សេដ្ឋកិច្ច

ធនាគារចិនសហការជាមួយ ARDB ចាប់ដៃគ្នាធ្វើការស្រាវជ្រាវលើហិរញ្ញវត្ថុបៃតង

បានផុស

៧ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

លោកបណ្ឌិត កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានឱ្យដឹងថា ធនាគារអភិវឌ្ឍន៍កសិកម្មប្រទេសចិន (Agricultural Development Bank of China – ADBC) នឹងសហការជាមួយ ធនាគារ ARDB ដើម្បីចាប់ដៃគ្នាធ្វើការស្រាវជ្រាវលើហិរញ្ញវត្ថុបៃតង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងការចាប់ដៃគ្នានេះ លោកបណ្ឌិត កៅ ថាច មានប្រសាសន៍ថា ថ្មីៗនេះធនាគារ ARDB បានទទួលជួបនូវធនាគារអភិវឌ្ឍន៍កសិកម្មរបស់ចិនដែលមកទស្សនកិច្ចសិក្សាជាមួយធនាគារ ARDB ។

ជាក់ស្តែង ទស្សនកិច្ចសិក្សានេះ កើតឡើងក៏ដោយសារតែមានការចុះអនុស្សរណៈនៃការយោគយល់គ្នា កាលពីខែមីនា ឆ្នាំ២០២៥ កន្លងទៅនេះ ដែលទស្សនកិច្ចសិក្សានេះ ធនាគារ ADBC ចិនចាប់អារម្មណ៍ខ្លាំងទៅលើការវិនិយោគហិរញ្ញប្បទានបៃតងជាមួយធនាគារ ARDB របស់កម្ពុជា។

ជាជំហានដំបូង ADBC ចិន ចាប់អារម្មណ៍លើវិស័យហិរញ្ញប្បទានបៃតង និងទំហានទី២ អាចនឹងមានការសិក្សាស្រាវជ្រាវរួមគ្នាជាមុនសិនរវាង ARDB និង ADBC ចិន ហើយការសហការផ្តល់ហិរញ្ញប្បទានអាចនិងជាជំហានបន្ទាប់។

គួរបញ្ជាក់ថា កាលពីថ្ងៃទី២៥-២៧ ខែវិច្ឆិកា ឆ្នាំ២០២៥ កន្លងទៅនេះ ធនាគារ ADBC របស់ចិនបានមកបំពេញទស្សនកិច្ចសិក្សាជាផ្លូវការនៅធនាគារ ARDB ដែលផ្តោតសំខាន់លើការចែករំលែកបទពិសោធន៍ លើនវានុវត្តន៍ហិរញ្ញប្បទានកសិកម្ម ហិរញ្ញប្បទានបៃតង សេវាប្រតិបត្តិការធនាគារ និងការសិក្សាស្រាវជ្រាវ។

ធនាគារ ARDB និង ធនាគារ ADBC ក៏បានយល់ឃើញដូចគ្នា ក្នុងការពង្រីកលទ្ធភាពកិច្ចសហប្រតិបត្តិការលើការផ្តល់ហិរញ្ញប្បទានរួមគ្នា និងការតភ្ជាប់សេវាទូទាត់អន្តរធនាគារ ជាពិសេសអាជីវកម្មបៃតង និងហិរញ្ញប្បទានបៃតង៕