ព័ត៌មានអន្ដរជាតិ

ប៉ូលិសអាល្លឺម៉ង់ឆ្មក់ចូលហាងភីហ្សាដែលលក់កូកាអ៊ីនជាមួយភីហ្សា

បានផុស

២ years មុន

នៅ

ថ្ងៃពុធ ២៣ តុលា ២០២៤

ដោយ

ប៉ូលិសអាល្លឺម៉ង់បានឆ្មក់ចូលហាងភីហ្សាមួយកន្លែងនៅភាគខាងលិចប្រទេស ដែលមុខម្ហូបនោះបានបម្រើអតិថិជនជាមួយភីហ្សាដែលមានកូកាអ៊ីនក្នុងភីហ្សាលេខ៤០នៅលើបញ្ជីរាយនាមមុខម្ហូប (Menu)។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៣ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម លោក Michael Graf von Moltke ដំបូងឡើយ អាជ្ញាធរត្រូវបានផ្តល់ព័ត៌មានអំពីការប្រើសារធាតុនេះកាលពីខែមីនាដោយអ្នកត្រួតពិនិត្យអាហារ ហើយមន្ត្រីក្រុមត្រួតពិនិត្យគ្រឿងញៀនបានចាប់ផ្តើមតាមដានហាងនេះ។ ប៉ូលិសក្រុង Düsseldorf បានទៅឃាត់ខ្លួនអ្នកគ្រប់គ្រងហាងភីហ្សានៅឯផ្ទះល្វែងរបស់គាត់ បុរសអាយុ៣៦ឆ្នាំរូបនោះថា បានបោះថង់គ្រឿងញៀនចេញពីបង្អួច ហើយប៉ូលិសបានរកឃើញកូកាអ៊ីន ១,៦គីឡូក្រាម ថ្នាំញៀន៤០០ក្រាមនិងប្រាក់ ២៨៩៦៣៥ដុល្លារ នៅក្នុងផ្ទះល្វែង។

អ្នកគ្រប់គ្រងហាងត្រូវបានប៉ូលិសដោះលែងពីរបីថ្ងៃក្រោយមក ហើយគាត់បានបើកហាងរបស់គាត់ឡើងវិញ ហើយបន្តលក់ថ្នាំញៀន និងភីហ្សារួមបញ្ចូលគ្នា។ ក្រុមអ្នកស៊ើបអង្កេតបានប្រើឱកាសនេះដើម្បីស្វែងរកខ្សែសង្វាក់ផ្គត់ផ្គង់គ្រឿងញៀនទៅកាន់ហាងភីហ្សា ដែលនាំឱ្យពួកគេទៅបង្ក្រាបកន្លែងគ្រឿងញៀនមួយនៅភាគខាងលិចប្រទេសអាល្លឺម៉ង់ជាច្រើនសប្តាហ៍ក្រោយមក។

មន្រ្តីប៉ូលិស១៥០ នាក់បានឆ្មក់ចូលចម្ការកញ្ឆាចំនួនពីរ មួយនៅ Mönchengladbach នៅភាគខាងលិចទីក្រុង Düsseldorf រកឃើញកញ្ឆា ៣០០ដើមនិងមួយទៀតនៅ Solingen បានរកឃើញកញ្ឆា៦០ដើម។ ផ្ទះនិងអាជីវកម្មរបស់ជនសង្ស័យក៏ត្រូវកម្លាំងសមត្ថកិច្ចចុះបង្រ្កាបឃាត់ខ្លួនបានចំនួន៣នាក់ ក្នុងនោះមានជនសង្ស័យម្នាក់ អាយុ២២ឆ្នាំ ជាប្រធានប្រតិបត្តិការគ្រឿងញៀន។ លើសពីនេះប៉ូលិសក៏បានរកឃើញអាវុធ លុយ និងនាឡិកាថ្លៃៗផងដែរក្នុងពេលវាយឆ្មក់។

មកដល់ពេលនេះអ្នកគ្រប់គ្រងហាងលក់ភីហ្សាត្រូវបានចាប់ខ្លួន ខណៈពេលដែលព្យាយាមចាកចេញពីប្រទេស ហើយកំពុងស្ថិតក្នុងការឃុំឃាំង។ គួរបញ្ជាក់ថាលេខមីនុយ ៤០ គឺជាភីហ្សាដែលលក់ដាច់បំផុត។ ទោះយ៉ាងណាប៉ូលិសមិនបានបញ្ចេញឈ្មោះអ្នកផ្សេងទៀតដែលជាប់ពាក់ព័ន្ធនឹងប្រតិបត្តិការគ្រឿងញៀន ឬតម្លៃភីហ្សា និងកូកាអ៊ីនរួមបញ្ចូលគ្នានោះទេ៕