ក្រោយជំនួបត្រាំ-ស៊ី ចិនជំរុញឱ្យបើកច្រកហ័រមូហ្សឡើងវិញ និងបញ្ចប់ជម្លោះអាមេរិក-អ៊ីរ៉ង់

ក្រសួងការបរទេសចិននៅថ្ងៃសុក្រទី ១៥ ឧសភា នេះ បាន​ជំរុញឱ្យ​មាន​ការបើកច្រកសមុទ្រហ័រមូហ្ស ដែលជា​ផ្លូវដឹកជញ្ជូនប្រេង និងឧស្ម័នដ៏សំខាន់ឡើងវិញ ខណៈជំនួបរវាងប្រធានាធិបតីអាមេរិក ដូណាល់ ត្រាំ និងសមភាគីចិនលោក ស៊ី ជីនពីង នៅទីក្រុងប៉េកាំង​បាន​បិទបញ្ចប់ជាផ្លូវការ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉៉យទ័រ។

ក្រសួងបាន​និយាយក្នុងសេចក្ដីថ្លែងការណ៍ ដោយ​មិន​និយាយចំឈ្មោះច្រកហ័រមូហ្ស យ៉ាងដូច្នេះថា៖ «ផ្លូវដឹកជញ្ជូន គួរតែ​បើកឡើងវិញឱ្យបានឆាប់រហ័សតាមដែលអាចធ្វើទៅបាន ​ដោយ​ឆ្លើយតបទៅនឹងការអំពាវនាវរបស់សហគមន៍អន្តរជាតិ និងរួមគ្នារក្សាស្ថិរភាព ​ក៏ដូចជា​លំហូរដ៏រលូននៃខ្សែ​ច្រវ៉ាក់ផ្គត់ផ្គង់សកល»។

គួរគូសបញ្ជាក់ថា ​នាវាចរណ៍កាត់តាមច្រកសមុទ្រហ័រមូហ្ស ដែលដឹកជញ្ជូនទំនិញសំខាន់ៗចេញចូលតំបន់មជ្ឈិមបូព៌ា និងរួមចំណែកដល់លំហូរប្រេង និងឧស្ម័ន ១/៥ នៃតម្រូវការពិភពលោក ត្រូវបាន​ជាប់គាំងស្ទើរតែទាំងស្រុង រាប់តាំងពីជម្លោះអាមេរិក អ៊ីស្រាអែល និងអ៊ីរ៉ង់ផ្ទុះឡើងនៅចុងខែកុម្ភៈ។ បច្ចុប្បន្ន អ៊ីរ៉ង់ និងអាមេរិក បិទខ្ទប់ច្រកផ្លូវសំខាន់មួយនេះរៀងៗខ្លួន។

ពេញមួយកិច្ចប្រជុំកំពូលត្រាំ-ស៊ីលើកនេះ​ ចិន​មិនសូវជានិយាយអ្វីច្រើនពី​អ៊ីរ៉ង់នោះទេ ទោះបីជាលោក ត្រាំ បាន​​អះអាងថា ចិន​យល់ឃើញដូចគ្នាជាមួយអាមេរិក ថា អ៊ីរ៉ង់ «មិនគួរមាន​អាវុធនុយក្លេអ៊ែរ» ហើយច្រកហ័រមូហ្សគួរតែបើកឡើងវិញក្ដី។

យ៉ាងណាមិញ ក្នុងសេចក្ដីថ្លែងការណ៍នាថ្ងៃសុក្រនេះដដែល ក្រសួងការបរទេសចិនបាននិយាយដូចជាខ្នក់ចិត្តយ៉ាងដូច្នេះថា៖ «ជម្លោះ(អាមេរិក-អ៊ីរ៉ង់)នេះ ​មិនគួរកើតឡើងឡើយ [វា]គ្មានហេតុផលដើម្បីបន្តទៅមុខទៀតឡើយ»។ ចិនជំរុញឱ្យបញ្ចប់ជម្លោះ ដោយនិយាយថា៖ «​ការស្វែងរកដំណោះស្រាយឱ្យបានឆាប់តាមដែលអាចធ្វើទៅបាន គឺមានប្រយោជន៍សម្រាប់ទាំងសហរដ្ឋអាមេរិក និងអ៊ីរ៉ង់ ក៏ដូចជាសម្រាប់ប្រទេសនានាក្នុងតំបន់ និងពិភពលោកទាំងមូល»។

ក្រសួងការបរទេសបាន​បន្តថា៖ ​«ចិនតែងតែ​ទទូចថា ការសន្ទនា និងការចរចាគឺជាផ្លូវត្រឹមត្រូវ ហើយដំណោះស្រាយយោធាមិនមែនជាមធ្យោបាយឆ្ពោះទៅមុខនោះទេ។ ឥឡូវនេះ ទ្វារនៃការសន្ទនាត្រូវបានបើកហើយ វាមិនគួរ​បិទម្តងទៀតទេ»។

គេមើលឃើញថា ដំណើរទស្សនកិច្ចរបស់លោក ត្រាំ ទៅចិន ដែលចាប់ផ្ដើមកាលពីថ្ងៃពុធ ធ្វើឡើងចំពេលដែលប្រទេសមហាអំណាចទាំង២ ស្វែងរកដំណោះស្រាយការទូតលើបញ្ហាផ្សេងៗ រួមទាំងពាណិជ្ជកម្ម និងផលប្រយោជន៍ភូមិសាស្រ្តនយោបាយ។ ប្រទេសទាំង២ បាន​ធ្លាក់ចូលទៅក្នុងសង្រ្គាមពាណិជ្ជកម្មពន្ធគយដ៏ក្ដៅគគុកកាលពីឆ្នាំមុន ក្រោយលោក ត្រាំ បាន​ប្រកាសពីវិធានការពន្ធផ្សេងៗ ដែលធ្វើឱ្យចិនឆ្លើយតបខ្លាំងៗជាបន្តបន្ទាប់។

គិតត្រឹមរសៀលថ្ងៃសុក្រនេះ ភាគីទាំង២ មិនទាន់បាន​ប្រកាសជាផ្លូវការណាមួយជាលម្អិតពាក់ព័ន្ធនឹង​កិច្ចព្រមព្រៀងពាណិជ្ជកម្ម ដែលអាចរាប់បញ្ចូលទាំងបញ្ហារ៉ែកម្រ នោះទេ ខណៈក្រុមប្រតិភូអាមេរិកបាន​ឡើងយន្តហោះត្រឡប់ទៅអាមេរិកវិញ​។ ប៉ុន្តែលោក ត្រាំ បាន​និយាយថា៖ «យើង​សម្រេចបាន​កិច្ចព្រមព្រៀងពាណិជ្ជកម្មដ៏អស្ចារ្យមួយចំនួន សម្រាប់ប្រទេសទាំង​២»។ លោកមិនបានបញ្ជាក់បន្ថែមទេ ប៉ុន្តែកាលពីថ្ងៃព្រហស្បតិ៍ លោកបាន​ប្រាប់ Fox News ថា ​ចិនបានយល់ព្រមទិញយន្តហោះពីក្រុមហ៊ុនផលិតយក្សអាមេរិក​ Boeing ចំនួន ២០០ គ្រឿង៕