យោធាមីយ៉ាន់ម៉ា ដណ្តើមបានក្រុងសំខាន់មួយមកវិញក្រោយប្រយុទ្ធគ្នាជាមួយក្រុមឧទ្ទាមជិតមួយឆ្នាំ

យោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី១៨ខែកក្កដា យោធាមីយ៉ាន់ម៉ាបានវាយដណ្ដើមកាន់កាប់ក្រុង Nawnghkio មកវិញ ដែលជាតំបន់ច្រកទ្វារសំខាន់ក្នុងរដ្ឋ Shan ពីកងទ័ពរំដោះជាតិ Ta’ang (TNLA) បន្ទាប់ពីមានការប្រយុទ្ធគ្នាយ៉ាងសាហាវរយៈពេលជិត១១ ខែ។

ក្រុងដែលដណ្ដើមបាននេះស្ថិតនៅលើផ្លូវពាណិជ្ជកម្មដ៏សំខាន់មួយទៅកាន់ប្រទេសចិន និងនៅជិតមូលដ្ឋានយោធាដ៏ធំមួយនៅក្នុងទីប្រជុំជន Pyin Oo Lwin ។ វាត្រូវបានគ្រប់គ្រងដោយ TNLA ចាប់តាំងពីខែកក្កដាឆ្នាំ ២០២៣មកម្លេះ ។ យោងថាបានចាប់ផ្ដើមដណ្តើមយកក្រុង Nawnghkio មកវិញ ពីព្រោះ TNLA បដិសេធមិនព្រមចាកចេញ ក្នុងអំឡុងពេលកិច្ចចរចាសន្តិភាពដែលធ្វើឡើងនៅក្នុងប្រទេសចិនកាលពីខែមេសា។

បើតាមយោធាមីយ៉ាន់ម៉ា មានការប្រយុទ្ធគ្នាជាង ៥០០ដងក្នុងអំឡុងពេលប្រតិបត្តិការ ដែលបានសម្លាប់អ្នកប្រយុទ្ធរបស់ TNLA ១៧១ នាក់ និងនាំទៅដល់ការចាប់យកអាវុធរបស់ពួកគេ។ ឥឡូវ​នេះ យោធា​គ្រោង​នឹង​ជួសជុល​រដ្ឋាភិបាល​ក្រុង ដក​មីន​ចេញ និង​ជួយ​ប្រជាជន​ដែល​ភៀស​ខ្លួន​ត្រឡប់មកផ្ទះពួកគេ​វិញ។

ចំណែកបើតាមTNLA បាន​និយាយ​ថា ខ្លួន​បាន​រើ​ការិយាល័យ​របស់​ខ្លួន​ដោយ​សារ​ការ​វាយ​ប្រហារ​ដោយ​យោធា​ខ្លាំង ប៉ុន្តែ​មិន​បាន​និយាយ​អ្វី​អំពី​ការ​បាត់​បង់ក្រុង Nawnghkio​នោះ​ទេ។

គួរបញ្ជាក់ថានេះគឺជាជ័យជម្នះមួយរបស់យោធា ដែលភាគច្រើនបាននិងកំពុងការពារខ្លួនចាប់តាំងពីសម្ព័ន្ធភាពបងប្អូនទាំងបីរួមមានកងទ័ព Arakan (AA) កងទ័ពសម្ព័ន្ធប្រជាធិបតេយ្យជាតិមីយ៉ាន់ម៉ា (MNDAA) និង កងទ័ពរំដោះជាតិTa’ang (TNLA) បានរួមដៃគ្នាធ្វើការវាយប្រហារដ៏ធំនៅចុងឆ្នាំ២០២៣។ ថ្មីៗនេះ កងទ័ពក៏បានដណ្តើមយកក្រុងមួយទៀតគឺ Mobye នៅភាគខាងត្បូងរដ្ឋ Shan ផងដែរ។

មីយ៉ាន់ម៉ានៅតែជាប់គាំងដោយសង្រ្គាមស៊ីវិល ចាប់តាំងពីរដ្ឋប្រហារយោធាក្នុងឆ្នាំ ២០២១ ហើយក្រុមអ្នកប្រឆាំងបាននិយាយថា យោធាកំពុងព្យាយាមដណ្តើមយកទឹកដីឡើងវិញមុនការបោះឆ្នោតសកលដែលបានគ្រោងទុក ខណៈការបោះឆ្នោតនេះត្រូវបានរិះគន់យ៉ាងទូលំទូលាយថាជាការប៉ុនប៉ងធ្វើឱ្យការគ្រប់គ្រងរបស់យោធាក្លាយជាស្របច្បាប់៕

អត្ថបទ៖ ប៊ុន សុភាព