ទាហានវៀតណាម១២នាក់ ស្លាប់អំឡុងពេលធ្វើសមយុទ្ធ

តាមសេចក្តីរាយការណ៍របស់ The Star នៅថ្ងៃព្រហស្បតិ៍ទី៥ខែធ្នូឆ្នាំ២០២៤, ទាហានវៀតណាមចំនួន១២នាក់ បានបាត់បង់ជីវិតក្នុងអំឡុងពេលធ្វើសមយុទ្ធទាំងអាកាសធាតុមិនអំណោយផល នៅទីលានបាញ់កាំភ្លើងខេត្ត Dong Nai។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ VN Express ចុះផ្សាយថា ហេតុការណ៍កើតឡើងនៅពេលកងទាហានកំពុងយកគ្រាប់ទៅទីលានបាញ់ ប៉ុន្តែដោយសារមេឃភ្លៀងនិងមានរន្ទះបាញ់ផងនោះ ពួកគេក៏ឈប់សិន ស្រាប់តែមួយរំពេចក្រោយមកក៏មានការផ្ទុះយ៉ាងខ្លាំងតែម្តង។ ដូចនេះ ការស៊ើបអង្កេតបានចង្អុលថា មូល​ហេតុ​នៃការផ្ទុះ គឺដោយសារតែរន្ទះបាញ់ចំគ្រាប់។

ទោះមិនទាន់រកឃើញសាកសពទាំងអស់ ប៉ុន្តែក្រុមមន្ត្រីបញ្ជាក់ថា គេបានរកឃើញសាកសពភាគច្រើនហើយ ខណៈការស្វែងរកកំពុងបន្ត។

សូមបញ្ជាក់ថា សមយុទ្ធនេះមានការចូលរួមពីភ្នាក់ងារនិងអង្គភាពនានាក្នុងកងកម្លាំងប្រដាប់អាវុធនិងមូលដ្ឋានក្នុងតំបន់យោធភូមិភាគទី៧ ព្រមទាំងក្របខ័ណ្ឌយោធា អាវុធ និងអង្គភាពនៅក្រោមក្រសួងការពារជាតិ។

សមយុទ្ធនេះ គឺជាសកម្មភាពហ្វឹកហ្វឺនទ្រង់ទ្រាយធំ ដែលមានគោលបំណងបង្កើនភាពជាអ្នកដឹកនាំ បញ្ជាការ និងសមត្ថភាពសម្របសម្រួលប្រតិបត្តិការគ្រប់កម្រិត ហើយវាក៏ដើម្បីបង្កើនការត្រៀមលក្ខណៈ កម្លាំង និងសមត្ថភាពប្រយុទ្ធរបស់កងកម្លាំងប្រដាប់អាវុធក្នុងតំបន់យោធាផងដែរ៕

អត្ថបទ៖ សុខ សុវណ្ណ

ចុចអាន៖ វៀតណាម នឹងរំលាយចោលក្រសួងចំនួន ៥