ព័ត៌មានជាតិ

ក្រសួងពាណិជ្ជកម្មដាក់គោលដៅធ្វើឱ្យទំនិញនៅលើទីផ្សារ៧៥%ជាផលិតផលធ្វើនៅកម្ពុជា

បានផុស

៤ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

រដ្ឋមន្ត្រីក្រសួងពាណិជ្ជកម្ម លោកស្រី ចម និម្មល បានលើកឡើងថាក្រសួងមានគោលដៅធ្វើយ៉ាងណាឱ្យទំនិញនៅលើទីផ្សារកម្ពុជាមាន៧៥%ជាផលិតផលដែលធ្វើនៅក្នុងស្រុក ដើម្បីជំនួសផលិតផលដែលនាំចូល ដែលយុទ្ធនាការនេះនឹងចាប់ផ្ដើមក្នុងឆ្នាំ២០២៦នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងសិក្ខាសាលាពីការពង្រឹងភាពធន់ជាតិកាលពីថ្ងៃទី១២ ខែមីនា ឆ្នាំ២០២៦ នៅវិមានរដ្ឋសភាលោកស្រី ចម និម្មល មានប្រសាសន៍ថា ការបង្កើនផលិតផលនេះគឺដើម្បីជំនួសការនាំចូលផលិតផលដែលខ្មែរអាចផលិតបាន។ ក្រសួងចង់ឱ្យផលិតផលខ្មែរមាន៥០%ជំនួសការនាំចូលនៅអំឡុងខែមិថុនាខាងមុខ ហើយនឹងបង្កើនដល់៧៥%នៅពេលអនាគត។

លោកស្រីថា៖ «យើងដឹងណាស់ថាមិនដល់១០០%ទេ ព្រោះទោះជាយ៉ាងណាយើងមិនអាចផលិតបាននូវគ្រប់ប្រភេទនូវផលិតផលដែលមានជាតម្រូវការរបស់ទីផ្សារតម្រូវការរបស់អ្នកប្រើប្រាស់។ អ៊ីចឹងអ្វីដែលយើងព្យាយាមគឺការជំនួស»។

លោកស្រីជំរុញដល់ក្រសួងឧស្សាហកម្មនឹងជួយគាំទ្រជំរុញដល់គោលដៅនេះឱ្យបានសម្រេចផងដែរ។

តាមការឱ្យដឹងពីលោកស្រី ចម និម្មល បច្ចុប្បន្នផ្សារទំនើបនានានៅកម្ពុជាបានចូលរួមជាមួយរដ្ឋាភិបាលក្នុងការដាក់តាំងបង្ហាញផលិតផលជាតិនៅទីតាំងដែលស្រួលមើល ធ្វើឱ្យការលក់ផលិតផលជាតិមានការប្រកួតប្រជែងខ្ពស់ជាមួយផលិតផលនាំចូល ខណៈនាពេលខាងមុខក្រសួងក៏នឹងជំរុញការលក់ផលិតផលដែលផលិតនៅកម្ពុជាទៅក្នុងប្រព័ន្ធអនឡាញ។

លោកស្រីបញ្ជាក់ថាឥទ្ធិពលនៃការធ្វើពហិការទំនិញថៃបានធ្វើឱ្យកម្ពុជាកាត់ផ្ដាច់ការនាំចូលពីថៃ បង្កើតឱកាសដល់ផលិតផលក្នុងស្រុក ខណៈទំនិញដែលផលិតផលក្នុងស្រុកមិនទាន់អាចជំនួសបានត្រូវនាំចូលពីបរទេស។ ផលិតផលប្រទេសមួយចំនួនដែលចូលមកជំនួសផលិតផលថៃរួមមាន ផលិតផលមកពី ប្រទេសម៉ាឡេស៊ី សិង្ហបុរី វៀតណាម សហរដ្ឋអាមេរិក នូវែលហ្សេឡង់ និងឥណ្ឌា៕