បេសកកម្មកែតម្រូវហ្គូហ្គលផែនទី ដំណាក់កាលទី២ កំពុងផ្តោតលើការតាមដាន និងផ្ទៀងផ្ទាត់ទិន្នន័យដែលមានបញ្ហា

បន្ទាប់ពីការចាប់ផ្តើមយ៉ាងសកម្មកាលពីលើកទី១ កាលពីថ្ងៃទី ៣ ខែសីហា បេសកកម្ម Local Guides បានឈានចូលដល់ដំណាក់កាលទី២ ដែលជាដំណាក់កាលផ្តោតលើការត្រួតពិនិត្យ ផ្ទៀងផ្ទាត់ ចងក្រងឯកសារ និងទិន្នន័យ ហ្គូហ្គលផែនទី ដែលមានបញ្ហាមួយចំនួន។ នេះបើតាមការបញ្ជាក់ឱ្យដឹងពីអ្នកជំនាញផ្នែកបច្ចេកវិទ្យា លោក ជី សុផាត កាលពីថ្ងៃទី១០ ខែសីហានេះ។

បើតាមលោក ជី សុផាត បេសកកម្ម Local Guides បានប្រមូលភស្តុតាងជាក់ស្តែង តាមរយៈការតាមដានបញ្ហាទិន្នន័យ និងបានរៀបចំរបាយការណ៍សម្រាប់ហ្គូហ្គលផែនទី និងអ្នកពាក់ព័ន្ធ។ ឯសកម្មភាពសំខាន់ៗក្នុងបេសកកម្មនេះ គឺពិនិត្យឡើងវិញ និងតាមដានពីដំណាក់កាលទី១ ដោយចែករំលែកអំពីរបាយការណ៍ និងទិន្នន័យដែលរកឃើញកាលពីសប្តាហ៍មុន ទាក់ទងនឹងរបៀបតាមដាន ក៏ដូចជាប្រមូលទីតាំងដែលមានបញ្ហា។

លោកថា “ខ្ញុំបានចែករំលែកពីជំហានៗសម្រាប់បន្ថែមទីកន្លែងដែលមិនទាន់មាន និងពីរបៀបកែសម្រួលព័ត៌មានលម្អិតទីតាំងនៅលើហ្គូហ្គលផែនទី”។ ក្នុងនោះ គឺប្រមូលនិងផ្ទៀងផ្ទាត់ទិន្នន័យជា ៣០៨ ទីតាំងដែលមានបញ្ហា និងត្រូវបានរកឃើញ។

អ្នកជំនាញរូបនេះបញ្ជាក់ទៀតថា ជំនួបនេះ មានសកម្មភាពយ៉ាងសកម្មក្នុងការដោះស្រាយទិន្ន័យផែនទីដែលមានបញ្ហា ពោល គឺបានរកឃើញបញ្ហាយ៉ាងច្រើន និងស្មុគស្មាញខ្លាំង។ លោកថា ការរកឃើញ និងការរាយការណ៍បញ្ហាទាំងនេះ គឺមានសារៈសំខាន់សម្រាប់ការការពារសហគមន៍មួយនេះ និងការជឿទុកចិត្តលើឌីជីថលរបស់កម្ពុជា។

ឯការងារបន្ទាប់ ក្រុមលោកគឺត្រូវពិនិត្យមើល ១១៧ទីតាំង ដែលបន្តតាមដាន និងបន្តរៀបចំផែនការ ដំណាក់កាលទី៣ ជាមួយនឹងការពង្រីកការចូលរួមពីអ្នកស្ម័គ្រចិត្ត ដោយផ្តោតលើហានិភ័យនៃការរៀបចំទិន្នន័យផែនទីលើហ្គូហ្គលផែនទី។

ទន្ទឹមនេះ លោកក៏បានថ្លែងអំណរគុណដល់អ្នកដែលបានចូលរួម ផ្តោតការបារម្មណ៍ និងបានរួមចំណែកយ៉ាងសកម្មក្នុងការកែលម្អគុណភាពទិន្នន័យផែនទីរបស់កម្ពុជា ដើម្បីធ្វើយ៉ាងណាឱ្យកម្មវិធី Google Map កាន់តែត្រឹមត្រូវ កាន់តែមានសុវត្ថិភាព និងកាន់តែអាចទុកចិត្តបានសម្រាប់មនុស្សគ្រប់គ្នា៕