អាជ្ញាធរ​ថៃ​ព្រមានពីភ្លៀងធ្លាក់ខ្លាំង និងទឹកជំនន់​​នៅភាគខាងត្បូងប្រទេស​

ប្រជាជននៅក្នុងខេត្តភាគខាងត្បូង​នៃ​ប្រទេសថៃ ត្រូវបានព្រមានអំពីភ្លៀងធ្លាក់ខ្លាំងដែលចាប់ផ្តើមពីថ្ងៃពុធនេះរហូតដល់ថ្ងៃសុក្រ ជាមួយនឹងហានិភ័យនៃទឹកជំនន់ភ្លាមៗ។ នេះបើយោងតាមការចេញផ្សាយរបស់សារព័ត៌មាន Bangkok Post នៅថ្ងៃទី០២ខែមេសានេះ។

ក្រសួងឧតុនិយម​របស់​ព្រះរាជាណាចក្រ​ថៃ បានរាយការណ៍នៅថ្ងៃពុធនេះថា ខ្យល់បក់ពីទិសខាងកើតដែលផ្លាស់ទីកាត់ឈូងសមុទ្រថៃ ភាគខាងត្បូង និងសមុទ្រ Andaman កំពុងនាំមកនូវភ្លៀងធ្លាក់បន្ថែមទៀតដល់ខេត្តភាគខាងត្បូង។

ខេត្តនៅ​ភាគខាងត្បូង​​ចំនួន​១៦​ដែលរង​កា​រព្រមាន​ដោយផ្ទាល់ រួម​មាន​ ខេត្ត​ Prachuap Khiri Khan, Chumphon, Surat Thani, Nakhon Si Thammarat, Phatthalung, Songkhla, Pattani, Yala, Narathiwat, Phang Nga, Krabi, Trang, Satun, Phetchaburi, Ranong និង Phuket។

ក្រសួងព្រមានថាប្រជាពលរដ្ឋ​ត្រូវ​ប្រុងប្រយ័ត្ន​ចំពោះ​ភ្លៀង​ធ្លាក់​ខ្លាំង​ ដែល​អាច​បង្ក​ជា​ជំនន់​នៅ​តំបន់​ភ្នំ​។ ចំណែករលកនៅឈូងសមុទ្រត្រូវបានគេរំពឹងថានឹងកាន់តែខ្លាំង ដែលមានកម្ពស់ប្រហែល២ម៉ែត្រ និងច្រើនជាងនេះក្នុងអំឡុងពេលមានផ្គររន្ទះ។ ទូក​តូចៗ​ត្រូវ​បាន​ព្រមាន​ឱ្យ​ថតនៅ​លើ​ច្រាំង។

ប្រទេស​ថៃ​​ជារឿយៗ​បានរងនូវផ្ដល់ប៉ះពាល់ជាច្រើនពីគ្រោះធម្មជាតិ ដូចជា រលកកម្ដៅខ្ពស់,ភ្លៀងធ្លាក់ខ្លាំង, ខ្យល់ពុល ,ភ្លើងឆេះព្រៃដែលកំពុងតែបន្តរាលដាលនៅខេត្តឈៀងម៉ៃ និងគ្រោះរញ្ជួយដីកាលពីថ្ងៃទី២៨ខែមីនាដែលបណ្ដាលឲ្យមានអ្នករងរបួសចំនួន៣៤នាក់ និងអ្នកស្លាប់ចំនួន ២២ នាក់នៅក្នុងរាជធានី គិតត្រឹមម៉ោង៤រសៀលថ្ងៃអង្គារ។ ក្នុង​នោះ​អគារ​ការិយាល័យ​សវនកម្ម​រដ្ឋ​ដែល​បាក់រលំ​មាន​អ្នក​របួស ១៩ នាក់ និង​អ្នក​ស្លាប់១៤នាក់​៕

អត្ថបទ៖ ប៊ុន សុភាព