អាមេរិក ព្រមាន​អ៊ីរ៉ង់​ថា​នឹង​ជួប​ទុក្ខ​ធ្ងន់ បើ​ហ៊ាន​វាយ​បក​ទៅ​អ៊ីស្រាអែល​វិញ

អ៊ីរ៉ង់ នឹង​ជួប​វិបត្តិ​ដ៏​ធ្ងន់​ធ្ងរ ប្រសិន​បើ​ខ្លួន​ហ៊ាន​អនុវត្ត​សកម្មភាព​ឈ្លានពាន​បន្ថែម​ទៀត​ប្រឆាំង​នឹង​អ៊ីស្រាអែល ឬ​បុគ្គលិក​អាមេរិក​នៅ​​តំបន់​មជ្ឈិមបូព៌ា។ នេះ​គឺ​ជា​ការ​ព្រមាន​ចំ​ៗ​របស់​សហរដ្ឋ​អាមេរិក ដែល​បាន​ធ្វើ​ឡើង​នៅ​ក្នុង​កិច្ច​ប្រជុំ​ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទ។

លោក​ស្រី Linda Thomas-Greenfield ឯកអគ្គរដ្ឋទូតអាមេរិកប្រចាំនៅ UN បាននិយាយថា៖ «យើងនឹងមិនស្ទាក់ស្ទើរធ្វើសកម្មភាពក្នុងការការពារខ្លួន។ កុំឲ្យមានការភាន់​ច្រឡំ។ សហរដ្ឋអាមេរិកមិនចង់ឃើញការកើនឡើងបន្ថែមទៀតទេ។ យើង​ជឿ​​ថា វា​​គួរ​តែ​ជា​ការ​បញ្ចប់​នៃ​ការ​​បាញ់បោះ​គ្នា​ទៅ​វិញ​ទៅ​មក​ដោយ​ផ្ទាល់​រវាង​អ៊ីស្រាអែល និង​អ៊ីរ៉ង់»។

ឯកអគ្គរដ្ឋទូតអ៊ីរ៉ង់​ប្រចាំ​ UN លោក Amir Saied Iravani បានចោទប្រកាន់ទីក្រុងវ៉ាស៊ីនតោន​ថា​បាន​ចូលរួម «សម​គំនិត​គ្នា» តាមរយៈការគាំទ្រផ្នែកយោធាសម្រាប់សម្ព័ន្ធមិត្តរបស់ខ្លួន។

លោក​បាន​ប្រាប់​ក្រុម​ប្រឹក្សា​ថា​ អ៊ីរ៉ង់​តែង​ចង់​ឲ្យ​មាន​ដំណោះស្រាយ​ការទូត​ជា​មុន​ តែ​​ «ទោះជាយ៉ាងណាក៏ដោយ ក្នុងនាមជារដ្ឋអធិបតេយ្យមួយ សាធារណៈរដ្ឋអ៊ីស្លាមអ៊ីរ៉ង់រក្សាសិទ្ធិរបស់ខ្លួនក្នុងការឆ្លើយតប​​នូវ​ការជ្រើសរើសរបស់ខ្លួនចំពោះទង្វើឈ្លានពាននេះ»។

ចំណែក​ឯ​ ឯកអគ្គរដ្ឋទូតអ៊ីស្រាអែល​ប្រចាំ UN លោក Danny Danon បានអំពាវនាវឲ្យ​ក្រុមប្រឹក្សាសន្តិសុខដាក់​ទណ្ឌកម្ម​លើហេដ្ឋារចនាសម្ព័ន្ធយោធា និងសេដ្ឋកិច្ចរបស់អ៊ីរ៉ង់ និង​ «ចាត់វិធានការចាំបាច់ ដើម្បីការពាររបបដែល​ឆ្កួត​លីលា​​ពីការសម្រេចបាននូវសមត្ថភាពនុយក្លេអ៊ែរ»។

សូម​បញ្ជាក់​ថា ក្រុមប្រឹក្សាសន្តិសុខបានជួបប្រជុំគ្នា បន្ទាប់ពីអ៊ីស្រាអែលបានវាយប្រហាររោងចក្រមីស៊ីល និងទីតាំងផ្សេងទៀតក្នុងប្រទេសអ៊ីរ៉ង់​កាល​ពី​ថ្ងៃសៅរ៍​កន្លង​ទៅ។ វា​ជាការ​សងសឹក​ចំពោះ​ការ​វាយប្រហារ​កាលពី​ថ្ងៃទី​១ខែតុលា​របស់​អ៊ីរ៉ង់​ទៅលើ​អ៊ីស្រាអែល​ជាមួយនឹង​មី​ស៊ី​ល​​ប៉ាលិស្ទិក​​ប្រមាណ​២០០​គ្រាប់​៕

ដោយ៖ ឈាង