ត្បិតកូនៗកំពុងបម្រើជាតិក្នុងឋានៈខ្ពង់ខ្ពស់ តែសម្ដេចតេជោ ថានឹងនៅធ្វើជាថ្មដើម្បីសំលៀងកូនៗឱ្យបានល្អជានិច្ច

ត្បិតថាកូនប្រុសទាំង៣ រួមមានសម្ដេចធិបតី ជានាយករដ្ឋមន្ត្រី,​ ឯកឧត្ដម ហ៊ុន ម៉ានី ឧ​បនាយករដ្ឋមន្ត្រី, ឯកឧត្ដម  ហ៊ុន ម៉ានិត មេបញ្ជាការរងកងទ័ពជើងគោក កំពុងបម្រើជាតិក្នុងឋានៈខ្ពង់ខ្ពស់ តែសម្ដេចតេជោ ហ៊ុន សែន ដែលជាឱពុក អះអាងថា នឹងនៅជាថ្មដើម្បីសំលៀងកូនៗជានិច្ច ឱ្យបានល្អជានិច្ច។ សម្ដេចតេជោ គូសបញ្ជាក់បែបនេះ តាមរយៈទំព័រហ្វេសប៊ុកផ្លូវការ ភ្ជាប់ជាមួយរូបថតកូនប្រុសទាំង៣របស់សម្ដេច គឺសម្ដេចធិបតី ហ៊ុន ម៉ាណែត, ឯកឧត្ដម ហ៊ុន ម៉ានិត, ឯកឧត្ដម ហ៊ុន ម៉ានី។

ខាងក្រោមនេះ​ គឺជាសំណេរទាំងស្រុងរបស់សម្ដេចតេជោ ហ៊ុន សែន នៅលើទំព័រហ្វេសប៊ុកផ្លូវការ នារសៀលថ្ងៃទី១៣ ខែមីនា នេះ៖

ពេជ្រកំពុងឆ្នៃ និងពេជ្រកែឆ្នៃរួច និងកំពុងរក្សាទុក ឬនិយាយមួយបែប គឺដាវកំពុងផលិត ដាវកំពុងប្រើ និងកំពុងសំលៀងបន្ត។ រូបថតប៉ុន្មានសន្លឹកនេះបង្ហាញពីជោគជ័យនៃការអប់រំបណ្តុះបណ្តាលកូនៗ ដែលពុកម៉ែប្រើពេលជាង៤០ឆ្នាំទើបទទួលផលដូចថ្ងៃនេះ

ទោះពួកកូនជាកូននាយករដ្ឋមន្ត្រី តែពួកកូនមិនមានម៉ូតូ​ ឬឡានជិះទេពួកកូនត្រូវដើរទៅរៀន ព្រោះសាលាមិនឆ្ងាយពីផ្ទះទេ(សាលាចតុមុខ)សំណាងជាងគេ​ ម៉ាណែត បានកង់ជិះព្រោះត្រូវរៀននៅវិទ្យាល័យព្រះសុីសុវត្តិ ដែលឆ្ងាយជាងគេបន្តិច។ ពុកមានលទ្ធភាពគ្រប់គ្រាន់ទិញឡាន ឬម៉ូតូឲ្យកូនជិះតែពុកចង់ឲ្យពួកកូនស្គាល់នូវជីវភាពប្រជាជនធម្មតាដូចកាលពុកនៅពីក្មេង។

ពេលកូនណាមួយមានកំហុសពួកកូនត្រូវជាប់វិន័យទាំងអស់គ្នា​​ ដោយអង្គុយអានសៀវភៅទាំងអស់គ្នាព្រោះពុកចង់ឲ្យពួកកូនចេះជួយដាស់តឿនគ្នាសាមគ្គីគ្នាដើម្បីជៀសវាងជាប់វិន័យទាំងអស់គ្នា។

ពេលពួកកូនចេញទៅរៀននៅក្រៅប្រទេសពុកទៅសរសេរវិន័យបិទក្នុងបន្ទប់គេង បន្ទប់ទឹកដែលពុកចាំជាងគេនៅបារាំងសម្រាប់ ម៉ានិត ម៉ានី ម៉ាលី គឺ(ចេញពីផ្ទះ៥០០ម៉ែត្រត្រូវប្រាប់បងណាហ្រ្គានិងសុខហ៊ានិងចាយ​លុយ​លើស​100​France​ត្រូវ​សុំការអនុញ្ញាតពីសុខហ៊ា)។

ពេលពួកកូនចេញទៅរៀនជុំគ្នានៅអាមេរិក ដែលមាន ម៉ាណា ម៉ានិត ម៉ានី ម៉ាលី លើកលែងតែម៉ាណែតពុកសរសេរវិន័យ(ដើរឃ្លាតពីផ្ទះ៥០០ម៉ែត្រត្រូវសុំអុំ ចាយលុយលើស៥០ដុល្លារត្រូវសុំពីអុំ)ទាំងនៅបារាំងទាំងនៅអាមេរិកសុទ្ធមានការកំណត់ម៉ោងត្រូវចូលគេង និងត្រូវបិទភ្លើងបិទម៉ាសុីនកំដៅ ម៉ាសុីនត្រជាក់ដើម្បីសន្សំសំចៃភ្លើង។

ពុកម៉ែសូមអរគុណកូនៗ ដែលជាង២០ឆ្នាំមុនបាននិយាយជាមួយគ្នាដែលពុកបានលួចស្តាប់ឮ ម៉ានិត និយាយថា ប្រាប់ទាំងអស់គ្នាថា(ពុកម៉ែតឹងតែង ចំពោះពួកយើងគឺចង់ឲ្យយើងល្អ)។

ពិតមែនតែពេលនេះពួកកូនមានប្រពន្ធមានប្តី និងមានកូនព្រមទាំងចេញដឹកនាំប្រទេសឬចូលរួមក្នុងការងារបំរើជាតិក្នុងឋានៈខ្ពង់ខ្ពស់ តែពុកនៅរង់ចាំធ្វើជាថ្មសំលៀងសម្រាប់ពួកកូនតទៅទៀត។

ពុកម៉ែចង់ឲ្យកូនៗខិតខំបណ្តុះបណ្តាលអប់រំកូនៗ ដែលជាចៅរបស់ពុកម៉ែតាមរបៀបពុកម៉ែតទៅទៀតពិសេសផ្តោតលើគុណធម៌ ចរិយាធម៍ សិលធម៌ចេះជួយអ្នកក្រីក្រ ទន់ខ្សោយ គោរពចាស់ទុំ សុភាពរាបសារ មិនឆ្មើងឆ្មៃ។ល។ចៅរបស់ពុកម៉ែជាចៅល្អហើយតែត្រូវតែតាមតម្រង់ទិសពួកគេតទៅទៀត៕