ធនាគារ ​ARDB ​ចាប់ដៃជាមួយ GCF គ្រោង​បញ្ចេញឥណទានបៃតង ៣០ លានដុល្លារ​

ធនាគារអភិវឌ្ឍន៍ជនបទ ​និង​កសិកម្ម ​(ARDB) ​ចាប់ដៃជាមួយ​មូលនិធិអាកាសធាតុបៃតង​ (GCF) ​គ្រោងផ្ដល់ហិរញ្ញប្បទានបៃតងទំហំ​ ៣០ លានដុល្លារ ​នៅដំណាក់កាលដំបូង​ទៅលើធុរកិច្ចបៃតង ​ដើម្បី​ចូលរួមចំណែកដល់ការប្រែប្រួលអាកាសធាតុ​ និងជំរុញការអភិវឌ្ឍ​សេដ្ឋកិច្ច​បៃតង​នៅកម្ពុជា។ ​

​អគ្គនាយកនៃធនារគារ​អភិវឌ្ឍន៍ជនបទ និងកសិកម្ម (ARDB) លោក កៅ ថាច ​បានប្រាប់ឱ្យដឹងថា ARDB ​ទើប​បញ្ចប់កិច្ចព្រមព្រៀងជាមួយ​មូលនិធិអាកាសធាតុបៃតង​(GCF) ក្នុងការ​ផ្ដល់​ហិរញ្ញប្បទាន​បៃតងទំហំ​ ៣០ លានដុល្លារ។​

​ហិរញ្ញប្បទានបៃតង ​ពាក់ព័ន្ធនឹង​ ធុរកិច្ចបៃតង កសិកម្មចីរភាព ថាមពលព្រះអាទិត្យ ខណៈ ARDB បានផ្ដល់បញ្ចេញឥណទានបៃតងប្រមាណ ៤% នៃទំហំទ្រព្យសកម្មសរុបរបស់ធនាគារ។​

​ធនាគារ ARDB គឺជាធនាគារគោលនយោបាយ ​បានទទួលហិរញ្ញប្បទានពីរាជរដ្ឋាភិបាល ក្រោមកិច្ច​អន្តរាគមន៍នៃកម្មវិធីហិរញ្ញប្បទានពិសេស ដើម្បីគាំទ្រដល់គ្រប់តួអង្គក្នុង​ខ្សែច្រវាក់​ជលិតកម្ម កសិកម្ម និងកសិ-ឧស្សាហកម្ម ដើម្បីផ្តល់​ហិរញ្ញប្បទានក្នុងអត្រាការប្រាក់ទាប ជាវិនិយោគ និងទុនបង្វិល ដល់សហគ្រាសធុនតូច និងមធ្យម រួមមាន៖ ស្រូវ-អង្គ, បន្លែ-ផ្លែឈើឈើ, ការចិញ្ចឹមសត្វ និងវារីវប្បកម្ម ក្នុងគោលដៅបង្កើតការងារ ពង្រឹងភាពប្រកួតប្រជែង និងពង្រីកមូលដ្ឋានផលិត​កម្មក្នុងស្រុក និងជំរុញការនាំចេញ៕​

អត្ថបទ៖ ឡេង ដេត