មន្ត្រីកសិកម្មអះអាង ផលិតកម្មដំណាំនៅកម្ពុជា ទទួលបានលើសផែនការ

លោក ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន​កសិកម្ម មាន​ប្រសាសន៍នៅថ្ងៃទី ២៥ ខែតុលា ឆ្នាំ ២០២៤ នេះថា ផលិតកម្មដំណាំនៅក្នុងឆ្នាំ ២០២៤ ដំណើរការល្អ ការដាំដុះទាំងដំណាំស្រូវ សាកវប្ប​កម្ម និងដំណាំឧស្សាហកម្ម​ទទួលបាន​លើស​ផែនការ។

លោក ងិន ឆាយ បានឱ្យដឹងថា ការនាំចេញអាស្រ័យលើប្រភេទដំណាំ ឧទាហរណ៍ថា ផលិតកម្ម​ដំណាំស្រូវ តាមធម្មតាកម្ពុជាផលិតបាន ១២,៥ លានតោន ឆ្នាំ ២០២៣ ​និងបាន​ការនាំ​ចេញ​ទាំងអង្ករ និងស្រូវ ដែលតួលេខកាលពីឆ្នាំ ២០២៣ ក្នុងនោះកម្ពុជានាំចេញអង្ករបាន ៦០ ម៉ឺនតោន និង​ស្រូវប្រមាណ ៤ លានតោន ស្វាយចន្ទីដូចគ្នា កម្ពុជាផលិត​លើស​ជាតួលេខរួមបានប្រមាណជា ៨០ ម៉ឺនតោន ស្វាយចន្ទីត្រូវបាន​នាំចេញ​ស្ទើរតែ​ទាំងអស់ ដែលភាគច្រើនគឺជាគ្រាប់ស្វាយចន្ទីឆៅ ខណៈកែច្នៃ​បានតែ ១០%។ ក្រៅពីនេះ កម្ពុជាមានផលិតកម្មដំឡូងមីចំនួន ១៤ លានតោន ដែលធ្វើការនាំចេញ​ស្ទើរតែ​ទាំង​អស់​​​ដែរ។

បើតាមលោក ងិន ឆាយ កម្ពុជាមានផលិតផលជាច្រើនទៀត ដូចជាស្វាយកែវរមៀត មៀន​​​ប៉ៃលិន និងចេកអំបូងលឿងក៏នាំចេញច្រើន។

លោកបញ្ជាក់ថា កម្ពុជាអាចផ្គត់ផ្គង់ដំណាំ​ប្រភេទ​បន្លែប្រមាណ ៧០ ទៅ ៨០% អាស្រ័យ​ទៅ​តាម​រដូវ ខណៈរដូវរំហើយជាពេលសមស្របដាំដុះបន្លែទៅជាបញ្ហាផ្គត់ផ្គង់លើស ដែលធ្វើឱ្យតម្លៃធ្លាក់ចុះ៕

អត្ថបទ៖ ឡេង ដេត