ARDB ចង់បង្កើនទុនកម្ចីឱ្យបានលើស ១០០០ លានដុល្លារ

លោក កៅ ថាច អគ្គនាយក​ធនាគារអភិវឌ្ឍន៍​ជនបទ​ និង​កសិកម្ម (ARDB) ចង់បង្កើនទុន​កម្ចី​ឱ្យ​លើស ៥០០ លានដុល្លារ រហូតដល់ ១ ពាន់លានដុល្លារ ឬ ​២ ពាន់លានដុល្លារ ដើម្បីបំពេញតម្រូវការហិរញ្ញវត្ថុក្នុងវិស័យកសិកម្ម។

លោក កៅ ថាច បានលើកឡើងក្នុងកិច្ចប្រជុំជាមួយបុគ្គលិកប្រចាំឆមាសទី១​ឆ្នាំ២០២៥ ​នៃធនា​គារ​​អភិវឌ្ឍន៍ជនបទ និងកសិកម្ម នៅព្រឹកថ្ងៃទី ០៤ ខែកក្កដា ឆ្នាំ ២០២៥។

គិតត្រឹមឆមាសទី ១ ឆ្នាំ ២០២៤ ធនាគារអភិវឌ្ឍន៍ជនបទ ​និងកសិកម្ម(ARDB) បានផ្តល់​ឥណ​ទាន ប្រមាណ ៤៤០ លានដុល្លារ​ លើវិស័យកសិកម្ម​ ដើម្បី​ផ្តល់​លទ្ធភាព​បន្ថែម​ដល់អ្នក​ផលិត​និងប្រជាកសិករដើម្បីបង្កើនផលិតកម្ម និងជំរុញ​ការនាំចេញ។

លោក កៅ​ ថាច អគ្គនាយក​ ARDB បានឱ្យដឹងកាលពីពេលថ្មីៗនេះថា​ ដោយមើលឃើញពី​តម្រូវ​ការផ្នែកហិរញ្ញវត្ថុលើវិស័យកសិកម្ម រាជរដ្ឋាភិបាល​តាមរយៈក្រសួងសេដ្ឋកិច្ច និងហិរញ្ញវត្ថុ​បានផ្តល់នូវកញ្ចប់ហិរញ្ញប្បទានជាបន្តបន្ទាប់ដល់ធនាគារអភិវឌ្ឍន៍ជនបទ​ និងកសិកម្ម​ក្នុងការ​ផ្តល់​ឥណទានទៅលើវិស័យនេះសំដៅជួយជំរុញផលិតកម្ម​ និងការនាំចេញ​កសិផល​ទៅកាន់​ទីផ្សារអន្តរជាតិឱ្យកាន់តែច្រើន។

នៅក្នុងឆ្នាំ ២០២៤ កម្ពុជាទទួលបានចំណូលជាង ៥,៣ពាន់លានដុល្លារ ពីការនាំចេញ​កសិ​ផល ប្រមាណ ១២លាន​តោន ទៅកាន់ ៩៥ប្រទេស កើនឡើងជាង ៣លានតោន ធៀប​នឹង​ឆ្នាំ ២០២៣។

យោងតាមក្រសួងកសិកម្ម អនុវិស័យដំណាំ បានចូល​រួម​ធំជាងគេនៅក្នុងវិស័យ​កសិកម្ម​ទាំង​មូល​ រហូតដល់ ៦១% ក្នុងឆ្នាំ ២០២៤ សម្រេច​បាន​ផលិតកម្មចំនួន ៣៩,៤ លានតោន កើន​ឡើង ២,៥៩ លានតោន ធៀបនឹងឆ្នាំ ២០២៣៕