កសិករ​ដាំ​ទុរេន​នៅ​ក្បែរ​ទឹក​ជ្រោះប៊ូ​ស្រា​ ចាប់ផ្ដើមប្រមូលផលបានបណ្តើរៗហើយ

កសិករ​ដាំទុរេន​តាម​បណ្ដា​តំបន់​មួយ​ចំនួន​ក្នុង​ប្រទេសកម្ពុជា ចាប់ផ្ដើមប្រមូលផល​តាម​ចំការ​រៀងៗខ្លួន រីឯ​កសិករ​ផ្សេងទៀត​ប្រមូល​ផល​ស្ទើរ​អស់​ពី​ចំការ​ទៅហើយ។

ប៉ុន្តែដោយឡែកសម្រាប់ដំណាំទុរេនមួយចំនួនក្នុងខេត្តមណ្ឌលគិរី ក្នុងចុងខែកក្កដានេះ ទើបតែចាប់ផ្តើមប្រមូលផលបណ្តើរៗប៉ុណ្ណោះ ។

កសិករមួយរូបមានឈ្មោះ លោក ទួន ប៊ុនណេង អាយុ៦០ឆ្នាំមានទីលំនៅបច្ចុប្បន្នភូមិពូទិលឃុំប៊ូស្រាស្រុកពេជ្រាដាខេត្តមណ្ឌលគិរីបានប្រាប់«កម្ពុជាថ្មី» ឱ្យ​ដឹង​ថា គាត់បានប្រកបរបរកសិកម្មដាំទុរេន នេះជាង៦ឆ្នាំកន្លងមកហើយ ហើយការ​ដាំដុះដំណាំទុរេនសរុបទៅលើផ្ទៃដី១០ហិកតាដែលមានចម្ងាយ៥០០ ម៉ែត្រប៉ុណ្ណោះពីរមណីយដ្ឋានទឹកជ្រោះប៊ូស្រា។

លោក​បាន​បន្ត​ថា ទុរេនដែលដាំដុះក្នុងចំការបច្ចុប្បន្ននេះមានពូជចំនួន៣ប្រភេទរួមមាន ម៉ានថង កាន់យ៉ាវ និងម៉ូសានឃីង ដែលទុរេនសុទ្ធសឹងតែ មានគុណភាពល្អរសជាតិឈ្ងុយឆ្ងាញ់ ។

លោកបានបន្ថែមថា ទុរេន​ដែល​ចាប់​ផ្ដើម​ប្រមូល​ផល​ដំបូង​នៅ​ក្នុង​ចំការ​របស់​គាត់​នៅ​ដើម​ដៃ​ខែកក្កដាក្នុងឆ្នាំនេះ​ជាប្រភេទ ម៉ូសានឃីង ដែលពូជប្រភេទនេះរាងស្រាលជាងពូជផ្សេង ហើយ​ជា​រៀងរាល់​ឆ្នាំ​តែង​តែ​ឱ្យ​ផល​មុន​គេ បើ​ធៀប​នឹង​ពូជ​ពីរ​ប្រភេទទៀត។ លោកបានបញ្ជាក់ថា ចាប់ពីចូលខែសីហា ចន្លោះចាប់ពីសប្ដាហ៍ទី៣តទៅ ឆ្នាំ២០២៥នេះ មានទុរេនពីរប្រភេទទៀតនឹងចាប់ផ្ដើមហុចផល ដល់ដើមដៃដំបូងផងដែរនោះរួមមាន ពូជកាន់យ៉ាវ និងពូជម៉ានថង ផងដែរសម្រាប់ចំការរបស់គាត់។

កសិកររូបនេះបានអះអាងថាទុរេន ដំណាំទុរេននៅក្នុងខេត្តមណ្ឌលគិរី រៀង​ឱ្យ​ផល​យឺត​ជាង​តំបន់​ផ្សេងបន្តិច បើ​ធៀប​នឹងតំបន់ខេត្តផ្សេងចន្លោះចាប់ពី៣០ថ្ងៃទៅ៤៥ថ្ងៃឯណោះ ដោយសារកត្តាអាកាសធាតុ ព្រោះខេត្តមណ្ឌលគិរី សម្បូរទៅដោយភ្នំទាបខ្ពស់ ហើយ​អាកាសធាតុក៏​ត្រជាក់ខ្លាំងជាងតំបន់ខេត្តផ្សេង ដូច្នេះធ្វើ​ឱ្យដំណាំមួយប្រភេទនេះ​ឱ្យ​ផល​ទាន់​ពេលវេលា។

ក្នុងនាមលោកជាកសិករដាំទុរេនមួយរូបនៅខេត្តមណ្ឌលគិរីក៏បានអំពាវនាវទៅដល់ប្រជាពលរដ្ឋក្នុងតំបន់ជាពិសេសភ្ញៀវទេសចរដែលមានបំណងគ្រោងមកកម្សាន្តនៅខេត្តមណ្ឌលគិរីហើយមកទស្សនា ទឹកជ្រោះប៊ូស្រាដ៏ល្បីល្បាញប្រចាំខេត្ត សូមជួយមកជួយគាំទ្រទុរេនដែលដាំដោយកសិករ ខ្មែរក្នុងខេត្តភូមិភាគឦសាន ដែលមិនប្រើប្រាស់សារជាតិគីមី មានឱជារសឈ្ងុយឆ្ងាញ់ គុណភាពល្អ និងតម្លៃសមរម្យ។

ជាមួយគ្នានេះ លោក កុម្ភះ ប្រជាពលរដ្ឋមួយរូបរស់នៅក្រុងសែនមនោរម្យ ក៏បានប្រាប់កម្ពុជាថ្មីឲ្យដឹងផងដែរថា នៅចុងសប្ដាហ៍នេះលោកបានធ្វើដំណើរកម្សាន្តទឹកជ្រោះប៊ូស្រា ហើយចៃដន្យ ក៏ឃើញទុរេនដឹកមកពីចំការថ្មីៗ ហើយក្នុងនាមគាត់និយមទទួលទានទុរេនក៏ចូលជួយគាំទ្រផងដែរ។ ភ្ញៀវរូបនេះបានបញ្ជាក់ថា ដោយកន្លងមកធ្លាប់ទទួលទានទុរេននៅចំការនេះព្រោះវាមានរសជាតិឈ្ងុយឆ្ងាញ់ផ្អែមជាពិសេសតម្លៃសមរម្យដែលពួកគេអាចទទួលយកបាន៕

អត្ថបទ ៖ រៀម សុខហេង