ពលរដ្ឋក្នុងក្រុងដូនកែវ ស្នើអាជ្ញាធរផ្លាស់ប្ដូរទីតាំងចាក់សំរាមចេញ ព្រោះប៉ះពាល់ការរស់នៅខ្លាំង

ដោយអត់ទ្រាំក្លិនចេញពីគំនរសំរាម និងផ្សែងដុតសំរាមជាច្រេីនឆ្នាំមកហើយ ប្រជាពលរដ្ឋប្រមាណជិត៣០០គ្រួសាររស់នៅភូមិ៣ សង្កាត់រកាក្រៅ ក្រុងដូនកែវ ខេត្តតាកែវ បាននាំគ្នាតវ៉ាសុំអាជ្ញាធរអន្តរាគមន៍ទីលានចាក់សំរាមនៅជាយក្រុងដូនកែវ មួយកន្លែង ដែលត្រូវបានគេស្គាល់ថា ម្ចាស់សេវាករឈ្មោះលោកស្រី លឹម សុខា ។

ប្រជាពលរដ្ឋលេីកឡេីងថា ពួកគាត់បានស្នើសុំទៅអាជ្ញាធរក្រុងផ្លាស់ប្តូរទីតាំងមានទាំងផ្តិតមេដៃតាំងពីដេីមឆ្នាំ២០២៣​មកម្លេះ តែរហូតមកដល់ពេលនេះ ជាង២ឆ្នាំមកហើយនៅតែគ្មានវិធានការទៅតាមការស្នើសុំរបស់ពួកគាត់។ តាមការបញ្ជាក់ពីលោក ឆឹង គឹមឈន តំណាងប្រជាពលរដ្ឋ បានឱ្យដឹងថា ទីលានចាក់សំរាមរបស់លោកស្រី លឹម សុខា កំពុងបង្កផលប៉ះពាល់ខ្លាំងណាស់ដល់ប្រជាពលរដ្ឋ ព្រះសង្ឃ បណ្ដាលមកពីក្លិននៃការដុតគំនរសំរាមដោយគ្មានឡសម្រាប់​ដុតត្រឹមត្រូវ។ ពិសេសពេលដុតសំរាមម្ដងៗ ប្រជាពលរដ្ឋមិនអាចនៅផ្ទះទេបាន ព្រោះផ្សែងភ្លើងបានហុយប៉ះពាល់ដល់លំនៅឋាន។

តំណាងប្រជាពលរដ្ឋដដែល សុំស្នើដល់អាជ្ញាធរក្រុងពិសេសលោក វុី សំណាង អភិបាលខេត្តតាកែវ ជួយអន្តរាគមន៍ជាមួយម្ចាស់ទីលានចាក់សំរាម ខាងលេីនេះផង ព្រោះពួកគាត់ទទួលរងផលប៉ះពាល់ជាច្រេីនឆ្នាំមកហើយ គឺសុំឱ្យធ្វេីការផ្លាស់ប្តូរទីតាំង។

ដោយឡែកចំពោះទីតាំងចាក់សំរាមនេះ លោក កង អាណាន់ អភិបាលក្រុងដូនកែវ បានឱ្យដឹងនៅព្រឹកថ្ងៃទី២៨ ខែមីនា ឆ្នាំ២០២៥ នេះថា លោកបានស្នេីសុំទៅក្រសួងពាក់ព័ន្ធដេីម្បីផ្លាស់ប្តូរទីតាំងហេីយ តែមិនទាន់រកទីតាំងថ្មីបាន៕

អត្ថបទ៖ វីរៈ