តម្លៃប្រេងអន្តរជាតិជួញដូរ​ខ្ពស់បំផុត​ក្នុង​រយៈពេលជិត ៧ ខែ លើស ៧០ ដុល្លារ/បារ៉ែល

តម្លៃប្រេងអន្តរជាតិ​បាន​បន្តកើនឡើងជាបន្តបន្ទាប់ដល់កម្រិតខ្ពស់បំផុតក្នុងរយៈពេលជិត ៧ ខែ ដោយលើស ៧០ ដុល្លារ/បារ៉ែល ចំពេលដែលវិនិយោគិនបន្តឃ្លាំមើលការចរចានុយក្លេអ៊ែរអាមេរិក-អ៊ីរ៉ង់ និងភាពស្រពេចស្រពិលនៃគោលនយោបាយពន្ធប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

នៅព្រឹកថ្ងៃអង្គារនេះ តម្លៃប្រេងអន្តរជាតិ ម៉ាក Brent បាន​កើនលើង ៤៩ សេន​ ឬ ០,៦៩% ធៀបនឹងតម្លៃបិទការជួញដូរថ្ងៃចន្ទ ដល់ ៧១,៩៨ ដុល្លារ/បារ៉ែល គិតត្រឹមម៉ោងជាង ១០ ព្រឹក (ម៉ោងនៅទីក្រុងភ្នំពេញ) ខណៈតម្លៃប្រេងអាមេរិក ម៉ាក WTI បាន​កើនឡើង ៤៧ សេន ឬ ០,៧១% ដល់ ៦៦,៧៨ ដុល្លារ/បារ៉ែល។ ​

ក្នុងវគ្គជួញដូរមួយកាលពីថ្ងៃចន្ទ តម្លៃប្រេង Brent បាន​កើនដល់ ៧២,៥ ដុល្លារ/បារ៉ែល​ ដែលជាកម្រិតខ្ពស់បំផុតរាប់តាំងពីថ្ងៃទី ៣១ ខែកក្កដា ឆ្នាំមុន ខណៈ WTI កើនដល់ ៦៧,២៨ ដុល្លារ/បារ់ែល ពោលគឺខ្ពស់បំផុតរាប់តាំងពីថ្ងៃ ៤ សីហា។

កំណើនតម្លៃប្រេងអន្តរជាតិប៉ុន្មានថ្ងៃចុងក្រោយនេះ កើតចេញពីភាពតានតឹងនៅមជ្ឈិមបូព៌ារវាងសហរដ្ឋអាមេរិក និងអ៊ីរ៉ង់ ជុំវិញការចរចានុយក្លេអ៊ែររបស់អ៊ីរ៉ង់ដែលកំពុងបន្ត។ ភាគីទាំង២ រំពឹងថានឹង​ជួបគ្នាជុំថ្មីនៅទីក្រុងហ្សឺរណែវ នាថ្ងៃព្រហស្បតិ៍ខាងមុខ ​ខណៈ​អាមេរិកកន្លងមកទាមទារឱ្យអ៊ីរ៉ង់លុបចោលកម្មវិធីនុយក្លេអ៊ែរ​ ប៉ុន្តែត្រូវបានអ៊ីរ៉ង់បដិសេធ ក្រោមហេតុផលថា​ខ្លួនមាន​គោលបំណងសន្តិភាពតែប៉ុណ្ណោះ។

យ៉ាងណាមិញ កំណើនតម្លៃនៅតែមាន​កំណត់ ជុំវិញភាពស្រពេចស្រពិលនៃគោលនយោបាយពន្ធគយ ត្រាំ ក្រោយតុលាការកំពូលអាមេរិកកំណត់ថា ពន្ធបដិការរបស់ ត្រាំ គឺខុសច្បាប់​ និងត្រូវដកចេញ។ ត្រាំ ដែលប្រឆាំងនឹងការសម្រេចនេះ បាន​ប្រកាសពន្ធថ្មី ១៥% លើគ្រប់ប្រទេសទាំងអស់ និងបានគំរាមដាក់ពន្ធយ៉ាងធ្ងន់ធ្ងរលើប្រទេសណាដែលហ៊ានដកខ្លួនចេញពីកិច្ចព្រមព្រៀងពាណិជ្ជកម្មបដិការដែលទើបសម្រេចឡើងជាមួយអាមេរិក៕