ដំបូង ថៃថា មីនដែលទាហានខ្លួនជាន់ ជាមីនចាស់ពិបាករាវរក ចុះម្តេចឥឡូវរកឃើញមីនថ្មីៗ ស្រួលម្ល៉េះ?

ពេលទាហានថៃជាន់មីននៅតំបន់មុំ៣ថ្ងៃទី១៧ខែកក្កដា ថៃប្រកាសថា នោះគឺជាមីនចាស់ប្រភេទ PMN-2 សល់ពីសម័យសង្គ្រាម ខណៈអង្គភាពកម្ចាត់មីននៃប្រទេសថៃបញ្ជាក់ថា វាជាមីនប្រឆាំងមនុស្ស ផលិតដោយរុស្ស៊ី ហើយពិបាករាវរកណាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមករបាយការណ៍បែរជាត្រឡប់ត្រឡិន ដោយអង្គភាពដដែលនេះ បង្ហាញថា នោះជាមីនថ្មីដែលទើបបង្កប់ ហើយថែមទាំងចោទប្រកាន់ទាំងងងើលមកលើកម្ពុជា ថាជាអ្នកដាក់ទៀតផង។

ជុំវិញរឿងនេះ មេភូមិភាគ២ថៃ Boonsin Padklang បានឡាំប៉ាថា កម្ពុជា លួចបង្កប់មីនថ្មីរាប់រយគ្រាប់នៅក្នុងដីថៃ ដែលនេះគឺជាការនិយាយដោយផ្តាស់និងគ្មានមូលដ្ឋានច្បាស់លាស់ទាល់តែសោះ។

និយាយចុះនិយាយឡើង ថៃបែរជាន់កែងខ្លួនឯង ព្រោះថា បើទាហានជាន់មីននៅលើដីខ្លួនឯងមែន ហេតុអ្វីមកចោទកម្ពុជាទៅវិញ ហើយម្យ៉ាងដំបូងថា មីននោះជាមីនចាស់ដែលពិបាករាវរក ប៉ុន្តែហេតុអ្វី ត្រឹមរយៈពេលប៉ុន្មានថ្ងៃក្រោយមក ថៃរកឃើញមីនថ្មីៗជាបន្តបន្ទាប់យ៉ាងងាយស្រួលបែបនេះ?

ថៃប្រហែលជាលេងល្បិចឈឺសាច់ដើម្បីបង្ហាញភាពត្រឹមត្រូវរបស់ខ្លួនទៅឆាកអន្តរជាតិ រួចទម្លាក់កំហុសលើកម្ពុជា សូម្បីសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាក៏អះអាងដែរថា ថៃប្រើវិធីសាស្រ្តបៀមឈាមព្រួ​សដាក់អ្នកដទៃ។ ជាមួយការអះអាងនេះ សម្ដេច ក៏រំលឹកទៅភាគីថៃដែរ កុំបំពានលើកម្ពុជាខ្លាំងពេក។

រឿងដែលកាន់តែបង្ហាញល្បិចពុតត្បុតថៃច្បាស់ គឺនៅពេលមេភូមិភាគ២ប្រកាសថា ទាហានខ្លួននឹងលែងល្បាតដោយថ្មើជើងទៀតហើយ ពោលគឺប្តូរវិធីសាស្រ្តថ្មីដោយប្រើគ្រឿងចក្រធ្ងន់ធុនវិញ ដូច្នេះបើមីនផ្ទុះក៏ផ្ទុះទៅចុះ។

នេះមានន័យថា មានតែថៃជាអ្នកដាក់មីនខ្លួនឯងទេ ទើបមេភូមិភាគ២ ប្រកាសប្តូរវិធីសាស្រ្តល្បាតពីថ្មើរជើងមកប្រើយានយន្តធុនធ្ងន់វិញ ដើម្បីចៀសវាងជាន់មីនម្តងទៀត បង្កភាពអាម៉ាស់។

ជុំវិញរឿងមីននេះទៀតសោត លោក ហេង រតនា អគ្គនាយក​មជ្ឈមណ្ឌល​សកម្មភាព​កំចាត់​មីន​កម្ពុជា (CMAC) បាន​ចោទ​ជា​សំណួរ​រួចមកហើយថា តើ​ការ​ផ្ទុះ​គ្រាប់​មីន​នោះ ក្នុង​ទឹកដី​របស់​អ្នក​ណា ? បើសិនជា​ក្នុង​ទឹកដី​សៀម គ្រាប់​មីន​ចាស់ ឬ​ថ្មី មាន​តែ​ខាង​សៀម​ខ្លួនឯង​ទេ ទើប​ដឹង​ច្បាស់។

ម្យ៉ាង លោក ហេង រតនា ថែមទាំងពន្យុះឲ្យថៃ ប្ដឹងកម្ពុជាទៅតុលាការយុត្តិធម៌អន្តរជាតិ ICJ ទៀតផង ព្រោះ ICJ ជាតុលាការរបស់ UN ស្រាប់៕

អត្ថបទ៖ សុខ សុវណ្ណ

ចុចអាន៖ ភូមិភាគ២ថៃ ប្តូរវិធីសាស្រ្តល្បាត ប្រហែលខ្លាចជាន់មីន បង្កប់ដោយខ្លួនឯង