​កសិករធ្វើស្រែប្រាំង បន្តបូមទឹកចេញពីអាងកំពីងពួយ ខណៈ​អាជ្ញាធរ​បារម្ភ​ខ្វះទឹកប្រើប្រាស់

បើតាមអាជ្ញាធរស្រុកបាណន់ និងស្រុកថ្មគោលបានឲ្យដឹងថា រហូតមកដល់ពេលនេះយ៉ាងហោចណាស់មានស្រូវប្រាំងរបស់ប្រជាកសិករដែលបានបន្តធ្វើស្រូវប្រាំងជុំវិញអាងកំពីងពួយខ្ទង់ពាន់ហិកតា កំពុងប្រឈមការខ្វះទឹកស្រោចស្រព ដែលស្ថិតក្នុងឃុំចំនួន ២ គឺ ឃុំតាគ្រាម ស្រុកបាណន់ និងឃុំអន្លង់រុន ស្រុកថ្មគោល ខេត្តបាត់ដំបង។

កសិករក្រោយការប្រមូលផលហើយមិនអនុវត្តតាមការណែនាំ​ពីមន្ត្រីជំនាញ នៅ​តែ​បន្តការដាំដុះដោយផ្សងព្រេង និង​កំពុង​មមាញឹកក្នុងការបូមទឹកចេញពីអាងកំពីងពួយចូលប្រឡាយដើម្បីបន្តស្រោចស្រព ទោះបី​មន្រ្តីជំនាញនិងអាជ្ញាធរបានហាមឃាត់ជាបន្តបន្ទាប់ ដើម្បីរក្សាទឹកទុកប្រើប្រាស់ប្រចាំថ្ងៃក្នុងរដូវក្តៅអូសបន្លាយពេលយូរ។

ប្រជាកសិករបានទទួលស្គាល់ថា កន្លងទៅអាជ្ញាធរ និងមន្រ្តីជំនាញបានហាមឃាត់ មិនឱ្យធ្វើស្រែប្រាំងបង្កើនរដូវទៀតនោះទេ ក្រោយប្រមូលផលរួចដោយខ្លាចខ្វះខាតទឹក និងរក្សាទុកទុកប្រើប្រាស់ ប៉ុន្តែដោយសារពួកគាត់ឃើញក្នុង​អាងកំពីង​ពួយ​មានទឹក ក៏នាំគ្នាដាំតាមគ្នាតែម្តង ដោយផ្សងព្រេងក្រែងមានភ្លៀងធ្លាក់គួបផ្សំជាមួយទឹកអាងផង។

កសិករបន្តថា ការផ្សងព្រេងនេះបានធ្វើឲ្យសេដ្ឋកិច្ចគ្រួសារដើរថយក្រោយក្នុងឆ្នាំនេះ ព្រោះចំណាយច្រើនលើប្រេងបូមទឹក ៣ តង់ទំរាំដល់ស្រែ។

កសិករ​បន្តថា ការបូមទឹកចេញពីអាងទម្លាក់តាមប្រឡាយនេះ ដោយសារតែទឹកក្នុងអាងកាន់តែរាក់ មិនអាចបើកទ្វារបង្ហូរបាន ក៏បានយកម៉ាស៊ីនបូមទឹកចេញពីអាងទាំងយប់ទាំងថ្ងៃទម្លាក់ចូលទៅប្រឡាយមេ និងបន្តបូម ២ តង់ទៀតទើបទៅ​ដល់ស្រែ ខណៈការ​ដាំដុះជាងមួយខែ​ស្រូវក៏ជិតផើមទៅហើយដែរ ទើបពួកគាត់សម្រុកបូមទឹក​ស្រោចស្រពក្រែងបានទទួល​​ផលខ្លះ បើទោះបីដឹងថាខាតដើមក៏ដោយ។

លោក នៃ ពៅ មេឃុំតាគ្រាម ស្រុកបាណន់ បានឱ្យដឹងថា អាជ្ញាធរនិង​មន្រ្តីជំនាញបានបើកទ្វារទឹកស្រោចស្រព​ស្រូវប្រជាពលរដ្ឋបីជំហានមកហើយ ប៉ុន្តែរដូវប្រាំងនេះជាជំហាន​ទីបួន គឺមិនអាចបើកទ្វារទឹកបង្ហូរចេញពីអាងចូលទៅប្រឡាយ​​បានទេ ដោយសារតែទឹករីងខ្លាំងស្រកផុតពីទ្វារទឹកទៅហើយ។

លោកថា ស្រូវប្រាំងប្រជាពលរដ្ឋអាចនឹងប្រឈមខ្វះខាតទឹកនាពេលខាងមុខ ដោយសារតែចំនួននៃការធ្វើស្រែប្រាំង​លើសផែនការកំណត់ច្រើន។ មន្ទីរណែនាំឱ្យធ្វើតែជាង ១៦០០ ហិកតាប៉ុណ្ណោះនៅឃុំ តាគ្រាម ស្រុកបាណន់ និង ឃុំអន្លង់រុន ស្រុកថ្មគោល ប៉ុន្តែប្រជាពលរដ្ឋមិនស្តាប់តាមការណែនាំនេះ។

លោកមេឃុំបន្តថា លោកកំពុងឱ្យស្រង់ស្ថិតិតាមភូមិផ្នែកខាងក្រោម គឺមិនទាន់មានការខ្វះខាតទឹកប្រើប្រាស់សម្រាប់មនុស្សនោះទេ ប៉ុន្តែមានការ​ខ្វះខាតទឹកសម្រាប់​សត្វពាហនៈខ្លះ និង​កំពុងស្រង់ទិន្នន័យភូមិប៉ែក​ខាងលើបន្តបន្ទាប់ទៀត ក្រែងមានផលប៉ះពាល់ក្នុងការប្រើប្រាស់ប្រចាំថ្ងៃក្នុងគ្រួសារ។

យ៉ាងណាមិញ មន្ទីរធនធានទឹកនិងឧត្តុនិយមខេត្តបាត់ដំបង បានបញ្ជាក់លើផេកផ្លូវការរបស់ខ្លួនកាលពីចុងសប្តាហ៍នេះ​ថា អាងកំពីងពួយមានលទ្ធភាពស្តុកទឹកសរុប ២០០ លានម៉ែត្រគូប តែបច្ចុប្បន្ននេះទឹកនៅ​សល់ប្រមាណ ​១០ លាន​ម៉ែត្រ​​គូបប៉ុណ្ណោះ សម្រាប់ពលរដ្ឋប្រើប្រាស់ប្រចាំថ្ងៃ ហើយបច្ចុប្បន្នប្រជាកសិករ កំពុងធ្វើស្រូវប្រាំងក្នុងអាងទឹកចំនួន ២.៥៥០ ហិកតា (ក្រៅផែនការ) និង ១.៧០០ (ក្នុងផែនការ) ដែលកំពុងប្រើប្រាស់ទឹកក្នុងអាងដើម្បីស្រោចស្រព៕

អត្ថបទ៖ សៅ សារិទ្ធ