ឯកឧត្តម ហ៊ុន ម៉ានិត​ អញ្ជើញសម្ពោធអគារសិក្សានៅអនុវិទ្យាល័យហ៊ុនសែនមាឃបី ស្រុកស្ទឹងត្រង់

នាព្រឹកថ្ងៃទី២៣ ខែវិច្ឆិកា ឆ្នាំ២០២៤ ឯកឧត្តម ហ៊ុន ម៉ានិត និងឯកឧត្តម ហួត ហាក់ ប្រធានក្រុមការងារគណបក្សចុះមូលដ្ឋានស្រុកស្ទឹងត្រង់ បានអញ្ជើញសម្ពោធអគារសិក្សា និងទីចាត់ការនៅអនុវិទ្យាល័យហ៊ុនសែនមាឃបី ស្ថិតក្នុងឃុំព្រែកកក់ ស្រុកស្ទឹងត្រង់ ខេត្តកំពង់ចាម។

អនុវិទ្យាល័យនេះ ត្រូវបានបង្កើតឡើងនៅក្នុងឆ្នាំ២០០៦ ដែលមានអគារតែមួយខ្នង ចំនួន ៦បន្ទប់ និងមិនមានទីចាត់ការសម្រាប់លោកគ្រូ អ្នកគ្រូឡើយ ហើយខ្វះខាតបន្ទប់សិក្សា ខណៈសិស្សានុសិស្សមានការកើនឡើងជារៀងរាល់ឆ្នាំ។

ដោយមើលឃើញពីការលំបាកនេះ ឯកឧត្តម ហ៊ុន ម៉ានិត និងលោកជំទាវ ព្រមទាំង​ក្រុមការងារគណបក្ស និងសប្បុរជន បានរួមគ្នាចូលរួមចំណែកកសាងអគារសិក្សាមួយខ្នងបន្ថែមទៀត មានចំនួន ៦បន្ទប់ និងទីចាត់ការថ្មី ១ខ្នងសម្រាប់លោកគ្រូ អ្នកគ្រូ និងសិស្សានុសិស្ស។ សមិទ្ធផលទាំងនេះ នឹងចូលរួមចំណែកបន្ថែមទៀតក្នុងការអភិវឌ្ឍវិស័យអប់រំ កសាងធនធានមនុស្សជូនជាតិមាតុភូមិ។

ថ្លែងក្នុងពិធីនេះ ឯកឧត្តម ហ៊ុន ម៉ានិត បានលើកឡើងថា កម្មវិធីនាថ្ងៃនេះ មិនអាចសម្រេចទៅបានឡើយ ប្រសិនបើប្រទេសជាតិគ្មានសុខសន្តិភាព និងការគាំទ្រជ្រោមជ្រែងពីសំណាក់ប្រជាជនគ្រប់មជ្ឈដ្ឋានចំពោះរាជរដ្ឋាភិបាល។

ឯកឧត្តម បានថ្លែងអំណរគុណដល់លោកគ្រូ អ្នកគ្រូ ដែលបានស្វះស្វែងគ្រប់មធ្យោបាយ ផ្តល់ចំណេះដឹង អប់រំទូន្មាន ដល់កុមារ និងយុវជន ក្នុងមូលដ្ឋានឱ្យមានសីលធម៌ ចំណេះដឹង សីលធម៌​ និងគុណធម៌។

ទន្ទឹមនេះ ឯកឧត្តម ក៏បានកោតសរសើរ និងវាយតម្លៃខ្ពស់ចំពោះក្រុមការងារគណបក្សគ្រប់ជាន់ថ្នាក់ អាជ្ញាធរ និងសមត្ថកិច្ច ក្នុងស្រុកស្ទឹងត្រង់ ដែលបានលះបង់គ្រប់បែបយ៉ាងបម្រើប្រជាពលរដ្ឋយ៉ាងស្មោះស័្មគ្រ ប្រកបដោយប្រសិទ្ធភាព​ ភាពទន់ភ្លន់ និងបានទាន់ពេលវេលា៕