ចប្រទេសទាំងពីរតាមរយៈការផ្លាស់ប្តូរព័ត៌មាន និងការរៀបចំព្រឹត្តិការណ៍ធុរកិច្ចរួមគ្នា ដូចជា ពិព័រណ៍​ពាណិជ្ជកម្ម វេទិកាធុរកិច្ច ទស្សនកិច្ចធុរកិច្ច និងសិក្ខាសាលា ជាដើម។

ភាគីទាំងពីរ រំពឹងថា នឹងសម្រេចឱ្យបាននូវទំហំពាណិជ្ជកម្ម ២០ពាន់លានដុល្លារ នៅឆ្នាំបន្ទាប់តាមរយៈការពង្រឹង​ទំនាក់ទំនងរវាងសេដ្ឋកិច្ចទាំងពីរ ជំរុញពាណិជ្ជកម្មទ្វេភាគី ជាពិសេសពាណិជ្ជកម្មតាមព្រំដែន និងកិច្ចសហប្រតិ​បត្តិការអភិវឌ្ឍន៍សេដ្ឋកិច្ចនៅតាមតំបន់ព្រំដែនជាដើម៕