BYD បង្ហាញការប្តេជ្ញាចិត្តខ្ពស់ជំរុញការវិនិយោគវិស័យឧស្សាហកម្មយានយន្ត និងអេឡិចត្រូនិក

នាយក​ប្រតិបត្តិ​នៃ​ការិយាល័យ​ប្រធាន​សម្ព័ន្ធ​ក្រុមហ៊ុន BYD បង្ហាញ​នូវ​ការ​ប្តេជ្ញា​ចិត្ត​ខ្ពស់ក្នុងការចូលរួម​សហការ​ជា​មួយ​ក្រុមហ៊ុន Huawei ​រៀបចំ​សម្របសម្រួល​លើ​​បេសកកម្ម​ជំរុញ​ការ​វិនិយោគ​នៅ​ក្នុង​វិស័យ​ឧស្សាហកម្មយានយន្ត និងអេឡិចត្រូនិក របស់​ក្រុម​ប្រឹក្សា​អភិវឌ្ឍន៍​កម្ពុជា នៅ​ក្នុងទីក្រុង Shenzhen សាធារណរដ្ឋប្រជាមានិតចិន នាពេលអនាគត។

ក្នុង​ឱកាស​ដឹក​នាំ​គណៈប្រតិភូ បាន​ចូល​ជួប​សម្តែង​ការ​គួរ​សម​ និង​ពិភាក្សា​ការងារ​ជា​មួយ​លោក ស៊ុន ចាន់ថុល អនុប្រធាន​ទី​១ ក្រុម​ប្រឹក្សា​អភិវឌ្ឍន៍​កម្ពុជា លោក Xiao Haipin នាយក​ប្រតិបត្តិ​នៃ​ការិយាល័យ​ប្រធាន​សម្ព័ន្ធ ក្រុមហ៊ុន BYD (Executive Director of BYD Group President’s Office) បាន​អរគុណ​ចំពោះ​កិច្ច​សម្របសម្រួល​នានា​របស់​រាជរដ្ឋាភិបាល ក៏​ដូចជា​ក្រុមប្រឹក្សា​អភិវឌ្ឍន៍កម្ពុជា ចាប់តាំងពី​ដំណាក់កាល​ដំបូងនៃ​ការចូល​មកកាន់​ទីផ្សារកម្ពុជា, ដំណាក់កាលនៃការសាងសង់រោងចក្រ និងរហូត​ឈាន​ដល់ការ​ចាប់ផ្តើម​ដំណើរ​ប្រតិបត្តិការ​ដំឡើង​រថយន្ត​របស់​ខ្លួនផងដែរ។

ទន្ទឹមនេះដែរ នាយក ប្រតិបត្តិ​រូប​នេះ បាន​អះអាង​ពី​ការប្តេជ្ញា​ចិត្ត​របស់​ក្រុម​ហ៊ុន BYD ចូលរួម​សហការ​ជាមួយក្រុមហ៊ុន Huawei ក្នុងការរៀបចំ​សម្របសម្រួល​លើ​បេសកកម្ម​ជំរុញ​ការវិនិយោគ​នៅ​ក្នុង​វិស័យ​ឧស្សាហកម្ម​យានយន្ត និង​អេឡិចត្រូនិក របស់​ក្រុមប្រឹក្សា​អភិវឌ្ឍន៍កម្ពុជា នៅក្នុងទីក្រុង Shenzhen សាធារណរដ្ឋ​ប្រជាមានិតចិន នាពេលអនាគត។

លោក​ឧបនាយករដ្ឋមន្ត្រី ស៊ុន ចាន់​ថុល រំពឹងថា សម្ព័ន្ធ BYD នឹងពាំនាំអំពីគុណសម្បត្តិ និងចំណុច​វិជ្ជមាននានាដែលពាក់ព័ន្ធការវិនិយោគនៅកម្ពុជាផ្សព្វផ្សាយបន្តទៅកាន់ដៃគូវិនិយោគ និងសហគមធុរកិច្ចរបស់ខ្លួនផងដែរ។

លោក​ឧបនាយករដ្ឋមន្ត្រី បានបន្ថែមថា ក្រុមប្រឹក្សាអភិវឌ្ឍន៍កម្ពុជា ដែលជាសេនាធិការ​ច្រកចេញចូលតែ​មួយ​របស់​រាជរដ្ឋាភិបាល រីករាយ​និង​ត្រៀម​លក្ខណៈ​រួចរាល់ជានិច្ច ក្នុងការ​សម្របសម្រួល​រាល់គ្រប់​កិច្ចការងារ​វិនិយោគ​របស់​វិស័យ​ឯកជន​នៅ​កម្ពុជា សំដៅ​ធានា​បាន​នូវ​បរិយាកាស​វិនិយោគ ប្រកប​ដោយ​ភាព​បត់បែន អំណោយផល និង​អនុគ្រោះ​​បំផុត​ជូនដល់វិនិយោគិន៕

​