ព័ត៌មានជាតិ

អតីតពលករម្នាក់ បង្កើតមុខរបរសង់រោងចិញ្ចឹមកណ្តូបលក់ ហើយប្រកាសមិនវិលទៅធ្វើការនៅថៃវិញទេ

បានផុស

១០ ខែ មុន

នៅ

ថ្ងៃអង្គារ ១២ សីហា ២០២៥

ដោយ

អតីតពលករខ្មែរម្នាក់បានចាប់យកមុខរបរចិញ្ចឹមកណ្តូបលក់ ដើម្បីស្ដារសេដ្ឋកិច្ចគ្រួសារនៅក្នុងស្រុកកំណើត ក្រោយទើបតែវិលត្រឡប់មកពីប្រទេសថៃវិញ។

អ្នកស្រី សុខឿន អតីតពលករនៅប្រទេសថៃបានបញ្ជាក់ថា អ្នកស្រីពេលនេះសុខចិត្តចាប់យកមុខរបរនៅស្រុកកំណើតវិញ និងមិនវិលត្រឡប់ទៅធ្វើការនៅប្រទេសថៃវិញទេ ក្រោយដឹងថាកម្ពុជានិងថៃមានជម្លោះព្រំដែន ហើយថៃបានប៉ុនប៉ងបង្កជម្លោះដោយព្យាយាមលួចយកប្រាសាទនិងទឹកដីរបស់ខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី សុខឿន ដែលជាពលរដ្ឋរស់នៅក្នុងស្រុកបាណន់ ខេត្តបាត់ដំបង បានសេសសល់ថវិកាខ្លះៗក្រោយធ្វើការនៅប្រទេសថៃ។ ដោយបារម្ភចាយវាយលុយអស់ អ្នកស្រីនិងគ្រួសារបានចាប់ផ្តើមសាងសង់រោងចិញ្ចឹមសត្វកណ្តូបចំនួន ២ រោង ជាជំហានដំបូងសិនសម្រាប់ជាប្រភពចំណូលក្នុងគ្រួសារ ក្រោយពីអ្នកស្រីបានដឹងអំពីតម្លៃសត្វកណ្តូបនៅលើទីផ្សារបានល្អប្រសើរ ហើយតាមភូមិស្រុកក៏ពេញនិយមបរិភោគ ទើបអ្នកស្រីជ្រើសរើសយករបរនេះតែម្តង។

បើតាមអ្នកស្រី សុខឿន សត្វកណ្តូបមានតម្លៃល្អ ងាយស្រួលចិញ្ចឹម ហើយងាយស្រួលរកចំណី ខណៈមុខរបរនេះមិនប្រឈមគ្រោះថ្នាក់ អាចបាននៅថែកូនចៅផង ព្រោះជាមុខរបរនៅក្បែរផ្ទះ។

អ្នកស្រីលើកឡើងពីការចិញ្ចឹមកណ្តូបនេះមិនលំបាកទេ ព្រោះមានបងប្អូនអ្នកស្រីបានចិញ្ចឹមស្រាប់ ហើយថែមទាំងអាចរកចំណូលបានល្អ។

«ពេលយកកូនកណ្តូបមកដាក់ចិញ្ចឹម ក្មួយអ្នកស្រីមិនទាន់គិតលុយពីខ្ញុំទេ រហូតបានចាប់លក់ ទើបក្មួយគិតលុយ។ ចំពោះការប្រឈមមិនមានទេ គ្រាន់តែអ្នកស្រីដើរច្រូតស្មៅដាក់ឲ្យវាសុីជាការស្រេច និងដាក់ទឹកសម្រាប់វាផឹកប៉ុណ្ណោះ»។

បើតាមអ្នកស្រី សុខឿន មុខរបរនេះអាចរកចំណូលបាន មិនចាញ់ធ្វើជាកម្មករនៅថៃទេ ព្រោះការចិញ្ចឹមមានរយះពេលខ្លី មិនប្រឈមទីផ្សារ ហើយតម្លៃក៏បានសមរម្យ ដោយក្នុង ១ គីឡូក្រាមបានចន្លោះពី ២៤ ០០០ ដល់ ២៥ ០០០ រៀល៕

អត្ថបទ÷សៅ សារិទ្ធ