អាវុធហត្ថខេត្តតាកែវ បន្តបង្ក្រាបមុខសញ្ញាគ្រឿង​ញៀន​៥នាក់ ដកហូតថ្នាំញៀន និងវត្ថុតាងមួយចំនួន

កម្លាំងកងរាជអាវុធហត្ថខេត្តតាកែវ ក្រោមការដឹកនាំបញ្ជាពីលោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ បានបន្តបើកប្រតិបត្តិការបង្ក្រាបបទល្មើសគ្រឿងញៀញ ដោយឃាត់បានមុខសញ្ញាជួញដូរ រក្សាទុក និងប្រើប្រាស់គ្រឿងញៀនខុសច្បាប់ចំនួន៥នាក់ និងដកហូតថ្នាំញៀនមួយចំនួន។ ប្រតិបត្តិការនេះ ធ្វើឡើងក្រោមការសម្របសម្រួលនីតិវិធីពីលោក ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ។

តាមរបាយការណ៍ពីសមត្ថកិច្ច បានឱ្យដឹងថា នៅវេលាម៉ោង ៩និង៥៥នាទីយប់ ថ្ងៃទី១១ ខែឧសភា ឆ្នាំ២០២៦ កម្លាំងមន្ទីរស្រាវជ្រាវ និងបង្ក្រាបបទល្មើស សហការជាមួយកម្លាំងមូលដ្ឋានកងរាជអាវុធហត្ថស្រុកព្រៃកប្បាស បានចុះបង្ក្រាបករណីគ្រឿងញៀននៅចំណុចភូមិផ្សារជ្រែ ឃុំអង្គាញ់ ស្រុកព្រៃកប្បាស។ ក្រោយការស៊ើបអង្កេត និងសាកសួរជនសង្ស័យ សមត្ថកិច្ចបានបន្តពន្លាតដែនប្រតិបត្តិការទៅដល់ខេត្តកណ្តាល។ លុះដល់វេលាម៉ោង ១១និង១០នាទីព្រឹក ថ្ងៃទី១២ ខែឧសភា ឆ្នាំ២០២៦ កម្លាំងជំនាញបានសហការជាមួយកម្លាំងកងរាជអាវុធហត្ថក្រុងសំពៅពូន និងស្ថិតក្រោមការសម្របសម្រួលនីតិវិធីពីលោក គុជ គីមឡុង ព្រះរាជអាជ្ញាអមសាលាដំបូងខេត្តកណ្តាល ចុះបង្ក្រាបជាក់ស្តែងនៅចំណុចចំការស្វាយ ស្ថិតក្នុងភូមិព្រែកសឹង សង្កាត់សំពៅពូន ក្រុងសំពៅពូន ខេត្តកណ្តាល។

ជាលទ្ធផល សមត្ថកិច្ចបានឃាត់ខ្លួនជនសង្ស័យសរុបចំនួន៥នាក់ រួមមាន៖១- ឈ្មោះ ស៊ាង លីវណ្ណា អាយុ៣៣ឆ្នាំ រស់នៅស្រុកអង្គរបូរី ខេត្តតាកែវ។ ២- ឈ្មោះ ធី ទីន អាយុ២២ឆ្នាំ រស់នៅស្រុកពាមជរ ខេត្តព្រៃវែង។ ៣- ឈ្មោះ គង់ សុជាតិ ហៅ កាក់ អាយុ២៩ឆ្នាំ រស់នៅស្រុកពាមជរ ខេត្តព្រៃវែង។ ៤- ឈ្មោះ ភី សុភាព ហៅ រី អាយុ៣៨ឆ្នាំ រស់នៅស្រុកមោងឫស្សី ខេត្តបាត់ដំបង។ និង៥- ឈ្មោះ ស ចាន់ អាយុ២៥ឆ្នាំ រស់នៅស្រុកស្វាយលើ ខេត្តសៀមរាប។

ក្នុងប្រតិបត្តិការនោះ សមត្ថកិច្ចបានដកហូតវត្ថុតាងមួយចំនួន រួមមាន ម្សៅក្រាមពណ៌សថ្លាសង្ស័យជាគ្រឿងញៀនចំនួន១៣កញ្ចប់ ទម្ងន់សរុប ៣៤៣.៨៩ក្រាម ជញ្ជីងថ្លឹងថ្នាំញៀន១គ្រឿង, ដាវដែក២ដើម, ទូរស័ព្ទដៃ៨គ្រឿង, ម៉ូតូ២គ្រឿង និងសម្ភារៈសម្រាប់វេចខ្ចប់គ្រឿងញៀនមួយចំនួនទៀត។

សមត្ថកិច្ចបានបញ្ជាក់ថា ប្រតិបត្តិការបង្ក្រាបបទល្មើសគ្រឿងញៀននៅក្នុងភូមិសាស្ត្រខេត្តតាកែវ កំពុងត្រូវបានអនុវត្តយ៉ាងសកម្ម និងជាបន្តបន្ទាប់ក្រោមការដឹកនាំផ្ទាល់ពីលោកឧត្តមសេនីយ៍ត្រី សេង មហា ដែលបានដាក់បទបញ្ជាឱ្យកម្លាំងជំនាញបន្តបោសសម្អាតមុខសញ្ញាជួញដូរ និងចែកចាយគ្រឿងញៀនឱ្យអស់ពីមូលដ្ឋាន ដើម្បីរក្សាសន្តិសុខ សុវត្ថិភាព និងសណ្តាប់ធ្នាប់សង្គមជូនប្រជាពលរដ្ឋ។ ជនសង្ស័យទាំង៥នាក់ រួមជាមួយវត្ថុតាង ត្រូវបានការិយាល័យជំនាញកងរាជអាវុធហត្ថខេត្តតាកែវ កសាងសំណុំរឿងបញ្ជូនទៅសាលាដំបូងខេត្តតាកែវ ដើម្បីចាត់ការតាមនីតិវិធីច្បាប់៕

អត្ថបទ៖ វីរៈ