ព័ត៌មានជាតិ

មន្ត្រីជាន់ខ្ពស់មន្ទីរពេទ្យកាល់ម៉ែតច្រានចោលសម្លេងតៗគ្នាថា ពេទ្យមានផ្ទុះកូវីដ១៩ រហូតឈានដល់ការបិទពេទ្យ

បានផុស

៥ years មុន

នៅ

ថ្ងៃចន្ទ ២៩ មីនា ២០២១

ដោយ

ភ្នំពេញ ៖ នាព្រឹកថ្ងៃទី២៩ ខែមីនា មន្ត្រីជាន់ខ្ពស់នៃមន្ទីរពេទ្យកាល់ម៉ែត បានធ្វើការច្រានចោលនូវសម្លេងតៗមួយ ដែលនិយាយថា មន្ទីរពេទ្យកាល់ម៉ែតបានផ្ទុះកូវីដ១៩ រហូតឈានដល់ការបិទពេទ្យ ហើយថែមទាំងប្រាប់តៗគ្នាកុំឲ្យមកម្តុំពេទ្យកាល់ម៉ែតទៀតផង។

លោកវេជ្ជបណ្ឌិត ម៉ៅ រ៉ាសី ប្រធានរដ្ឋបាលមន្ទីរពេទ្យកាល់ម៉ែត បញ្ជាក់ថា សារជាសម្លេងនេះ កំពុងធ្វើឲ្យមានការភាន់ច្រឡំ និងចែករំលែកតៗគ្នា និងពេលនេះ មន្ទីរពេទ្យកំពុងប្តឹងទៅមន្ត្រីជំនាញ ដើម្បីរកម្ចាស់សម្លេងដែលបំផុសរឿងនេះ យកមកផ្តន្ទាទោសតាមផ្លូវច្បាប់។

សារជាសម្លេងមួយជិត១នាទី ដែលជាសម្លេងមនុស្សប្រុស បាននិយាយថា «អ្នកធ្វើការនៅកាល់ម៉ែតផ្ទុះកូវីដ១៩ហើយ ឥលូវថ្នាក់ដឹកនាំកំពុងស្វែងរកអ្នកធ្វើការនៅកាល់ម៉ែត្រ និងកំពុងស្រាវជ្រាវ ហើយសូមបងប្អូននៅភ្នំពេញកុំទៅប្លុកនោះ ហើយបើអ្នកជាប់ពាក់ព័ន្ធ ធ្លាប់ទៅកាល់ម៉ែតសូមធ្វើចត្តាឡីស័កនៅផ្ទះ១៤»។

លោកវេជ្ជបណ្ឌិត ម៉ៅ រ៉ាសី ប្រធានរដ្ឋបាលមន្ទីរពេទ្យកាល់ម៉ែត បន្ថែមថា នៅព្រឹកថ្ងៃនេះ មន្ទីរពេទ្យនឹងចេញជាប្រកាសព័ត៌មានមួយដើម្បីកុំឲ្យមាន ការយល់ច្រឡំ និងបញ្ជាក់ថា សារជាសម្លេងនេះមិនពិតនោះទេ គឺមន្ទីរពេទ្យនៅធ្វើការទទួលអ្នកជំងឺដដែល៕

ប្រភព ៖ នាយកដ្ឋានក្រសួងព័ត៌មានក្រសួងការពារជាតិ

កែសម្រួលដោយ ៖ នាគព័ន្ធ