ព័ត៌មានជាតិ

លោក យឹម លាត៖ ការចូលរួមរបស់ក្រសួង-ស្ថាប័ន ចាំបាច់ក្នុងការជំរុញការប្រើប្រាស់ប្រាក់រៀល

បានផុស

១ year មុន

នៅ

ថ្ងៃចន្ទ ៥ ឧសភា ២០២៥

ដោយ

ទេសាភិបាលរង ធនាគារជាតិនៃកម្ពុជា លោក យឹម លាត បានថ្លែងថា ការចូលរួម និងកិច្ចសហការរបស់ក្រសួង-ស្ថាប័នទាំងអស់ គឺពិតជាមានភាពចាំបាច់បំផុត ក្នុងការជំរុញការលើកកម្ពស់ការប្រើប្រាស់ប្រាក់រៀលរបស់ប្រជាពលរដ្ឋនៅក្នុងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសិក្ខាសាលាផ្សព្វផ្សាយ ស្តីពី “ប្រាក់រៀល ប្រព័ន្ធបាគង និងខេអេចឃ្យូអរ” កាលពីពេលថ្មីៗកន្លងទៅនេះលោក យឹម លាត មានប្រសាសន៍ថា ក្នុងស្មារតីរួមគ្នាលើកកម្ពស់ប្រាក់រៀល ថ្មីៗនេះ ធនាគារជាតិនៃកម្ពុជា បាននិងកំពុងសិក្សាស្រាវជ្រាវជាមួយរដ្ឋសភាកម្ពុជា ស្តីពី តួនាទីរបស់ភាគីពាក់ព័ន្ធក្នុងការលើកកម្ពស់ប្រាក់រៀល។

លោកបានលើកឡើងថា៖«បច្ចុប្បន្ន ការប្រើប្រាស់ប្រាក់ដុល្លារអាមេរិកនឹងមិនងាយថយចុះនោះទេ ប្រសិនបើមិនមានការចូលរួមជំរុញការប្រើប្រាស់ប្រាក់រៀល ឱ្យបានស្រុះគ្នាពីគ្រប់ភាគីទាំងអស់ ព្រោះប្រាក់ដុល្លារអាមេរិកត្រូវបានប្រើប្រាស់យ៉ាងច្រើននៅស្ទើរគ្រប់វិស័យទាំងអស់ ដែលបានបង្កើតជាបណ្តាញនៃការប្រើប្រាស់ប្រាក់ដុល្លារយ៉ាងរឹងមាំ»។

ហេតុដូចនេះ «ការចូលរួម និងកិច្ចសហការក្នុងចំណោមក្រសួង-ស្ថាប័នទាំងអស់ ពិតជាមានភាពចាំបាច់ ក្នុងការជំរុញការលើកកម្ពស់ការប្រើប្រាស់ប្រាក់រៀល តាមរយៈការបើកប្រាក់ខែ ការកំណត់ថ្លៃ និងដាក់តាំងស្លាកតម្លៃទំនិញ និងសេវា ការជំរុញការប្រើប្រាស់ប្រាក់រៀលជារូបិយប័ណ្ណចម្បងនៅក្នុងការកត់ត្រាបញ្ជីគណនេយ្យ និងការតាមដានវឌ្ឍនភាពនៃការប្រើប្រាស់ប្រាក់រៀលនៅតាមវិស័យនីមួយៗ ជាដើម»។ លោក យឹម លាត បន្ថែមបែបនេះ។

ជាមួយគ្នានេះ ក្នុងនាមទេសាភិបាលរងធនាគារជាតិ លោក យឹម លាត ក៏បានអំពាវនាវក្រសួង-ស្ថាប័ន រោងចក្រ ក្រុមហ៊ុន-សហគ្រាស គ្រឹះស្ថានធនាគារ និងហិរញ្ញវត្ថុ ជាពិសេសប្រជាពលរដ្ឋទូទៅ បន្តចូលរួមប្រើប្រាស់ប្រាក់រៀលឱ្យបានកាន់តែទូលំទូលាយ ទាំងការទូទាត់ជាប្រាក់រៀល ការបិទស្លាកថ្លៃទំនិញជាប្រាក់រៀល និងការសន្សំជាប្រាក់រៀល និងត្រូវផ្តក់ការអនុគ្រោះឱ្យបានកាន់តែច្រើនចំពោះការប្រើប្រាស់ប្រាក់រៀលជារបស់ជាតិ ដោយកុំគិតកន្ទុយ ឬយកកម្រៃសេវាបន្ថែមសម្រាប់អ្នកប្រើប្រាស់ប្រាក់រៀល៕