ព័ត៌មានជាតិ

អ្នកឧកញ៉ា ម៉ុង ឫទ្ធី៖ ៣ ឆ្នាំចុងក្រោយនេះ កម្ពុជាលែងនាំចូលជ្រូកពីប្រទេសជិតខាង ថែមមានលទ្ធភាពនាំចេញថែមទៀត

បានផុស

៣ ខែ មុន

នៅ

ថ្ងៃចន្ទ ២៣ កុម្ភៈ ២០២៦

ដោយ

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុបបានអះអាងថា បច្ចុប្បន្ននេះកម្ពុជាមានលទ្ធភាពចិញ្ចឹមជ្រូកផ្គត់ផ្គង់ទីផ្សារក្នុងស្រុកបានគ្រប់គ្រាន់ និងមានលទ្ធភាពនាំចេញទៅប្រទេសជិតខាងថែមទៀត ក្រោយមានការជំរុញចិញ្ចឹមពីកសិករ និងការកាត់បន្ថយថ្លៃដើមផលិតក្នុងស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពី ១៥ ទៅ ២០ ឆ្នាំមុន កម្ពុជានាំចូលជ្រូកពី ៣ ០០០ ទៅ ៥ ០០០ ក្បាលក្នុងមួយថ្ងៃពីប្រទេសជិតខាង ប៉ុន្តែក្នុងរយៈពេល ៣ ឆ្នាំចុងក្រោយនេះ កម្ពុជាបានជំរុញការផលិតរហូតលែងមានការនាំចូលជ្រូក ហើយថែមទាំងឈានដល់ការនាំចេញជ្រូកទៅប្រទេសវៀតណាមវិញទៀតផង។

អ្នកឧកញ៉ាបានបញ្ជាក់ថា ការនាំចូលជ្រូកកន្លងទៅ ដោយសារតម្លៃផលិតកម្មក្នុងស្រុកខ្ពស់ ប៉ុន្តែនៅពេលកម្ពុជាមានលទ្ធភាពកាត់បន្ថយការចំណាយថ្លៃដើមដូចជាមានរោងចក្រផលិតចំណីសត្វដោយខ្លួនឯង នាំឲ្យតម្លៃផលិតកម្មទាបអាចប្រកួតប្រជែងជ្រូកនាំចូល ហើយមានលទ្ធភាពពង្រីកការនាំចេញ។

«ការប្រកួតប្រជែងទីផ្សារ តម្លៃផលិតកម្មមានសារៈសំខាន់ណាស់ បើតម្លៃជ្រូកក្នុងស្រុកខ្ពស់ គេនឹងនាំចូលពីប្រទេសជិតខាង ប៉ុន្តែបើយើងផលិតបានថោកជាង នោះយើងអាចនាំចេញទៅគេវិញបាន»។

បើតាមអ្នកឧកញ៉ា តាមរយៈរោងចក្រផលិតចំណីសត្វរបស់ក្រុមហ៊ុន បានកាត់បន្ថយការនាំចេញវត្ថុធាតុដើមទៅក្រៅប្រទេសដោយបង្វែរមកកែច្នៃផលិតក្នុងស្រុក ដែលជាយុទ្ធសាស្ត្រកាត់បន្ថយការនាំចូល និងជំរុញការផលិតកម្មក្នុងស្រុកឲ្យរីកចម្រើន។

ក្រុមហ៊ុន ម៉ុង ឫទ្ធី គ្រុប ក្រៅពីជ្រូក និងមាន់ ក្រុមហ៊ុនក៏មានគម្រោងពង្រីកការចិញ្ចឹមត្រី និងទាថែមទៀត ដើម្បីប្រើប្រាស់សមត្ថភាពផលិតរបស់រោងចក្រចំណីសត្វឱ្យអស់លទ្ធភាព៕