កម្ពុជា-តួកគីយ៉េ ប្តេជ្ញាបង្កើនទំហំពាណិជ្ជកម្មទ្វេភាគីឱ្យឈានដល់ ១ ប៊ីលានដុល្លារ

នៅ​ក្នុង​កិច្ចប្រជុំគណៈកម្មការសេដ្ឋកិច្ចចម្រុះលើកទី៤ នៃ​គណៈកម្មការសេដ្ឋកិច្ចចម្រុះរវាងកម្ពុជា-តួកគីយ៉េ ភាគី​ទាំង​ពី​បាន​បង្ហាញ​ឆន្ទៈ​ក្នុង​ការ​ពិនិត្យ​លទ្ធភាព​ពង្រឹង​កិច្ចសហប្រតិបត្តិការពាណិជ្ជកម្ម និងវិនិយោគ ឱ្យកាន់តែ​ប្រសើរ​បន្ថែមទៀត ដើម្បី​បង្កើន​ទំហំ​ពាណិជ្ជកម្មទ្វេភាគី​ឱ្យឈានដល់ ១ប៊ីលានដុល្លារអាម៉េរិក។

ក្នុងអំឡុងកិច្ចប្រជុំនេះ លោក​​ស្រី​រដ្ឋមន្ត្រី​ ចម និម្មល និង​លោក​រដ្ឋមន្ដ្រី​ក្រសួងកសិកម្ម នៃសាធារណរដ្ឋតួកគីយ៉េ ដែល​ជា​សហប្រធាន បាន​គូសបញ្ជាក់ពីឆន្ទៈ និងគោលជំហរដ៏មោះមុតក្នុងការបន្តពង្រឹងទំនាក់ទំនងទ្វេភាគី និងកិច្ចសហប្រតិបត្តិការលើគ្រប់វិស័យឱ្យកាន់តែស៊ីជម្រៅ តាមរយៈ​ការអនុវត្ត​សកម្មភាព​ការងារ​ដូចមាន​ព្រមព្រៀង​ក្នុង​កំណត់​ហេតុរួមនៃកិច្ចប្រជុំលើកទី៤ ដែលគ្របដណ្តប់លើវិស័យនិងអនុវិស័យសំខាន់ៗដូចជា៖ ពាណិជ្ជកម្មទំនិញ និងសេវា, កសិកម្ម រុក្ខាប្រមាញ់ និងនេសាទ, អាកាសចរស៊ីវិល, ការដឹកជញ្ជូន និងហេដ្ឋារចនាសម្ព័ន្ធ, អប់រំ, វិនិយោគ, ឧស្សាហកម្ម វិទ្យាសាស្រ្ត និងបច្ចេកវិទ្យា, ហាឡាល, ធនធានទឹក, ទេសចរណ៍, សុខាភិបាល, និងការងារ សន្តិសុខសង្គម និងបណ្ដុះបណ្ដាលវិទ្យាជីវៈ។

ភាគីទាំងពីរក៏បានពិភាក្សាការងារបន្ថែម ដើម្បីពិនិត្យ​លទ្ធភាព​ក្នុង​ការ​ពង្រឹង​កិច្ចសហប្រតិបត្តិការ​ពាណិជ្ជកម្ម និងវិនិយោគ ឱ្យកាន់តែប្រសើរបន្ថែមទៀត ដើម្បីបង្កើនទំហំពាណិជ្ជកម្មទ្វេភាគីឱ្យឈានដល់ ១ប៊ីលានដុល្លារអាម៉េរិក។

ក្នុងនោះ លោក​ស្រី​រដ្ឋមន្ត្រី ក៏បាន​សង្កត់ធ្ងន់​លើភាព​ប្រទាក់ក្រឡា និង​ការ​ផ្ដល់​ផល​ប្រយោជន៍​ឱ្យគ្នា​ទៅវិញ​ទៅ​មក​​នៃ​សេដ្ឋកិច្ចរបស់​ប្រទេសទាំងពីរ​ហើយក៏បាន​ជំរុញ​ឱ្យបន្ត​ការធ្វើពាណិជ្ជកម្ម និង​វិនិយោគ​លើ​ផលិតផល​កសិកម្ម ការកែឆ្នៃម្ហូបអាហារ វេចខ្ចប់ ទេសចរណ៍សុខាភិបាល និងគ្រឿងបរិក្ខារវិជ្ជសាស្ត្រ ជាដើម៕