ឥណ្ឌូណេស៊ី៖ សម្លៀកបំពាក់ជជុះនាំចូល បង្កការបញ្ឈប់ការងារទ្រង់ទ្រាយធំក្នុងវិស័យវាយនភណ្ឌ​​

វិទ្យាស្ថានអភិវឌ្ឍន៍សេដ្ឋកិច្ច និងហិរញ្ញវត្ថុឥណ្ឌូណេស៊ី​ (Indef) បានព្រមានថា ​កំណើននៃការនាំចូលសម្លៀកបំពាក់ជជុះ​ខុសច្បាប់ កំពុងបង្ក​ផលប៉ះពាល់យ៉ាងធ្ងន់ធ្ងរដល់វិស័យវាយនភណ្ឌរបស់ប្រទេសឥណ្ឌូណេស៊ី។

តាមការចុះផ្សាយរបស់កាសែត Jakarta Globe វិទ្យាស្ថាន Indef បាន​ប៉ាន់ប្រមាណថា កម្មករវាយនភណ្ឌប្រហែល ៥២០ ០០០ នាក់ ត្រូវបានបញ្ឈប់ពីការងារ ខណៈ​រោងចក្រវាយនភណ្ឌឥណ្ឌូណេស៊ី​ជាច្រើន​ ​បាន​បាត់បង់ចំណែកទីផ្សារដោយសារកំណើននៃ​ការជួញដូរសម្លៀកបំពាក់ជជុះដោយខុសច្បាប់​។

ថ្លែងនៅលើកញ្ចក់ទូរទស្សន៍ Beritasatu កាលពីថ្ងៃសុក្រ ​សេដ្ឋកិច្ចវិទូរបស់ Indef លោកស្រី Esther Sri Astuti បាននិយាយថា ​ក្រុមហ៊ុន​ផលិតក្នុងស្រុក ជាពិសេសក្រុមហ៊ុនផលិតខ្នាតតូច និងមធ្យម កំពុងតស៊ូត្រដាបត្រដួស ដើម្បីប្រកួតប្រជែង ខណៈ​សម្លៀកបំពាក់ជជុះតម្លៃថោកៗ​បន្តហូរចូលទីផ្សារ។

លោកស្រី​បាន​ថ្លែងយ៉ាងដូច្នេះ​ថា​៖ «ការនាំចូល​សម្លៀកបំពាក់​ជជុះ​ខុសច្បាប់ ​បាន​ធ្វើ​ឲ្យ​បាត់បង់​ចំណែក​ទីផ្សារ​របស់​ក្រុមហ៊ុន​ផលិត​វាយនភណ្ឌ​ក្នុងស្រុក​ចំនួន ១៥ ភាគរយ។ រោងចក្រ​ជាច្រើន ជាពិសេស​សហគ្រាស​ធុន​តូច និង​មធ្យម ត្រូវ​បាន​បង្ខំ​ឲ្យ​កាត់បន្ថយ​កម្លាំង​ពលកម្ម ដោយសារ​ការលក់​បន្ត​ធ្លាក់ចុះ»។

ក្រៅពី​ផលប៉ះពាល់​នៃ​ការងារ លោកស្រី Esther បាន​​បន្តថា បញ្ហាដដែល​បាន​ធ្វើឱ្យរដ្ឋបាត់ចំណូលពីការប្រមូលពន្ធ ខណៈសមាគម​វាយនភណ្ឌ​ឥណ្ឌូណេស៊ី (API) ឯណោះវិញ បាន​ប៉ាន់ប្រមាណ​​ពីការខាតបង់​សេដ្ឋកិច្ច​មាន​ប្រមាណ ១ ​ទ្រី​លាន​រូពី (៥៩ លាន​ដុល្លារ​អាមេរិក) /ឆ្នាំ។

​បច្ចុប្បន្ន រដ្ឋាភិបាលឥណ្ឌូណេស៊ី ឲមានគម្រោងចាត់វិធានការដ៏តឹងរ៉ឹងជាងមុន។ រដ្ឋមន្ត្រីក្រសួងហិរញ្ញវត្ថុ លោក Purbaya Yudhi Sadewa បាននិយាយថា អាជ្ញាធរបានកំណត់អត្តសញ្ញាណតួអង្គសំខាន់ៗនៅពីក្រោយបណ្តាញគេចពន្ធ ហើយនឹងដាក់ទណ្ឌកម្មរដ្ឋបាល រួមជាមួយនឹងការកាត់ទោសព្រហ្មទណ្ឌ ដើម្បីដោះស្រាយបញ្ហា។ ​

គួរគូសបញ្ជាក់ថា សម្លៀកបំពាក់​ជជុះ​​គេចពន្ធ ច្រើន​តែ​ត្រូវបាន​គេយកទៅជួញដូរ​ក្នុងទីផ្សារ​សម្លៀកបំពាក់​ជជុះ​ក្នុង​ស្រុក ដែលពេញនិយមក្នុងចំណោមយុវជនឥណ្ឌូណេស៊ី ទោះបីជាវាខុសច្បាប់ពាណិជ្ជកម្ម​ឥណ្ឌូណេស៊ីក្ដី។ ​ក្រុម​អ្នក​ឧស្សាហកម្ម​​ក្នុង​ស្រុកបាន​​អះអាង​ថា ការ​ហូរចូល​នៃ​ទំនិញ​ថោក​ៗកំពុង​ជំរុញឱ្យ​មាន​ការ​ធ្លាក់ចុះ​នៃ​វិស័យ​វាយនភណ្ឌ​ក្នុង​ស្រុក​ដែល​ចុះខ្សោយ​រួច​ទៅ​ហើយ ​ដោយសារការធ្លាក់ចុះនៃតម្រូវការ​ និងកំណើនថ្លៃដើម។ ​​