ក្រុមហ៊ុននាឡិកា Swatch សុំទោសជាសាធារណៈ ក្រោយផ្សាយពាណិជ្ជកម្ម ចំអកប្រជាជនចិន

ក្រុមហ៊ុនផលិតនាឡិកាម៉ាក Swatch ដ៏ល្បីល្បាញនាពេលថ្មីៗនេះ បានសុំទោស និងលុបចោលការផ្សាយពាណិជ្ជកម្មរើសអើងជាតិសាសន៍ ដែលចំអកឲ្យប្រជាជនចិន បន្ទាប់ពីបានបង្កឲ្យមានការរិះគន់យ៉ាងទូលំទូលាយនៅលើប្រព័ន្ធផ្សព្វផ្សាយសង្គមនៅក្នុងប្រទេសចិន។

ការផ្សាយពាណិជ្ជកម្ម បានបង្ហាញពីតារាម៉ូដែលប្រុសអាស៊ីម្នាក់ ពាក់នាឡិកាដោយប្រើដៃទាំងពីរប៉ះជ្រុងនៃភ្នែករបស់គាត់ដើម្បីធ្វើឲ្យពួកគេមើលទៅតូចនិងជ្រួញកន្ទុយភ្នែក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម BBC បានរាយការណ៍កាលពីថ្ងៃចន្ទ ទី ១៨ ខែសីហា ថាក្រុមហ៊ុនផលិតនាឡិកាស្វីស Swatch ដែលជាម្ចាស់ Omega, Longines និង Tissot បានសុំទោសចំពោះកំហុសរបស់ខ្លួន បន្ទាប់ពីការផ្សាយពាណិជ្ជកម្ម Swatch ផ្តោតលើទីផ្សារក្មេងជាងនេះ ទាក់ទាញការរិះគន់ចំពោះមាតិកាប្រកាន់ជាតិសាសន៍របស់ខ្លួន។

រូបភាពរបស់តារាម៉ូដែលប្រុសអាស៊ីពាក់នាឡិកា Swatch ពណ៌ភ្លឺចាំង អង្គុយប៉ះជ្រុងភ្នែករបស់គាត់ ដើម្បីចំអកដល់ប្រជាជនចិន បានរីករាលដាលនៅលើបណ្តាញសង្គមចិន ហើយបានជំរុញឲ្យមានការអំពាវនាវយ៉ាងទូលំទូលាយឲ្យធ្វើពហិការម៉ាកយីហោ។

ក្រុមអ្នករិះគន់និយាយថា រូបសំណាកដែលល្បីនៅក្នុងបណ្តាប្រទេសលោកខាងលិចអស់ជាច្រើនទសវត្សរ៍មកហើយ ត្រូវបានគេប្រើប្រាស់ដើម្បីមើលងាយជនជាតិអាស៊ី។ ចំណែក Swatch បាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ទី១៧ដែរថា ខ្លួនបានទទួលស្គាល់ការព្រួយបារម្ភអំពីរូបភាពនៃម៉ូដែលផលិតផលរបស់ខ្លួន ព្រមទាំងសូមអភ័យទោសដោយស្មោះចំពោះការរអាក់រអួលឬការយល់ច្រឡំ ដែលអាចបណ្តាលឲ្យមានការមិនពេញចិត្តជាច្រើន។

ទោះជាយ៉ាងណាក៏ដោយ ប្រព័ន្ធ​ផ្សព្វផ្សាយ​អង់គ្លេស​បាន​ចង្អុល​បង្ហាញ​ថា បើ​ទោះ​ជា​មាន​ការ​សុំ​ទោស​ក៏​ដោយ ក៏​វា​នៅ​មិន​ទាន់​ធ្វើ​ឲ្យ​ទីផ្សារ​អតិថិជន​ចិន​មាន​ភាព​ស្ងប់​ស្ងាត់​ដែរ។ អ្នកប្រើប្រាស់ជនជាតិចិនម្នាក់នៅលើ Weibo បានបញ្ចេញមតិថា Swatch គឺខ្លាចតែផលប្រយោជន៍ផ្ទាល់ខ្លួនប៉ុណ្ណោះ។ អ្នកអាចសុំទោសបាន ប៉ុន្តែពួកយើងនឹងមិនអត់ទោសឲ្យទោសទេ ។

ដោយឡែក យោងតាម Reuters នាឡិកា Swatch ទទួលបានប្រហែល ២៧% នៃប្រាក់ចំណូលរបស់ខ្លួនពីប្រទេសចិន ហុងកុង និងម៉ាកាវ ទោះបីជាការលក់នៅក្នុងប្រទេសចិនដីគោកបានធ្លាក់ចុះដោយសារតែការធ្លាក់ចុះនៃសេដ្ឋកិច្ចរបស់ប្រទេសក៏ដោយ៕

អត្ថបទ៖ សាង ស្រីល័ក្ខ

ចុចអាន៖អត្រាគ្មានការងារនៅចិន នាំឲ្យមនុស្សជាច្រើនត្រូវជួលក្រុមហ៊ុនក្លែងក្លាយ កុហកគ្រួសារ