តួម្ដាយវិធាវី ប្រាប់វិធី តួល្ខោននិយាយ អាចសម្ដែង ១ រឿងលើឆាកដោយរលូន (មានវីដេអូ)

ថ្វីបើទស្សនីយភាពល្ខោននិយាយ រឿង ផ្កាស្រពោន ទើបបានសម្ដែងចប់ ៤ដង ក្នុងរយៈពេល ៣ថ្ងៃ នាពេលថ្មីៗនេះក៏ពិតមែន ប៉ុន្តែបានបន្សល់ភាពអាឡោះអាល័យ ខណៈសំបុត្រត្រូវបានលក់អស់មុនពេលសម្ដែង ធ្វើឱ្យមហាជនជាច្រើនចង់ទស្សនា ប៉ុន្តែមិនអាចចូលទស្សនា។

ល្ខោននិយាយដែលសម្ដែងដោយ សិល្បករ សិល្បការិនី នៃ នាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ នេះ បានខាបដួងចិត្តទស្សនិកជន ឱ្យអណ្ដែតអណ្ដូង ផ្ទុះសំណើច ខ្នាញ់ អាណិត រហូតដល់ស្រក់ទឹកភ្នែក ដោយសារតែសកម្មភាពសម្ដែងដ៏រស់រវើកនៅលើកឆាកនៅចំពោះមុខ ហាក់ដូចខ្លួនកំពុងស្ថិតក្នុងហេតុការណ៍នោះពិតៗ។

លោកស្រី ឡុង ម៉ាលីស តួសម្ដែង យាយនួន ម្ដាយនាងវិធាវី បានឱ្យ “កម្ពុជាថ្មី” ដឹងថា មូលហេតុដែលសិល្បករ សិល្បការិនី អាចសន្ទនាតាមអត្ថបទប្រលោមលោក និងសម្ដែងលើឆាករយៈពេលជាងមួយម៉ោង នៅចំពោះមុខទស្សសនិកជនរាប់រយនាក់ដូចនេះ គឺដោយសារទាំងគ្រូដឹកនាំរឿង ទាំងក្រុមសម្ដែង សុទ្ធតែបានហាត់រៀនពីសាលាល្ខោន មានរូបមន្តសម្ដែងច្បាស់លាស់ សិក្សាស៊ីជម្រៅពីចរិតលក្ខណៈតួអង្គដែលខ្លួនត្រូវសម្ដែង ព្រមទាំងបានហាត់សមជាច្រើនថ្ងៃ។

លោកស្រី ឡុង ម៉ាលីស ជាអនុប្រធានការិយាល័យ អធិការកិច្ច នាយកដ្ឋានសិល្បៈទស្សនីយភាព ដែលបានចូលហាត់រៀនជំនាញល្ខោនខ្មែរជាច្រើនទម្រង់តាំងពីឆ្នាំ១៩៨៥ រូបនេះ បានលើកឡើងថា៖ “ខ្ញុំដឹងថា មជ្ឈដ្ឋានខាងក្រៅគេអត់សូវឱ្យតម្លៃអ្នកសិល្បៈប៉ុន្មានទេ ប៉ុន្តែខ្ញុំខ្លួនឯង ក៏សប្បាយចិត្តនៅពេលដែលគាត់អត់ពេញចិត្តខ្ញុំដែរ…”។

សូមអញ្ជើញទស្សនាបទសម្ភាស៖

គួរបញ្ជាក់ថា ប្រលោមលោក រឿង “ផ្កាស្រពោន” ជាស្នាដៃនិពន្ធ របស់លោក នូ ហាច បានតាក់តែងក្នុងឆ្នាំ១៩៤៧ បោះពុម្ពក្នុងឆ្នាំ១៩៤៩ ក្នុងសម័យអាណានិគមបារាំង។ រឿងនេះបានបង្ហាញពីជីវិតស្នេហាព្រាត់ប្រាស់របស់យុវជនយុវតីពីររូបនៅខេត្តបាត់ដំបង គឺតួអង្គ ប៊ុនធឿន និងនាង​វិធា​វី បណ្តាលមកពីការរើសអើងវណ្ណៈ ឱ្យតម្លៃលើទ្រព្យសម្បត្តិធំជាងកិត្តិយស។ មានការលើកឡើងថា រឿងនេះ គឺយកតាមលំនាំរឿងពិត នៃអ្នកនិពន្ធផ្ទាល់។ ស្នាដៃអក្សរសិល្ប៍បែបទំនើបដ៏ល្បីមួយនេះ ត្រូវបានបញ្ចូលក្នុងកម្មវិធីសិក្សារបស់ ក្រសួងអប់រំ យុវជន និងកីឡា ក៏ដូចជាបានផលិតជាល្ខោនវិទ្យុ និងភាពយន្តផងដែរ៕