ព័ត៌មានជាតិ

អ្នកឧកញ៉ា ម៉ុង ឫទ្ធី៖ ក្រុមហ៊ុនមិនទាន់អាចឈានបង្កើតរោងចក្រផលិតប្រេងឆា ដោយសារខ្វះផ្ទៃដីដាំដូងប្រេង

បានផុស

៣ ខែ មុន

នៅ

ថ្ងៃសៅរ៍ ២៨ កុម្ភៈ ២០២៦

ដោយ

អ្នកឧកញ៉ា ម៉ុង ឫទ្ធី បានអះអាងថា ក្រុមហ៊ុនមិនទាន់មានលទ្ធភាពដំណើរការរោងចក្រផលិតប្រេងឆា ដោយសារមិនមានផ្ទៃដីពង្រីកការដាំដុះដូងប្រេងឲ្យបានគ្រប់គ្រាន់ ស្របតាមតម្រូវការចាំបាច់។

ឆ្លើយតបសំនួររបស់អ្នកសារព័ត៌មានក្នុងដំណើរទស្សនកិច្ចនៅតំបន់អភិវឌ្ឍកសិឧស្សាហកម្មនៅក្រុមហ៊ុនម៉ុង ឫទ្ធីគ្រុប នៅស្រុកព្រៃនប់ខេត្តព្រះសីហនុ អ្នកឧកញ៉ា ម៉ុង ឫទ្ធីបានបញ្ជាក់ថា ដើម្បីផលិតប្រេងឆាឱ្យបានតាមគោលបំណង ក្រុមហ៊ុនត្រូវការផ្ទៃដីដាំដុះដូងប្រេងរហូតដល់ ៣០ ០០០ ហិកតា។ បច្ចុប្បន្នក្រុមហ៊ុនមានផ្ទៃដីដាំដុះត្រឹមតែប្រហែល ១៦ ០០០ ហិកតា គឺមិនគ្រប់គ្រាន់តាមតម្រូវការនោះទេ។

ដោយសារតែការខ្វះខាតដីសម្រាប់ដាំដុះក្នុងស្រុក ក្រុមហ៊ុនតម្រូវឱ្យមានការនាំចូលប្រេងឆៅពីបរទេសបន្ថែម ដើម្បីយកមកផលិត។ អ្នកឧកញ៉ា បញ្ជាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនួញមានងារជាសេដ្ឋីកសិកម្មរូបនេះអះអាងថា កន្លងទៅក៏មានការជំរុញឲ្យដំាំដុះដូងប្រេងតាមបណ្តាខេត្តផ្សេងទៀត មានខេត្តមណ្ឌលគិរី រតនគិរី ប៉ុន្តែមិនទទួលបានលទ្ធផលល្អប្រសើរនោះទេ។

«ភូមិសាស្រ្តតំបន់ដែលអាចដាំដូងប្រេងបាន ត្រូវការកម្រិតទឹកភ្លៀងលើសពី ២ ០០០ មីលីម៉ែត្រ ខណៈខេត្តមានសក្តានុពលដំាដុះដំណាំឧស្សាហកម្មនេះគឺខេត្តតំបន់សមុទ្រមានដូចជា ខេត្តព្រះសីហនុ កែប កំពត និងកោះកុង»។

ក្នុងដំណើរទស្សនកិច្ចរបស់ក្រុមអ្នកសារព័ត៌មានទៅតំបន់អភិវឌ្ឍកសិឧស្សាហកម្ម ម៉ុង ឫទ្ធី នៅស្រុកព្រៃនប់ អ្នកឧកញ៉ា ម៉ុង ឫទ្ធី ក៏បានបង្ហើបពីផែនការក្នុងការសាងសង់រោងចក្រផលិតជីធម្មជាតិដែលទាញប្រភពពីលាមកជ្រូក មាន់ ទា និងកាកសំណល់ផ្សេងៗ។

អ្នកឧកញ៉ា ម៉ុង ឫទ្ធី ឲ្យដឹងថា បច្ចុប្បន្នគ្រឿងចក្រនិងឧបករណ៍សម្រាប់ដំណើរការរោងចក្រផលិតជី បានមកដល់អស់ហើយ។ ទីតាំងរោងចក្រគឺស្ថិតនៅតំបន់អភិវឌ្ឍសែនជ័យ ដែលមានចម្ងាយធ្វើដំណើរប្រហែលមួយម៉ោងពីរាជធានីភ្នំពេញ។

អ្នកឧកញ៉ាបានលើកពីផែនការសាងសង់រោងចក្រផលិតជីធម្មជាតិបន្ថែមនេះ ក្នុងគោលបំណងទាញយកសំណល់ចេញពីការចិញ្ចឹមសត្វ និងផលិតផលផ្សេងៗទៅកែច្នៃផលិតជាជីធម្មជាតិសម្រាប់ប្រើប្រាស់ក្នុងកសិដ្ឋាន និងចែកចាយដល់កសិករប្រើប្រាស់លើផលដំណាំ។

ក្រៅពីរោងចក្រផលិតជីដែលទាញចេញពីលាមកសត្វក្នុងកសិដ្ឋាន ក្រុមហ៊ុនម៉ុង ឫទ្ធី ក៏កំពុងដំណើរការរោងចក្រផលិតចំណីសត្វនៅតំបន់អភិវឌ្ឍកសិឧស្សាហកម្មនៅស្រុកព្រៃនប់ ខេត្តព្រះសីហនុ ដែលមានសមត្ថភាពផលិតរហូតដល់ ៥០ តោនក្នុងមួយម៉ោង។

បើតាមអ្នកឧកញ៉ា សមត្ថភាពរបស់រោងចក្រមិនទាន់ដំណើរការអស់ពីកម្លាំងផលិតនៅឡើយទេ។ ដើម្បីឱ្យរោងចក្រដំណើរការបានពេញសមត្ថភាព ក្រុមហ៊ុនបានរិះរកមធ្យោបាយបង្កើនការចិញ្ចឹមសត្វឱ្យបានច្រើនមុខរួមមាន មាន់ពង មាន់សាច់ ត្រី គោ ទា និងជ្រូក ដើម្បីបង្កើនការចែកចាយផលិតផលទៅកាន់ទីផ្សារ៕