ព័ត៌មានអន្ដរជាតិ

កងទ័ពជើងទឹកហ្វីលីពីន និងឥណ្ឌា ធ្វើការល្បាតរួមគ្នាលើកដំបូង នៅសមុទ្រចិនខាងត្បូង

បានផុស

១០ ខែ មុន

នៅ

ថ្ងៃចន្ទ ៤ សីហា ២០២៥

ដោយ

ហ្វីលីពីន និងឥណ្ឌាចាប់ផ្តើមការល្បាតរួមគ្នាជាលើកដំបូងនៅក្នុងសមុទ្រចិនខាងត្បូងដែលកំពុងមានជម្លោះ ខណៈដែលនេះជាជំហានដ៏សំខាន់មួយក្នុងកិច្ចសហប្រតិបត្តិការការពារជាតិរវាងប្រទេសទាំងពីរ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី០៤ខែសីហានេះ។

នាវាចម្បាំងកងទ័ពជើងទឹកឥណ្ឌាចំនួនបីគ្រឿងបានចូលចតនៅកំពង់ផែម៉ានីលដើម្បីចូលរួមក្នុងសកម្មភាពដែនសមុទ្ររួមគ្នានៅសមុទ្រហ្វីលីពីនខាងលិច (WPS) ។ (រូបភាព៖ ANI)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការល្បាតរួមគ្នានឹងមានរយៈពេលពីរថ្ងៃបានចាប់ផ្តើមកាលពីថ្ងៃអាទិត្យ ដោយរួមមាននាវាកងទ័ពជើងទឹកឥណ្ឌាចំនួន ៣ គ្រឿង ដែលមួយក្នុងចំណោមនោះគឺជានាវាពិឃាតមីស៊ីលដឹកនាំ INS Delhi។ ការល្បាតនេះបានចាប់ផ្តើមនៅពេលដំណាលគ្នាដែលប្រធានាធិបតីហ្វីលីពីនលោក Ferdinand Marcos បានចាកចេញទៅបំពេញទស្សនកិច្ចនៅប្រទេសឥណ្ឌាផងដែរ។

នាវាកងទ័ពជើងទឹកឥណ្ឌា INS Delhi ខាងស្តាំ នាវាពិឃាតមីស៊ីលដឹកនាំ និង INS Kiltan ដែលជានាវាចម្បាំងប្រឆាំងនាវាមុជទឹក ចូលចតនៅកំពង់ផែម៉ានីល ប្រទេសហ្វីលីពីន។ (រូបភាព៖ AP)

គួរបញ្ជាក់ថាប្រតិបត្តិការរួមគ្នានេះកើតឡើងចំពេលមានភាពតានតឹងកើនឡើងជាមួយចិន ដែលទាមទារស្ទើរតែទាំងស្រុងលើសមុទ្រចិនខាងត្បូង បើទោះបីជាមានសេចក្តីសម្រេចអន្តរជាតិបដិសេធការទាមទាររបស់ខ្លួនក៏ដោយ។ ដោយសារតែបញ្ហាជម្លោះ ហ្វីលីពីនបានពង្រឹងទំនាក់ទំនងការពារជាតិជាមួយសម្ព័ន្ធមិត្តជាច្រើនក្នុងរយៈពេលមួយឆ្នាំចុងក្រោយនេះបន្ទាប់ពីមានការប៉ះទង្គិចគ្នាជាបន្តបន្ទាប់នៅដែនសមុទ្រ។

ខណៈពេលកំពុងបំពេញទស្សនកិច្ចនៅទីក្រុង ញូវដែលី លោកប្រធានាធិបតី Marcos ត្រូវបានគេរំពឹងថានឹងពិភាក្សាជាមួយនាយករដ្ឋមន្ត្រីឥណ្ឌា Narendra Modi អំពីកិច្ចព្រមព្រៀងជាច្រើន រួមទាំងកិច្ចសហប្រតិបត្តិការការពារជាតិដែលអាចធ្វើទៅបាន។ លោក Marcos ក៏បានសរសើរប្រទេសទាំងពីរចំពោះការគោរពច្បាប់សមុទ្រអន្តរជាតិ ដូចជាអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ជាដើម។

សូមបញ្ជាក់ដែរថាឥណ្ឌាបានលក់កាំជ្រួចល្បឿនលឿន BrahMos ទៅហ្វីលីពីនរួចហើយ ដែលជាផ្នែកមួយនៃក្រុម Quad ដែលជាក្រុដៃគូយុទ្ធសាស្ត្ររវាងប្រទេសអូស្ត្រាលី ឥណ្ឌា ជប៉ុន និងសហរដ្ឋអាមេរិក ខណៈចិនមើលឃើញក្រុមនេះជាមធ្យោបាយមួយក្នុងការរារាំងអំណាចរបស់ខ្លួនក្នុងតំបន់៕