ថៃ ឆ្លងរាលដាលកូវីដប្រភេទថ្មី XFG ស្របពេលប្រជាជនកំពុងរងទុក្ខដោយទឹកជំនន់ 

ប្រទេសថៃបានរកឃើញវីរុសកូវីដ១៩បំប្លែងខ្លួនថ្មី XFG ដែលអ្នកវិទ្យាសាស្រ្តអះអាងថា បង្កការចម្លងលឿនជាងប្រភេទមុនៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Thaiger, គិតត្រឹមថ្ងៃព្រហស្បតិ៍ទី២ខែតុលា ការឆ្លងវីរុស XFG សរុបកើនឡើងដល់៣៣ករណីហើយ ដែលនេះជាការបន្ថែមបន្ទុកមួយកម្រិតទៀតដល់ថៃ ដើម្បីប្រយុទ្ធប្រឆាំងនឹងសមរភូមិសុខភាពនេះ ស្របពេលប្រជាជនខ្លួនកំពុងរងទុក្ខដោយសារគ្រោះធម្មជាតិដ៏កាចសាហាវ ស្រាប់ហើយ។

យោងតាមអង្គការសុខភាពពិភពលោក (WHO), វីរុសកូវីដបំប្លែងខ្លួន XFG ដែលគេឲ្យឈ្មោះហៅក្រៅថា Stratus បានវាយលុកខ្លាំងរួចទៅហើយនៅតាមបណ្តាប្រទេសចំនួន៣៨រួមទាំងក្នុងសហរដ្ឋអាមេរិក និងតំបន់អឺរ៉ុបផងដែរ។

XFG មានសមត្ថភាព គេចផុតពីខែលការពារនៃប្រព័ន្ធភាពស៊ាំ របស់មនុស្សមួយផ្នែក មានន័យថា អង្គបដិប្រាណដែលទទួលបានពីការចាក់វ៉ាក់សាំងឬការឆ្លងពីមុន ប្រហែលមិនអាចទប់ស្កាត់វីរុស XFG បានទាំងស្រុងទេ។ យ៉ាងណា វាមិនបង្កឲ្យអ្នកឆ្លងធ្លាក់ខ្លួនឈឺធ្ងន់ ឬឈានដល់បាត់បង់ជីវិតឡើយ។

មិនខុសពីកូវីដធម្មតាទេ រោគសញ្ញារបស់XFG មានដូចជា៖

• ក្តៅខ្លួន, រងា (ញាក់)
• ឈឺបំពង់ក
• ហៀរសំបោរ
• ឈឺក្បាល
• អស់កម្លាំង, ហេវហត់
• ចង្អោរ និង ក្អួត
• ឈឺសាច់ដុំ និង ឈឺខ្លួន
• ពិបាកដកដង្ហើម
• បាត់បង់រសជាតិ និង ក្លិន
• រាគ

អត្ថបទ៖ សុខ សុវណ្ណ

ចុចអាន៖ ការពារខ្លួន! មួយថ្ងៃ ថៃ រកឃើញអ្នកឆ្លងកូវីដ ជាង ១៨ ០០០ករណី