១ឆ្នាំ ក្រោយនាវា MT Strovolos លួចយក​ប្រេងជិត ៣០ម៉ឺនបារ៉ែល​របស់កម្ពុជា

កាល​ពី​​ខែ​មិថុនា ឆ្នាំ​២០២១កន្លង​ទៅ​ ក្រុមហ៊ុន គ្រីស អែនណឺជី (Kris​ Energy)​ ដែល​មាន​ទីតាំងនៅ​ប្រទេស​​​សិង្ហបុរី បាន​ប្រកាសពីការ​ក្ស័យធនរបស់ខ្លួន ដោយសារជាប់បំណុល និងថាប្រេងដែលបូមបាន​​​ពីប្លុកអេ(A) នៅកម្ពុជា មាន​ចំនួន​តិចតួច មិនគ្រប់គ្រាន់ដូចការរំពឹងទុក។

ក្រោយមក ប្រេងឆៅប្រមាណជិត៣០ម៉ឺនបារ៉ែល (២៩៥ ០០០) ដែលស្មើជិត៤៧លានលីត្រ បានបាត់ពីកម្ពុជា នៅខែមិថុនា ឆ្នាំ ២០២១។​ ប៉ុន្តែបន្ទាប់មកត្រូវបានរកឃើញវិញ នៅខែ សីហា ឆ្នាំដដែល ក្នុងដែនសមុទ្ររបស់​ប្រទេសឥណ្ឌូនេស៊ី។ រដ្ឋាភិបាលឥណ្ឌូនេស៊ីបានប្រកាសថា  ​ខ្លួនបានរឹបអូស​នាវាដឹកប្រេងមួយគ្រឿងឈ្មោះ MT Strovolos ​ដែលមានផ្ទុកប្រេងឆៅ ៣០ម៉ឺនបារ៉ែល និងមាននាវិកនៅលើកប៉ាល់នោះជាង១០នាក់ផងដែរ។

គិតត្រឹមខែ មិថុនា ឆ្នាំ ២០២២នេះ មានរយៈពេល ១ឆ្នាំហើយ ដែលកម្ពុជា បានទាមទារយកប្រេងទាំងនេះមកវិញ។

លោក ជៀប សួរ អគ្គនាយកនៃអគ្គនាយកដ្ឋានប្រេងកាត នៃក្រសួងរ៉ែ និងថាមពល ​បានប្រាប់កម្ពុជាថ្មី នៅព្រឹកថ្ងៃទី ០៧ ខែមិថុនាថា ទាក់ទងរឿងប្រេងនេះ ភាគីពាក់ព័ន្ធ (មេធាវីរដ្ឋាភិបាល ក្រុមហ៊ុន គ្រីស អែនណឺជី (Kris​ Energy)​ កប៉ាល់ MT Strovolos) កំពុងពិភាក្សាសម្របសម្រួលដោះស្រាយគ្នាដោយសន្តិវិធី។ លោកសង្កត់ធ្ងន់ថា« ខ្ញុំពុំទាន់អាច​វាយតម្លៃបានថាចប់នៅពេលណានៅឡើយទេ សូមរង់ចាំសិន»។

ទោះយ៉ាងណា លោក ជៀប សួរ បានឱ្យដឹងថា បញ្ហានេះ នឹងអាចមានដំណោះស្រាយក្នុងរយៈពេលដ៏ខ្លីខាងមុខនេះ៕

ទួន សុផល