កម្ពុជា-រវ៉ាន់ដា ​ប្រកាស​សហការ​លើ​ប្រព័ន្ធ​ទូទាត់​ឆ្លងដែន​

ធនាគារជាតិនៃកម្ពុជា ​និងធនាគារកណ្តាលរវ៉ាន់ដា​ នៅថ្ងៃទី ២៩ ឧសភា ២០២៦ ​បានប្រកាសពីកិច្ចសហប្រតិបត្តិការ​ លើប្រព័ន្ធទូទាត់ឆ្លងដែន សំដៅធ្វើទំនើបកម្មប្រព័ន្ធ​ទូទាត់​សងប្រាក់ និងការលើកកម្ពស់ការតភ្ជាប់ផ្នែកហិរញ្ញវត្ថុ ដើម្បី​ជួយពង្រឹងទំនាក់ទំនងសេដ្ឋកិច្ច ពាណិជ្ជកម្ម និងទេសចរណ៍។

​កិច្ចសហការនេះបង្ហាញពីការប្តេជ្ញាចិត្តរួមគ្នារវាងធនាគារកណ្តាលទាំងពីរ​ ក្នុងការធ្វើទំនើបកម្មប្រព័ន្ធ​ទូទាត់​សងប្រាក់ និងការលើកកម្ពស់ការតភ្ជាប់ផ្នែកហិរញ្ញវត្ថុឱ្យកាន់តែទូលំទូលាយ ដើម្បីជួយពង្រឹងទំនាក់ទំនងសេដ្ឋកិច្ច ពាណិជ្ជកម្ម និងទេសចរណ៍ រវាងប្រទេសកម្ពុជា និងប្រទេសរវ៉ាន់ដា។

គំនិត​ផ្តួចផ្តើមនេះក៏គាំទ្រដំណើរការសមាហរណកម្មហិរញ្ញវត្ថុក្នុងតំបន់ និងអន្តរជាតិផងដែរ តាម​រយៈការរួមចំណែកលើកកម្ពស់លទ្ធភាព និងប្រសិទ្ធភាពនៃការប្រើប្រាស់សេវាទូទាត់អេឡិចត្រូនិក សម្រាប់ប្រជាពលរដ្ឋនៃប្រទេសទាំងពីរ ដែលជាការទាញយកផលប្រយោជន៍​ពីការរីកចម្រើន​ផ្នែក​បច្ចេក​វិទ្យា ​និងនវានុវត្តន៍ឌីជីថល ​ក្នុងក្របខ័ណ្ឌភាពជាដៃគូនេះ។

កិច្ចសហប្រតិបត្តិការនេះនឹងត្រូវបានអនុវត្តក្នុងក្របខ័ណ្ឌនៃអនុស្សរណៈយោគយល់ស្តីពី​ «កិច្ចសហ​ប្រតិបត្តិការក្នុងផ្នែកផ្សេងៗនៃការអភិវឌ្ឍវិស័យហិរញ្ញវត្ថុ» រវាងធនាគារជាតិនៃកម្ពុជា និងធនាគារ​កណ្តាល​រវ៉ាន់ដា ដែលត្រូវបានចុះហត្ថលេ​ខា​កាលពីថ្ងៃទី១៤ មេសា ឆ្នាំ២០២៣ នៅ រដ្ឋ​ធានី​វ៉ាស៊ីនតោន​ឌីស៊ី សហរដ្ឋអាមេរិក។ ​

​អនុស្សរណៈយោគយល់គ្នានេះគឺជាមូលដ្ឋាននៃ ក្របខ័ណ្ឌសម្រាប់ពង្រឹងកិច្ចសហប្រតិបត្តិការ​តាម​រយៈ​ការផ្លាស់ប្តូរចំណេះដឹង និងគោលដៅជំរុញការអភិវឌ្ឍវិស័យហិរញ្ញវត្ថុ នៃប្រទេសទាំងពីរ៕