ព័ត៌មានជាតិ

ក្រៅពីរោងចក្រផលិតចំណីសត្វ អ្នកឧកញ៉ា ម៉ុង ឫទ្ធី បង្ហើបពីគម្រោងបង្កើតរោងចក្រផលិតជីធម្មជាតិទាញប្រភពពីលាមកជ្រូក មាន់ ទា

បានផុស

៣ ខែ មុន

នៅ

ថ្ងៃព្រហស្បតិ៍ ២៦ កុម្ភៈ ២០២៦

ដោយ

ផ្តល់បទសម្ភាសន៍ដល់ក្រុមអ្នកសារព័ត៌មានក្នុងដំណើរទស្សនកិច្ចតំបន់អភិវឌ្ឍកសិឧស្សាហកម្មនៅស្រុកព្រៃនប់ ខេត្តព្រះសីហនុ អ្នកឧកញ៉ា ម៉ុង ឫទ្ធី បានបង្ហើបពីផែនការក្នុងការសាងសង់រោងចក្រផលិតជីធម្មជាតិដែលទាញប្រភពពីលាមកជ្រូក មាន់ ទា និងកាកសំណល់ផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុបបានបញ្ជាក់ដូច្នេះថា «បច្ចុប្បន្នគ្រឿងចក្រនិងឧបករណ៍សម្រាប់ដំឡើងបានមកដល់អស់ហើយ ក្នុងការសាងសង់រោងចក្រផលិតជីធម្មជាតិរបស់ក្រុមហ៊ុន»។

លោកថា ទីតាំងរោងចក្រគឺស្ថិតនៅតំបន់អភិវឌ្ឍសែនជ័យ ដែលមានចម្ងាយធ្វើដំណើរប្រហែលមួយម៉ោងពីរាជធានីភ្នំពេញ។

អ្នកឧកញ៉ាបានបញ្ជាក់ថា គម្រោងសាងសង់រោងចក្រផលិតជីធម្មជាតិបន្ថែមនេះ មានគោលបំណងទាញយកសំណល់ចេញពីការចិញ្ចឹមសត្វ និងផលិតផលផ្សេងៗទៅកែច្នៃផលិតជាជីធម្មជាតិសម្រាប់ប្រើប្រាស់ក្នុងកសិដ្ឋាន និងចែកចាយដល់កសិករប្រើប្រាស់លើផលដំណាំ។

ក្រៅពីរោងចក្រផលិតជីធម្មជាតិដែលត្រៀមសាងសង់ក្នុងខេត្តកំពង់ស្ពឺ ក្រុមហ៊ុនម៉ុង ឫទ្ធី បានកំពុងដំណើរការរោងចក្រផលិតចំណីសត្វនៅតំបន់អភិវឌ្ឍកសិឧស្សាហកម្មនៅស្រុកព្រៃនប់ ខេត្តព្រះសីហនុ ដែលបច្ចុប្បន្នមានសមត្ថភាពផលិតរហូតដល់ ៥០ តោនក្នុងមួយម៉ោង។

បើតាមអ្នកឧកញ៉ា ម៉ុង ឫទ្ធី ដែលមានងារជាសេដ្ឋីកសិកម្មបានគូសបញ្ជាក់ថា សមត្ថភាពផលិតរបស់រោងចក្រមិនទាន់ដំណើរការអស់ពីកម្លាំងផលិតនៅឡើយទេ។ ដើម្បីឱ្យរោងចក្រដំណើរការបានពេញសមត្ថភាព ក្រុមហ៊ុនបានរិះរកមធ្យោបាយបង្កើនការចិញ្ចឹមសត្វឱ្យបានច្រើនមុខរួមមាន មាន់ពង មាន់សាច់ ត្រី គោ ទា និងជ្រូក ព្រមទាំងបង្កើនការចែកចាយផលិតផលទៅកាន់ទីផ្សារ៕