ព័ត៌មានអន្ដរជាតិ

ត្រាំ ទាមទារឱ្យប្រទេសដទៃទៀតជួយធានាសុវត្ថិភាពច្រកហ័រមូហ្ស ចំពេលវិបត្តិផ្គត់ផ្គង់ប្រេងបន្ត

បានផុស

៤ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃអាទិត្យបានឱ្យដឹងថា រដ្ឋបាលរបស់លោកកំពុងពិភាក្សាជាមួយប្រទេសចំនួន៧ អំពីការជួយធានាសុវត្ថិភាពច្រកសមុទ្រហ័រមូហ្ស ដោយអំពាវនាវឱ្យពួកគេជួយការពារកប៉ាល់លើផ្លូវទឹកសំខាន់មួយនេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការទទូចសុំរបស់លោក ត្រាំ ធ្វើឡើងខណៈជម្លោះ ដែលអ៊ីស្រាអែល និងសហរដ្ឋអាមេរិកបានផ្ដួចផ្ដើមឡើងដោយការវាយប្រហារលើអ៊ីរ៉ង់ បានបន្តអូសបន្លាយចូលដល់សប្ដាហ៍ទី៣។ អ៊ីរ៉ង់បានប្រកាសបិទផ្លូវដឹកជញ្ជូនតាមកាត់ច្រកហ័រមូហ្ស ជាពិសេសការដឹកប្រេង ដែលធ្វើឱ្យការផ្គត់ផ្គង់ប្រេងធ្លាក់ចូលទៅក្នុងភាពចលាចល ហើយតម្លៃប្រេងហក់ឡើងខ្ពស់លើស ១០០ ដុល្លារ/បារ៉ែល (តម្លៃគិតត្រឹមថ្ងៃចន្ទ ១៦ មីនា)។ មុនជម្លោះផ្ទុះឡើង ច្រកហ័រមូហ្សដឹកជញ្ជូនប្រេង ២០% នៃតម្រូវការប្រចាំថ្ងៃរបស់សកល ខណៈបច្ចុប្បន្ន ការដឹកជញ្ជូនត្រូវបានកាត់ផ្ដាច់ស្ទើរតែទាំងស្រុង។

លោក ត្រាំ ដែលប្រឈមនឹងសម្ពាធក្នុងស្រុកជុំវិញការហក់ឡើងនៃតម្លៃប្រេង បានទទូចថា ប្រទេសណាដែលពឹងផ្អែកខ្លាំងលើការនាំចូលប្រេងពីតំបន់ឈូងសមុទ្រពែរ្ស មានទំនួលខុសត្រូវលើការការពារច្រកសមុទ្រហ័រមូហ្ស។

លោកថ្លែងប្រាប់អ្នកយកព័ត៌មាននៅលើយន្តហោះ Air Force One យ៉ាងដូច្នេះថា៖ «ខ្ញុំសូមទាមទារឱ្យប្រទេសទាំងនេះចូលមកការពារទឹកដីរបស់ពួកគេ ពីព្រោះវាជាទឹកដីរបស់ពួកគេ»។ លោកបន្តថា«វាជាកន្លែងដែលពួកគេដឹកថាមពលរបស់ពួកគេ»។

លោកមិនបានប្រាប់ថា ប្រទេសទាំង៧ដែលលោកបានពិភាក្សាជាមួយនោះ មានប្រទេសណាខ្លះនោះទេ ប៉ុន្តែកាលពីចុងសប្ដាហ៍ដូចគ្នា លោកបានរំពឹងថា ប្រទេសរួមមានចិន បារាំង ជប៉ុន កូរ៉េខាងត្បូង អង់គ្លេស និងផ្សេងៗទៀត នឹងបញ្ជូននាវាចម្បាំងរបស់ពួកគេ ដើម្បីការពារការដឹកជញ្ជូនកាត់ច្រកសមុទ្រហ័រមូហ្ស។

៤០% នៃប្រេងដែលចិននាំចូល គឺដឹកកាត់តាមច្រកហ័រមូហ្ស។ អឺរ់ុបក៏នាំចូលឧស្ម័នធម្មជាតិពង្រាវពីមជ្ឈិមបូព៌ា ដឹកកាត់តាមច្រកនេះផងដែរ។

ក្នុងបទសម្ភាសន៍ជាមួយកាសែត Financial Times កាលពីថ្ងៃអាទិត្យ លោក ត្រាំ បានដាក់សម្ពាធកាន់តែខ្លាំងលើសម្ព័ន្ធមិត្តអឺរ៉ុបឱ្យជួយការពារច្រកហ័រមូហ្ស ដោយព្រមានថា អង្គការណាតូប្រឈមមុខនឹងអនាគតដ៏អាក្រក់មួយ ប្រសិនបើសមាជិករបស់ខ្លួនមិនមកជួយទីក្រុងវ៉ាស៊ីនតោន។

ដោយឡែក មន្ត្រីអាមេរិកដែលឆ្លើយតបទៅនឹងភាពមិនប្រាកដប្រជាផ្នែកសេដ្ឋកិច្ចជុំវិញតម្លៃប្រេងខ្ពស់ បានព្យាករកាលពីថ្ងៃអាទិត្យថា សង្គ្រាមលើអ៊ីរ៉ង់នឹងបញ្ចប់ក្នុងរយៈពេលប៉ុន្មានសប្តាហ៍ខាងមុខ ហើយតម្លៃប្រេងនឹងធ្លាក់ចុះវិញ ទោះបីជាអ៊ីរ៉ង់បានអះអាងថា ខ្លួននៅតែរឹងប៉ឹង និងត្រៀមរួចជាស្រេច ដើម្បីការពារខ្លួនក៏ដោយ៕