សម្ព័ន្ធមិត្តចាស់​វស្សា​​ចំនួន​៣​របស់​អ៊ីស្រាអែល ប្រកាស​ទទួលស្គាល់រដ្ឋប៉ាឡេស្ទីនជាផ្លូវការ​ហើយ

ប្រទេសអូស្ត្រាលី អង់គ្លេស និងកាណាដា កាលពីថ្ងៃអាទិត្យ​ទី​២១​ខែ​កញ្ញា​ឆ្នាំ​២០២៥ បានទទួលស្គាល់ជាផ្លូវការនូវរដ្ឋប៉ាឡេស្ទីន ដែលជា​ការ​ផ្លាស់ប្ដូរ​ការទូតដ៏សំខាន់ដោយសម្ព័ន្ធមិត្តចាស់​វស្សា​ជាងគេចំនួនបីរបស់អ៊ីស្រាអែល និងជាសញ្ញានៃការកើនឡើង​​នៃសន្ទុះគាំទ្រ​​ជា​អន្តរជាតិចំពោះ​ដំណោះស្រាយរដ្ឋពីរ។

ការផ្លាស់ប្តូរនេះ បាននាំ​ឲ្យ​ចំនួនប្រទេសសរុបដែលទទួលស្គាល់ប៉ាឡេស្ទីន​កើន​ដល់ ១៤៨​ប្រទេស។

រដ្ឋមន្ត្រីការបរទេសអង់គ្លេស Yvette Cooper បាននិយាយថា ការទទួលស្គាល់របស់ទីក្រុងឡុងដ៍ គឺមានបំណងរក្សាលទ្ធភាពនៃដំណោះស្រាយរដ្ឋពីរ ដែលលោកស្រីបានពិពណ៌នាថា ស្ថិតនៅក្រោមការគំរាមកំហែងយ៉ាងធ្ងន់ធ្ងរ ចំពេលមានសង្គ្រាមដែលកំពុងបន្តរបស់អ៊ីស្រាអែលនៅ​តំបន់​ហ្គាហ្សា។ លោកស្រីបានសង្កត់ធ្ងន់ថា ក្រុមហាម៉ាស «មិនអាចមានតួនាទី» នៅក្នុងរដ្ឋប៉ាឡេស្ទីននាពេលអនាគត និងបានជំរុញ​ឲ្យមានការដោះលែងចំណាប់ខ្មាំងដែលនៅតែត្រូវបានឃុំខ្លួនពីការវាយប្រហារនៅថ្ងៃទី​៧​ខែតុលា​ឆ្នាំ​២០២៣។

លោកស្រី Cooper បានលើក​ឡើង​ថា «ការទទួលស្គាល់គ្រាន់តែជាផ្នែកមួយនៃអ្វីដែលត្រូវតែជាការជំរុញឲ្យកាន់តែរឹងមាំ និងទូលំទូលាយសម្រាប់សន្តិភាព» ដោយអំពាវនាវ​ឲ្យមានបទឈប់បាញ់ជាបន្ទាន់ ការទទួលបានមនុស្សធម៌ និងការដោះស្រាយនយោបាយរយៈពេលវែង។

មន្ត្រី​ជាន់​ខ្ពស់​ក្រុមហាម៉ាស លោក Basem Naim បានស្វាគមន៍ការប្រកាសនេះ ដោយនិយាយថា វាបានពង្រឹង«សិទ្ធិប៉ាឡេស្ទីនស្របច្បាប់» រួមទាំងការសម្រេចចិត្តដោយខ្លួនឯង និងរដ្ឋធានីនៅហ្សេរុយសាឡឹម។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានថ្កោលទោសការសម្រេចចិត្តនេះ ដោយចោទប្រកាន់មេដឹកនាំលោកខាងលិចថាបានផ្តល់រង្វាន់ដល់អំពើភេរវកម្ម។ លោក​បាននិយាយថា «ខ្ញុំមានសារច្បាស់លាស់មួយទៅកាន់មេដឹកនាំទាំងនោះដែលទទួលស្គាល់រដ្ឋប៉ាឡេស្ទីន បន្ទាប់ពីការសម្លាប់រង្គាលដ៏គួរ​ឲ្យរន្ធត់នៅថ្ងៃទី​៧​ខែតុលា គឺអ្នកកំពុងផ្តល់រង្វាន់ដ៏ធំដល់ភេរវកម្ម។ វានឹង​គ្មាន​ឡើយ​នូវ​រដ្ឋ​ប៉ាឡេស្ទីន​»។

ការទទួលស្គាល់លើក​នេះ បង្ហាញពីការស្តីបន្ទោសខាងការទូតដ៏ខ្លាំងក្លាបំផុត​លើ​អ៊ីស្រាអែលដោយសម្ព័ន្ធមិត្តលោកខាងលិច ក្នុងរយៈពេលជាច្រើនទស្សវត្សរ៍កន្លង​មកនេះ ដោយគូសបញ្ជាក់ពីសម្ពាធកើនឡើងនៅក្នុងសហគមន៍អន្តរជាតិដើម្បីជំរុញផ្លូវនយោបាយចេញពីសង្រ្គាម៕

ដោយ៖ ឈាង