សេដ្ឋកិច្ច

រដ្ឋមន្ត្រី ចម និម្មល ថារោងចក្រដែលយកគ្រឿងបង្គំពីថៃកំពុងរកប្រភពផ្សេងមកជំនួស ខណៈការធ្វើពហិការឈានដល់កម្រិតខ្ពស់បំផុត

បានផុស

៤ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

រដ្ឋមន្ត្រីក្រសួងពាណិជ្ជកម្ម លោកស្រី ចម និម្មល បានថ្លែងថាកម្រិតនៃការធ្វើពហិការលើទំនិញថៃនៅកម្ពុជាពេលនេះឈានដល់កម្រិតខ្ពស់បំផុត ខណៈរោងចក្រដែលត្រូវការគ្រឿងបង្គំពីថៃក៏កំពុងស្វែងរកប្រភពផ្សេងពីប្រទេសនេះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងសិក្ខាសាលាពីការពង្រឹងភាពធន់ជាតិនៅវិមានរដ្ឋសភាកាលពីថ្ងៃទី១២ ខែមីនា ឆ្នាំ២០២៦ សប្ដាហ៍មុនលោកស្រី ចម និម្មល បានលើកឡើងថាការនាំចូលទំនិញសម្រាប់ប្រើប្រាស់ប្រចាំថ្ងៃនៅកម្ពុជាត្រូវបានកាត់ផ្ដាច់ទាំងស្រុងដោយសារការធ្វើពហិការរបស់ពលរដ្ឋខ្មែរ តែការនាំចូលសម្រាប់ឧស្សាហកម្មដែលត្រូវការគ្រឿងបង្គំពីប្រទេសនេះនៅតែមាន។ យ៉ាងណាក្ដីលោកស្រីថាក្រុមហ៊ុនទាំងនោះក៏កំពុងបង្វែការនាំចូលចេញពីថៃផងដែរ។

លោកស្រី ចម និម្មល៖ «ក្រុមហ៊ុនលោកត្រូវការនូវរយៈពេលនៃការបន្សាប ហើយនៅពេលនេះគឺថាយើងដល់ដំណាក់កាលមួយដែលការបង្វែរទីផ្សារ និងរកទីផ្សារជំនួសនេះវាដល់កម្រិតមួយដែលថាអតិបរមាហើយ។ យើងនឹងឃើញនូវតួលេខនៃការបូកនៅសល់តែឧស្សាហកម្មបូកនេះនឹងធ្លាក់ចុះបន្តទៀតផងដែរ»។

ប្រទេសថៃបានបិទច្រកព្រំដែនគោកជាមួយកម្ពុជាដោយខ្លួនឯងកាលពីខែមិថុនា ឆ្នាំ២០២៥ ជាហេតុធ្វើឱ្យកម្ពុជាសម្រេចបិទច្រកឆ្លើយតបវិញ បន្ថែមលើនេះស្ថានភាពជម្លោះព្រំដែនក៏បានធ្វើឱ្យពលរដ្ឋខ្មែរនាំគ្នាធ្វើពហិការឈប់ប្រើប្រាស់ទំនិញពីប្រទេសនេះផងដែរ។

បើតាមលោកស្រី ចម និម្មល ចាប់តាំងពីខែកក្កដា ឆ្នាំ២០២៥ មកដល់ខែមករា ឆ្នាំ២០២៦ ទំហំពាណិជ្ជកម្មរវាងកម្ពុជា និងថៃនៅត្រឹមតែ៣៤៣លានដុល្លារ ថយចុះ៣៣% ហើយមកដល់ខែកុម្ភៈនិន្នាការនៃការថយចុះក៏បន្តចុះដល់៤១%។ ប្រទេសមួយចំនួនដែលជាអ្នកចូលមកជំនួសថៃមានដូចជា ម៉ាឡេស៊ី សិង្ហបុរី វៀតណាម សហរដ្ឋអាមេរិក នូវែលហ្សេឡង់ និងឥណ្ឌា៕

អត្ថបទដោយ ហ៊ុន សិរីវឌ្ឍន៍