ផ្លូវបេតុងមួយខ្សែប្រវែង៨៤៦ម៉ែត្រក្នុងភូមិតាឡីស្ថាបនាជិតរួចរាល់

ផ្លូវបេតុងចាស់វស្សាមួយខ្សែដែលទ្រុឌទ្រោមជាយូរមកហេីយ ពេលនេះប្រែក្លាយជាផ្លូវបេតុងថ្មីសន្លាងដេីម្បីទុកឱ្យប្រជាពលរដ្ឋប្រេីប្រាស់ធ្វេីដំណេីរ និងប្រកបជាជីវកម្មផ្សេងៗ។

លោក​ សំ ​ញ៉ាវ​ ប្រធានសាធារណកា​រខណ្ឌដង្កោ​ បានប្រាប់ឱ្យដឹងថា​ ដោយឃេីញផ្លូវបេតុងចាស់វស្សាមួយខ្សែស្ថិតនៅក្នុងភូមិតាឡី​ សង្កាត់ដង្កោ​ ខណ្ឌដង្កោ​ មានការទ្រុឌទ្រោម​ ជង្ហុកសម្បុកមាន់​ច្រើន ពិបាកដល់ការធ្វេីដំណេីរឆ្លងកាត់ក៏ដូចជាប្រកបរបរផ្សេងៗរបស់ប្រជាពលរដ្ឋ​ និងមានការយកចិត្តទុកដាក់ពីអាជ្ញាធរ​ កម្លាំងជំនាញពាក់ព័ន្ធបានចុះពិនិត្យជាក់ស្តែង​ និងបានដាក់គ្រឿងចក្រឈូសឆាយ​ កាយដាក់ប្រព័ន្ធលូ​ ស្ថាបនាផ្លូវខាងលេីប្រែក្លាយជាផ្លូវបេតុងឆ្អឹកដែក​ ទុកសម្រាប់ប្រជាពលរដ្ឋប្រេីប្រាស់ប្រកបរបរផ្សេងៗ។

លោក​ សំញ៉ាវ​ បន្តទៀតថា​ ការស្ថាបនាផ្លូវបេតុងខាងលេីមានប្រវែង៨៤៦មែត្រ​ ទទឹង៦ម៉ែត្រ​ ដោយប្រេីប្រាស់ថវិកាគម្រោងមូលនិធិអភិវឌ្ឍន៍របស់រដ្ឋបាលរាជធានីភ្នំពេញ។ ពេលនេះការស្ថាបនាជិតរួចរាល់ហេីយ និងដាក់ឱ្យប្រជាពលរដ្ឋប្រេីប្រាស់នាពេលឆាប់ៗនេះ៕

អត្ថបទ៖ សុខា