ព័ត៌មានជាតិ

រដ្ឋបាលរាជធានីភ្នំពេញ កំពុងដំឡើងបង្គន់អនាម័យសាធារណៈ និងបន្ទប់ទឹកជាង ៣៤០ កន្លែង សម្រាប់កីឡាករ-ការិនី មកពីតាមបណ្ដារាជធានី-ខេត្ត

បានផុស

៩ ខែ មុន

នៅ

ថ្ងៃចន្ទ ១១ វិច្ឆិកា ២០២៤

ដោយ

រដ្ឋបាលរាជធានីភ្នំពេញ មន្ទីរសាធារណការ និងដឹកជញ្ជូនរាជធានីភ្នំពេញ បាននិងកំពុងយកចិត្តទុកដាក់ដំឡើងបង្គន់អនាម័យសាធារណៈ និងបន្ទប់ទឹក ប្រមាណជាង ៣៤០ កន្លែង ព្រមទាំងបន្ទប់ទឹកចល័ត និងបន្ទប់ទឹកដែលបានអភិវឌ្ឍន៍មានស្រាប់ សម្រាប់កីឡាករ កីឡាការិនី មកពីតាមបណ្ដារាជធានី-ខេត្ត ក្នុងភូមិសាស្ត្រសំខាន់ៗ ដើម្បីចូលរួមលើកកម្ពស់សោភណភាព អនាម័យ បរិស្ថាន ដ៏ស្រស់ស្អាត នាឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ខាងមុខនេះ នៅរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ១១ ខែវិច្ឆិកា ឆ្នាំ ២០២៤ នេះ សាលារាជធានីភ្នំពេញ មន្ទីរសាធារណការ និងដឹកជញ្ជូនរាជធានីភ្នំពេញ បាននិងកំពុងយកចិត្តទុកដាក់ដំឡើងបង្គន់សាធារណៈ និងបន្ទប់ទឹកប្រមាណជាង ៣៤០ កន្លែង ទាំងបន្ទប់ទឹកចល័ត និងបន្ទប់ដែលមានស្រាប់ សម្រាប់ប្រជាពលរដ្ឋ កីឡាករ កីឡាការិនី មកពីតាមបណ្ដារាជធានី-ខេត្ត ចូលមកកម្សាន្តលេង ក្នុងព្រះរាជពិធីបុណ្យអុំទូក បានប្រើប្រាស់ប្រកបដោយការទទួលខុសត្រូវ រួមមានទីតាំងសំខាន់ៗ ដូចជា ៖ ១.មណ្ឌលស្នាក់នៅ ជ្រោយចង្វារ OCIC (តំបន់A ,B និង C ជាប់មហាវិថី អូស៊ីអាយស៊ី)។ ២.មណ្ឌលស្នាក់នៅឫស្សីកែវ (តំបន់ D និង E ជាប់ផ្សាររាត្រីស្ពានខ្សែកាបបេតុងឫស្សីកែវ) ជាដើម។

រដ្ឋបាលរាជធានីភ្នំពេញ មន្ទីរសាធារណការ និងដឹកជញ្ជូនរាជធានីភ្នំពេញ ក្រុមការងារជំនាញ បានសំណូមពរប្រជាពលរដ្ឋ កីឡាករ កីឡាការិនី សូមចូលរួមថែរក្សាសណ្ដាប់ធ្នាប់ អនាម័យបរិស្ថាន តាមទីតាំងនីមួយៗ ដែលបានរៀបចំ និងការតភ្ជាប់បណ្ដាញទឹកស្អាតបានរួចហើយ ដើម្បីជាប្រយោជន៍ក្នុងការប្រើប្រាស់ទាំងអស់គ្នា នាឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដ៏មានអត្ថន័យខាងមុខនេះ ក្នុងរាជធានីភ្នំពេញ៕

អត្ថបទ ៖ សំណាង