កម្ពុជារំពឹងថាទុនបម្រុងអន្ត​រជាតិនឹងកើនឡើងដល់ជាង២៤ពាន់លានដុល្លារក្នុងឆ្នាំ២០២៥នេះ

ស្របពេលដែលស្ថានភាពសេដ្ឋកិច្ច​កម្ពុជាកាន់តែមានភាពប្រសើរឡើងបណ្តើរៗ រដ្ឋាភិបាល​បានរំពឹងថាទុនបម្រុងអន្តរជាតិសរុប (International Foreign Reserve) នឹងបន្ត​កើនឡើងដល់ ២៤,​៤២៣ ពាន់លានដុល្លារក្នុងឆ្នាំ២០២៥ និងធានាការនាំចូលបាន៧,​៥ខែ ដោយកើនឡើងពី២២,៥ ពាន់លានដុល្លារកាលពីដំណាច់ឆ្នាំ២០២៤កន្លងទៅនេះ។

ក្រសួងសេដ្ឋកិច្ច​ និងហិរញ្ញវត្ថុ​បានធ្វើការព្យាករណ៍ថា​ទុនបម្រុងអន្តរជាតិសរុប​របស់​កម្ពុជា​នឹងបន្ត​កើនឡើងដល់ ២៤,​៤២៣ ពាន់លានដុល្លារក្នុងឆ្នាំ២០២៥ និងធានាការនាំចូលបាន៧,​៥ខែ ដោយសារតែស្ថានភាពល្អ​ប្រសើរនៃសេដ្ឋកិច្ច។

លោកបណ្ឌិត ហុង វណ្ឌៈ សេដ្ឋកិច្ចវិទូនៃរាជបណ្ឌិត្យ​សភាកម្ពុជា បានថ្លែងមកកាន់កម្ពុជាថ្មីថា ទុនបម្រុងអន្តរជាតិគឺជាប្រាក់ដែលរដ្ឋាភិបាលនៃប្រទេសនិមួយៗតម្កល់ទុកសម្រាប់ប្រើប្រាស់នៅពេលប្រទេសជួបវិបត្តិអ្វីមួយ ដោយរដ្ឋាភិបាលនៃប្រទេសទាំងនោះនឹងធ្វើ​ការដកទុន​បម្រុងអន្តរជាតិនេះទៅចំណាយលើការទិញម្ហូបអាហារ ប្រេងឥន្ធនៈ និងសំភារៈចំបាច់​នានាដើម្បីរក្សាបាននូវស្ថេរភាពសេដ្ឋកិច្ច និងសង្គមរបស់ពួកគេ។

លោកបានមានប្រសាសន៍ថា ៖«តាមអ្វីដែលរដ្ឋាភិបាលបង្កើននូវទុនបម្រុងអន្តរជាតិនេះ ឆ្លុះបញ្ចាំងអំពីភាពកាន់តែប្រ​សើរលើងនៃសេដ្ឋកិច្ច​។ យើងត្រូវដឹងថា ទុនបម្រុងអន្តរជាតិ​គឺសំខាន់ណាស់សម្រាប់រដ្ឋាភិបាលនៃប្រទេសទាំងអស់ដើម្បីទុកយកទៅប្រើប្រាស់ក្នុងរយៈ ពេលខ្លី និងបន្ទាន់ណាមួយនៅពេលប្រទេសជួបនូវវិបត្តិនានា ដូចជាគ្រោះធម្មជាតិ វិបត្តិសេដ្ឋកិច្ច ការកើនឡើងខ្ពស់នៃអតិផរណា និងជំងឺរីករាលដាលនានាជាដើម»។ 

លោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា បានថ្លែងនៅក្នុងកម្ម​វិធី​សន្និ​បាត​ប្រចាំឆ្នាំរបស់ខ្លួនកាលពីសប្តាហ៍មុនថា ក្នុងឆ្នាំ២០២៤កន្លងទៅនេះ សេដ្ឋកិច្ចកម្ពុជា​សម្រេច​បានក្នុងអត្រា ៦% ​។  ទន្ទឹមនេះ អតិផរណាជាមធ្យមមានកម្រិតត្រឹម ០,៨% នាឆ្នាំ២០២៤ ដោយ​សារការ​​ធ្លាក់ថ្លៃប្រេងឥន្ធនៈ ​ម្ហូបអាហារ ស្របពេលដែលទំនិញនិងសេវាផ្សេងៗទៀតឡើងថ្លៃយឺត។ លើសពីនេះ ការរក្សាបាន​ស្ថិរភាពតម្លៃប្រាក់រៀល​ក៏បានរួមចំណែកក្នុងការរក្សាស្ថិរភាពថ្លៃទំនិញ និងសេវាទូទៅលើទីផ្សារផងដែរ។

ខណៈ អត្រាប្តូរប្រាក់មានកម្រិតជាមធ្យម ៤.០៧១ រៀល​​​ក្នុងមួយដុល្លារ​​អាមេរិក ដោយបានឡើងថ្លៃប្រមាណ ០,៩% ធៀបនឹងឆ្នាំ២០២៣ ដែលធ្វើឱ្យអត្រាប្តូរប្រាក់វិលទៅរកកម្រិតមុនវិបត្តិកូវីដ-១៩ វិញ។

លោកស្រីថា៖«​ ស្ថិរភាពម៉ាក្រូសេដ្ឋកិច្ចនិងការគ្រប់គ្រងទុនបម្រុងអន្តរជាតិប្រកបដោយ​ប្រសិទ្ធភាព បានរួមចំណែកបង្កើនទុនបម្រុងអន្តរជាតិ ដល់ ២២,៥ ប៊ីលានដុល្លារអាមេរិក ពោលគឺកើនឡើង ១២,៦% ធៀបនឹងឆ្នាំ២០២៣។ កម្រិតទុនបម្រុងអន្តរជាតិរបស់កម្ពុជា ត្រូវបានបន្តចាត់ទុកថាមានកម្រិតខ្ពស់សមស្រប ដែលស្មើនឹងប្រមាណ ៧ខែ នៃការនាំចូលទំនិញនិងសេវាសម្រាប់គ្រាបន្ទាប់»៕